منتديات ورد للفنون التشكيلية و اليدوية  

العودةالعودة   منتديات ورد للفنون التشكيلية و اليدوية > ورد للفنون منتديات عامة > منتدى حواء جمال اناقة اتيكيت مرأة امومة طفل طفولة اسرة

منتدى حواء جمال اناقة اتيكيت مرأة امومة طفل طفولة اسرة حواء جمال و اناقة و اتيكيت اسلوب حياة امومة طفولة اسرة

02-01-2016, 08:03 AM   #1
Amany Ezzat
vip
Crown5
 
تاريخ التسجيل: Jan 2014
الدولة: مصر
المشاركات: 6,580
عزيزي الزوج لحظة من فضلك

Facebook Twitter Google LinkedIn vkontakte messenger Digg

basmala

السلام عليكم و رحمة الله و بركاته
أهل ورد الغاليين

أشياء بسيطة جدا قد تغير روتين الحياة
و تجعلنا أسعد
حوار بين زوج زوجة
يحمل الكثير
اتمنى ينال إعجابكم و اهتمامكم

-حبيبتي
*ايوة يا احمد
-العيال ناموا؟؟
*أها.. ليه؟
-طب تعالي
*ليه؟!
-عايزك لمدة ساعة تنسي انك مراتي
و تيجي معايا.. ممكن؟
*يالهوي يا احمد خنتني؟؟!!
-ايه بالظبط ف اللي انا قلته
اوحالك بالفكرة العظيمة دي؟؟؟
*ماهو عايزني أنسى اني مراتك ليه؟؟..
اكيد خنتني و هتقولي عايزك تسمعيني
كأنك واحد صاحبي
و تكوني هادية و الهري بتاع الرجالة ده!
-اهو انا عايزك تنسي انك واحده تحديدا
عشان طريقة التفكير الحريمي دي!!..
هتيجي ولا مش هتيجي؟؟!!
*هاجي.. اما نشوف!
-ألبسي طيب و هستناكي ف العربية
*ألبس؟!.. و عربية؟!!.. اوباااا..
لا ده انت كده اتجوزت بقى مش خنتني بس!!..
اتجوزت عليا يا احمد؟!!!
-قسما بالله لو ما سكتي و دخلتي تلبسي
و كنتي ف العربية كمان ١٠ دقايق،
هتجوز ال ٣ اللي فاضلينلي ف خلال اسبوع!
*ماشي يا احمد.. اما اشوف!

**ف العربية**
*ها؟.. في ايه؟
-انسي انك مراتي الاول..
*ايوة يعني اعمل ايه؟؟..
اقلع الدبلة يعني و لا اعمل ايه؟!
-لا، يعني تحرري عقلك من روتين الجواز
و قوالب الزوجات و غباء المحشي و البيتزات
و ميكانيكيات الجري ورا العيال بالشبشب ف الشقة..
*انت لما بتطلب معاك فلسفة كدة
بتبقى عملت مصيبة او ناوي تعمل مصيبة!..
أنجز، هببت ايه؟!!
(بيقف بالعربية)
-انزلي
*خلاص خلاص.. هسكت..
اديني نسيت اني مراتك.. قول يا فيلسوف!..
-فاكرة لما كنّا مخطوبين؟
*ايوة فاكرة!.. ها؟
-طب فاكرة احنا بقالنا اد ايه متجوزين؟
*عشر سنين.. في ايه يا احمد؟!!
-من وقت الخطوبة لحد دلوقتي،
عشر سنين، احنا فين يا حبيبتي؟
راحت فين لهفتي عليكي؟..
راح فين حبي ليكي و سعادتي لما كنت أبص ف وشك؟؟..
راح فين شغفك و اهتمامك لما كنت اقعد اكلمك
عن حاجة و انتي بتسمعيلي بمنتهى الاهتمام؟؟
راح فين اهتمامك بشعرك و جسمك و اكسسوراتك؟؟
راح فين البووت الشمواه اللي كنت بتهبل لما اشوفك لابساه؟
*عايز توصل ل ايه يا احمد؟!!
-أرجوكي جاوبي على أسئلتي..
انا حاسس بملل رهيب.. حاسس اني مش متجوز..
روتين حياتنا خانقني!..
و مش عارف اعمل ايه!.. و مش عارف اكلمك!..
كل مافتح الموضوع معاكي تهربي!
*عايز تعرف يا احمد؟؟؟
-ايوة عايز اعرف!
*مبدئيا البووت الشمواه رميته من خمس سنين
بعد ما خلفت ملك
لانه داب و مكانش ينفع البسه..
و ماشتريتش تاني عشان الفلوس
احنا أولى بيها ف مصروف البيت!..
اكسسواراتي مرمية ف درج الشوفينيرة
ماليش نفس البسها عشان عينك مابقتش تشوفهم خلاص!..
شعري محتاج وقت و روقان بال عشان اهتم بيه زي الاول..
و الوقت اللي ههتم فيه بشعري ده،
البيت و عيالنا أولى بيه عشان مش هنقدر نجيب شغالة!
جسمي باظ بعد ٣ ولادات قيصري!..
اللي هما عيالنا يا احمد!..
و محتاج عمليات شفط دهون
و اشتراك نادي و دكتورة تغذية و..... و......و ......
-يا حبيبتي بس ال.........
*اما بالنسبة للملل اللي حضرتك حاسس بيه،
انا حاسة اضعافه!..
ما بين شغلي و شغل البيت و الطبيخ
و الغسيل و المواعين و المذاكرة للعيال
و تدبير مصروف البيت و الجمعيات
بتاعت مصاريف المدارس و الاجتماعيات
اللي حضرتك راميها عليا كلها،
انا نسيت أساسا اني متجوزة..
-ماشي انا عارف كل ده بس بر...........
*اللي انت و كل الرجالة مش فاهمينه
ان الست بتتغذى حرفيا على الاهتمام الصادق
من جوزها و راجلها!..
اخر مرة قلتلي تسلم ايديك
على اكلة قطمت ضهري ف المطبخ عشان اعملهالك امتى؟؟
اخر مرة قلتلي انا بحبك يا مراتي يا ام عيالي
ياللي جسمك باظ و سنانك
اتسحب منها الكالسيوم بسببهم كانت امتى؟؟
اخر مرة لاحظت اني حوشت و اشتريت البرفيوم
اللي انت بتحبه و حطيته و استنيتك كانت امتى؟
و انت جيت فضلت تتفرج على ماتش برشلونة!
-لأ بقى كله الا برشلونة!!
*هي برشلونة بس؟؟؟
و الاهلي و ريال مدريد و الإنتر
و ماتشات اليد و الأخبار و القعاد على النت
و أصحابك عالقهوة و الجرايد و الشغل
و ...... و...... و......و......!!
-انتي عرفتي اسماء النوادي دي منين؟؟!
*ههههههه.. لأَنِّي مهتمة!!
مهتمة اعرف جوزي بيحب ايه!
-و كاتمة ف قلبك كل ده!!
*كاتمة عشان مابقاش الزوجه النكدية الرغاية
اللي مش مقدرة تعب جوزها و مزاجه!!
-(نظرة صامتة).. بس انا........
*بس انت ايه؟
اقولك انا؟
بس انت راجل..
مش مستوعب ان الاهتمام بمراتك
هيفرز ف جسمها هرمونات سعادة
تخليها اجمل من كل الموديلز!
انت راجل و طبعك اناني مش هتشوف
ولا هتحس غير باللي يروق مزاجك انت و بس!!
انت راجل و التصميم بتاعك متعارض
مع مجرد الفهم ل ازاي تاخد بالك من مراتك
الا ف اول ٦ شهور جواز
و هي لِسَّه بخيرها قبل ما الزمن و الخلفة
و المواعين و المطبخ يعلموا عليها!!
-كل ده!!!.. ده انتي معبية و شايلة مني اوي!!
*لا يا حبيبي مش شايلة..
انا تصالحت مع كونك راجل من زمان!!..
-طب غمضي عينك!
*هههههههه.. احنا ف الشارع!
-غمضي بس!
و ماتفتحتيش غير لما اقولك!
*ماشي بس بلاش تهور مش طالبة أقسام على آخر الزمن!
*ها؟؟؟
كل ده؟؟
-فتحي بقى!
*ايه ده؟.. احنا فين؟؟
-فاكرة بتاع العصير ده؟؟
*ايوة فاكراه!
ده اول مكان خرجنا فيه بعد كتب كتابنا!
-و جينا هنا اول مرة زي انهاردة من ١١ سنة بالظبط!
*و انت لِسَّه فاكر؟ ههههههه
-ايوة فاكر!..
و عارفة فاكر ايه كمان؟؟
*ايه؟
-انك يوميها كنتي لابسة البووت الشمواه!
(احمد بيمد إيده للكنبة اللي ورا و يجيب شنطة)
*ايه ده؟؟
-افتحيها!
(بتفتح الشنطة اللي جواها بووت شمواه جديد
و كان على مقاسها بالظبط!)

الاهتمام بالزوجة ممكن يكون احسن من
كل أدوات التجميل اللي ف العالم!

الاهتمام بالزوجة ممكن مايكلفكش غير
مفاجأة بسيطة كل فترة !!
الاهتمام بالزوجة ممكن مايكلفكش غير
فكرة بسيطة انت عارف انها هتفرحها !!

مش بحب لبس البوتات على فكرة

طيب الله اوقاتكم
تحياتي
__________________

signature

Amany Ezzat غير متواجد حالياً  
02-01-2016, 06:54 PM   #2
SaMaR_ BakR
شريك محترف
stars-2-8
 
تاريخ التسجيل: Nov 2007
الدولة: cairo
المشاركات: 3,482

فى أول الحوار كان عندي رد جامد جدي
وكنت هافتح التييييت
هههههههههه
لكن على آخر الحوار
وبعد ماهى قالت كل اللى جوا كل ست
لا يمكنى التعليق ,,,
هى قالت كل حاجه

تسلمى يا جميلة
زيدينا ...
__________________

signature

SaMaR_ BakR غير متواجد حالياً  
02-02-2016, 08:10 AM   #3
هالة
مراقب عام
Crown5
 
تاريخ التسجيل: Jun 2007
الدولة: القاهرة - الاسكندرية
المشاركات: 26,206

كلام جميل وكلام معقول
مقدرش اقول حاجة عنه
لكن اكيد الكلام ده
بين زوجين بيحبوا بعض
يعني كان بينهم " love story "
لكن الناس اللي اتجوزت
علشان البنت دي مناسبة
وانا محتاج اتجوز
وبعد الجواز يطلعوا هم الاثنين
مناسبة غير سعيدة بالمرة
هههههههههههه
يبقى مفيش حوار جميل زي ده
اماني الجميلة
انا كمان مش بحب البوت
بطريقته المعتادة الايام دي
ربنا يسعدك حبيبتي
ويرزق بنات واولاد المسلمين
ازواج وزوجات صالحات يا رب
__________________

signature

هالة غير متواجد حالياً  
02-02-2016, 04:16 PM   #4
أم البنين
شريك ذهبي
stars-1-6
 
تاريخ التسجيل: Jan 2013
الدولة: سوريا
المشاركات: 465

اذا التفاهم موجود بين الزوجين
يكبر الحب مع الزواج ولا يختفي
ولكنه يحتاج كل فترة لتلميع من أحد الطرفين
سلمت يداك فعلا المرأة لا تحتاج أكثر من كلمة تقدير من زوجها
أو اشارات بسيطة تشعرها أنها بالقلب
وهذا ما أكده الرسول الكريم في أحاديثه
كحديث عن سعد بن أبي وقاص رضي الله عنه،
أن النبي صلى الله عليه وسلم قال:
( إنك مهما أنفقت على أهلك من نفقة،
فإنك تؤجر حتى اللقمة ترفعها إلى فم زوجتك )
لاحظ ترفعها أي أنت تطعمها بيدك
__________________

signature

أم البنين غير متواجد حالياً  
إضافة رد

مواقع النشر (المفضلة)

أدوات الموضوع
انواع عرض الموضوع

ocllapseimg_forumrules تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

ward2u المواضيع المتشابهه
الموضوع كاتب الموضوع المنتدى مشاركات آخر مشاركة
ما بين لحظة حب والم الفراشة الحزينة منتدى ثقافي موضوعات ثقافية عامة خواطر شعر سيرة شعراء 12 01-21-2012 08:24 PM
ابتسم من فضلك انت فى اليابان Bulla منتدى تاريخ و جغرافية دول العالم و تقاليد الشعوب 30 09-27-2010 08:16 PM
بنتظر لحظة لقاك النبع الصافي منتدى ثقافي موضوعات ثقافية عامة خواطر شعر سيرة شعراء 23 05-02-2010 07:43 PM
قط و بطة و لحظة غدر و انتقام بنت تونس نكتة مصورة مكتوبة فزورة مسابقة صور مضحكة ثابتة متحركة 20 04-17-2010 03:56 PM
صرخـات قلــم .. في لحظة ألم moondream2009 الحوار العام الموضوعات الانسانيه النقاش الهادف النقد البناء 2 09-01-2007 02:38 PM


الساعة الآن 11:15 AM.


Powered by vBulletin® Version 3.8.9
Copyright ©2000 - 2017, vBulletin Solutions, Inc