منتديات ورد للفنون التشكيلية و اليدوية  

العودةالعودة   منتديات ورد للفنون التشكيلية و اليدوية > ورد للفنون منتديات عامة > منتدى ثقافي موضوعات ثقافية عامة خواطر شعر سيرة شعراء

منتدى ثقافي موضوعات ثقافية عامة خواطر شعر سيرة شعراء منتدى ثقافي موضوعات ثقافية خواطر سيرة شعراء اجمل قصائد

07-03-2014, 04:14 AM   #29
Amany Ezzat
vip
Crown5
 
تاريخ التسجيل: Jan 2014
الدولة: مصر
المشاركات: 6,586

Facebook Twitter Google LinkedIn vkontakte messenger Digg
أغنية البنت أم ضفيرة

آه .. بدك تعمل حيلة وتاخد قلبى؟
آه .. قلبى قليل الحيلة يانا يا غُلبى


دنيا الحب كبيرة
وأنا لسه بضفيرة
وإن حسيت بالحيرة
آه يانا يا غلبى

أمى قالت لى: حسك عينك .. قلبك إوعيله
ضمى على قلبك دراعينك .. لا الحب يجيله
مرت نسمة قوية شوية
فيها قسوة على حنية
أعمل إيه فيك انت وهيا
ده أنا متوصيَّة
لا أكلم حد
هزار ولا جد
وطول السكة أمشى بمَّد
فاهم ؟
آه ...

قلبى اندارى وقال أنا خايف.. أمشى الناحية دى
والناحية دى لمحت شفايف .. تهم وتنادى
تبكى تتنهد وتغنى
وتقول لى كلام أكبر منى
لا فيه ولا كلمة تطمننى
تبعد عنى
لا تتبسِّم
ولا تسلِّم
لا أحبك وأرجع أتألِم
فاهم ؟
آه ...

بدك تعمل حيلة ... وتاخد قلبى ؟


أغنية من الشباك

أنا هنا يا ابن الحلال
لا عايزة جاه ولا كتر مال
باحلم بعش أملاه أنا
سعد وهنا

مليت لك القلة
عطشان تعالى يا جميل ياللا
مليت لك الأبريق
عطشان تعالى والسلامة طريق
أنا ورا الشباك
سهرانة باستناك
علمِّت قلبى هواك
من قبل ما تجينى ولا اتملَّى
وإن جيتنى يا مهنى
ندرن عليا العين والنِنِّى
وإن جيت تدق الباب
ندرن عليا القلب شيلُه حجاب
فرشت لك رمشى
إخطر عليه وامشى
م الشوق ما بانامشى
باستنى . . حتى العمر مستِّنى

فى الغيب أنا شايفاك
قلبى انكشف عنه الحجاب ولقاك
فى الغيب أنا شُفتك
قلبى شاور لى عليك وعرفتك
انت أسمرانى جميل
لك غِيّة فى المواويل
والقلب لك بيميل
من قبل ما يكون لى نصيب وياك
وأنا هنا . .



نجية

من صغر سنى

غاوى ملاغية ،

وغصب عنى بتقول عينيا ،

عاشق يا ليل . .

يا ليل وغاوى سهر ،

يا ليل ، وبالى طويل . .

للصبح ، يا أبو القمر ،

أنا وانت ، والمواويل . .

غازلت نسمة .

يا ليل ، ونجمة ...

وكلمة كلمة قصدى البنية

يا ريتها تسمح ،

وتقول لى : صرح . .

بدال ما ألمح . . أنا أقول : نجية !



مفترق الطرق

ساعات أقوم الصبح قلبى حزين

أطل بره الباب ياخدنى الحنين

اللى لقيته ضاع

واللى اشتريته انباع

واللى قابلته راح وفات الأنين

وأرجع وأقول

لسه الطيور بتفن

والنحلايات بتطن

والطفل ضحكه يرن

مع إن مش كل البشر فرحانين

حبيبى سكر مر طعم الهوى

فرق ما بيننا البين ما عدناش سوا

حرام عليك يا عذاب

نبقى كده أغراب .

ده البعد والله جرح من غير دوا

آدى اللى كان وآدى القدر والمصير

نودع الماضى وحلمه الكبير

نودع الأشباح

نودع الأفراح

راح اللى راح ما عدش فاضل كتير

إيه العمل فى الوقت ده يا صديق

غير إننا عند افتراق الطريق

نبص قدامنا

على شمس أحلامنا

نلقاها بتشق السحاب الغميق

وأرجع وأقول

لسه الطيور بتفن

والنحلايات بتطن

والطفل ضحكة يرن

مع إن مش كل البشر فرحانين .



ليلة إمبارح

ليلة إمبارح ما جاليش نوم
وإحنا لسه ف أول يوم

قبل ما ترمينى فى بحورك
مش كنت تعلمنى العوم

أنا كنت لوحدى وف حالى
شفتك ما اعرفش اللى جرى لى

راحة البال راحت من بالى
قلت لها مع ألف سلامة

والحيرة قلت لها تعالى
لا ملامة عليا لا ملامة

عمرى كوم والحب ده كوم

غابت شمس إمبارح عنى
خدها الليل خباها منى

بس انت يا قمر طمنى
واوعى تخاف من أى غيامة

شباكى منور بيغنى
لا ملامة عليا لا ملامة

عمرى كوم والحب ده كوم
وليلة إمبارح ما جاليش نوم


صلاح جاهين ملف كامل
Amany Ezzat غير متواجد حالياً  
07-03-2014, 04:24 AM   #30
Amany Ezzat
vip
Crown5
 
تاريخ التسجيل: Jan 2014
الدولة: مصر
المشاركات: 6,586

اتنين

اتنين ولا قبلنا
ولا بعد منا اتنين
فين زى حبى أنا
وزى حبك فين
اتنين ولا قبلنا
ولا بعد منا اتنين
اتنين روحين هيمانين
قلبين وشقايق
تفوت علينا السنين
وكأنها دقايق
لايق علينا الهنا
وكأنه توب عايق
ولا فى القصص والغنا
فيه زينا حبيبين
اتنين ولا قبلنا
ولا بعد منا اتنين
قالوا ما فيش الهوى
لكن إحنا قلنا: فيه
يا ناس شوفونا سوا
راح تعرفوا معانيه
الحب ده سرنا
لكن ولا نخبيه
أهه أهه حبنا
لا نخاف حسد ولا عين
اتنين ولا قبلنا
ولا بعد منا اتنين



اسكندرانى

إسكندرانى إسكندرانى
عيونه حلوة ومحيرانى
أنا هويته لما لقيته
عيونه خضرا وهو أسمرانى
يا زمرد يا فاروز
يا بخت اللى يفوز
فزنا بنظرة عين
ودتنا على فين ؟
ودتنا كرموز
البحر هادى . . والا إيه ؟
باحاول أفهم من عينيه
النني الأخضر
يحكم ويقدر
وأنا اللى ما أقدرش عليه
الاسكندرانى
بحر الحب عميق
كل شوية غريق
أنا خدنى التيار
تعالى لى يا بحار
لو فيك قلب رقيق
لو قلبك أخضر لون عينيك
لا أخاف عليا ولا عليك
وإن كنت قاسى
يا ما ح اقاسى
وأنا اللى روحى بين إيديك
يا اسكندرانى . .
آه يا أطبا
آه م اللى بيَّا
ضيعت قلبى فى اسكندرية
راحت هناوة البال من حياتى
ساعة ما سلَّط عينيه عليا
لما انشبك قلبى . . ومال
ما بقاش فى صدرى على الشمال
بس المحبة
مالهاش أطبا
يشفونى من جرح الجمال
الاسكندرانى


ح نروح فين؟

ح نروح فين ؟
كفاية
فرحنا يومين
كفاية
ياما اتقابلنا
وياما قلنا
يا حبيبى وياما اتهنينا
لا يوم غُلُبنا
م اللى ف قلوبنا
ولا دبنا من دمع عينينا

لكن اللى سهر على طول
إحساس كان حارمنى النوم
فى اللحظة الجميلة يقول
راح يخلص ده كله ف يوم
ومفيش حكاية من غير نهاية

كفاية كفاية
ح نروح فين ؟
مفيش حكاية من غير نهاية
يا هنايا ودنيايا وحبى
ويوم فراقنا
عارف طريقنا
وح يجيلنا مهما ح نخبى
نتفارق يا روحى قوام
وكفاية علينا كلام
أتألم سنين وأيام
أهون لى من اللوام
ومفيش حكاية من غير نهاية
كفاية


النجوم

حضنت عودى باغنِّى
عود الحبيبة فتننى
أَغنى غنوة حزينة
والاَّ ح تبعدها عنى

يا لحن عاشق وحالم
طالع سلالم سلالم
إمتى أطول النجوم

عاشق دواه المحبة
حرام يا شابة ده عاشق
سافروا له ياما أطبا
ورجعوا والسهم راشق

والحلم يلمس فؤادى
يهمس . . يغنى . . ينادى
آه لو أطول النجوم


صلاح جاهين ملف كامل
Amany Ezzat غير متواجد حالياً  
07-03-2014, 05:00 AM   #31
Amany Ezzat
vip
Crown5
 
تاريخ التسجيل: Jan 2014
الدولة: مصر
المشاركات: 6,586

عصفورة

أنا زى ما أكون عصفورة وعاوزة تطير
واقفة وخايفة على جناحها
م الهوا لما يطوحها
والهوا طول عمره بينده للعصافير
وأنا لما هواك نده
رديت باللحن ده
أوصيك . .
أوصيك بيا.

أنا شفت عيون حلوة ومتبسمة
أتاريها عيون قادرة ومتحكمة
يا حبيبى أمانة عليك قلبى وروحى
ده أنا لسه يا دوب على أول سلمة
وحياة ما سحرتنى
وف يوم غيرتنى
أوصيك . . .
أوصيك بيا

إعمل لى الحب جنينة وفسحنى
م الفجر اقطف لى الورود وفرحنى
وإن قلت كفاية الشمس خلاص غابت
والنبى نور لى السكة وروحنى
يا بدر فى السما
عمر ما قلبى اترمى
أوصيك . . .
أوصيك بيا.


حدوتة

لو كنتى ست الحسن والجمال
يكون أبو زيد الهلالى . . أنا
لكى أول الحدوتة فى الدلال
وأنا آخر الحدوتة ليا الهنا
دقيت عليكى الباب كتير
رد الصدى وقال يا أمير
ما بينكم البحر الكبير
دقيت على الباب بالإيدين
رد الصدى وقال لى يا زين
بينك وبينها بلدين
أنا قلت لو بينى وبينها السما
مغرم بها وهيا كمان مغرمة
آه من طريقِك الطويل
ولا ليا غير قلبى دليل
عطشان يا ميه سلسبيل
حالى يا ست الحسن حال
إرخى شعورك الطوال
خدينى من حر الجبال
وإن ما لقيت عندك لقلبى دوا
لأعشق عيون الشمس وأهوى الهوا
صبرت لما الود بان
عملت أنا التختروان
وحملت قلبى شمعدان
دَوّبت لك بحر الهوى
فى كلمة ح نقولها سوا
ونقول ده عنقود واستوى
والناس تشوفنا تقول يا ست البنات
حدوتة آخرتها التبات والنبات


عيون الحليوة

بان عليا حبه
من أول ما بان
ياما كان فى نفسى والله أعشق من زمان
كان الحب حبه
بان .. طرحت محبه
وعيون الحليوة يا عينى بحر من الحنان

من أول ما شفت عيونه
أنا قلت الليالى يهونوا
تحميه السما وتصونه
أنا شفت اللى مستنينى
وعرفت اللى ح يهنينى
من أول ما بان
وعيون الحليوه ياعينى بحر من الحنان
من خوفى عليه ما بانامشى
وافرش له طريقه برمشى
هنانى وهواه ما رحمشى
... ليه لما نده لبيته
ليه بين الضلوع خبيته
من أول ما بان.
... دى عيون الحليوة يا عينى بحر من الحنان

شباك الأمل وفتحته
والدنيا جناين تحته
يا دموعى خلاص ارتحتوا
من إمتى يا قلبى فرحنا
والدنيا بقت تشرحنا
من أول ما بان
عيون الحليوة يا عينى بحر من الحنان

هذه القصيدة قدمت في
اغنية لفريق المصريين بالاشتراك مع صلاح جاهين
وهناك اختلافات بين القصيدة و الاغنية
و سأذكر الاثنتين:

القصيدة:


الشوارع حواديت
حوادايه العشق فيها وحوادايه العفاريت
وحدوا الله............
الشارع ده كنا ساكنين فيه زمان
كل يوم يضيق زياده عن ماكان
اصبح الان
زى بطن الام.. مالناش فيه مكان
والشارع ده رحنا فيه المدرسه
اللى باقى منه باقى واللى مش باقى اتنسى
كنسوه الكناسين بالمكنسه
ويا اوراق الخريف سنه تلاته واربعين وخمسه وسته واربعين
والشارع ده كل شئ فيه للبيع
والشارع ده وحل زى ماهو بس بأسم تانى
والشارع ده اوله عمارات واخره حيطه سد
والشارع ده ماشى من تحت البلد
والشارع ده جديد ومحضرتش بنايته
والشارع ده والشارع ده كلهم حواديت طوال وقصيرين
والشارع ده
ماشى فيه وف قلبى رعده
بس برضك ماشى فيه لجل مااجيب نهايته.........
انا طفل قديم, يحب الحواديت

الاغنية:


الشوارع حواديت
حواديه الحب فيها
وحودايه...عفاريت
اسمعي يا حلوة لما اضحكك

الشارع دا كنا ساكنين فيه زمان
كل يوم يضيق زيادة عن ما كان
اصبح الآن بعد ما كبرنا عليه
زي بطن الأم مالناش فيه مكان

الشوارع حواديت
حودايه الحب فيها
وحودايه...عفاريت
اسمعي يا حلوة لما أضحكك

الشارع دا رحنا فيه المدرسة
اللي باقي منه باقي
واللي مش باقي...اتنسى
كنسوه الكناسين بالمكنسة
ييجي دور لحظة أسى
أنا برضه كمان نسيت

والشوارع حواديت
حودايه الحب فيها
وحودايه...عفاريت
اسمعي يا حلوة لما أضحكك

الشارع دا أوله بساتين
وآخره حيطة سد
ليا فيه قصة غرام ماحكيتش عنها لأي حد
من طرف واحد...وكنت سعيد أوي
بس حراس الشوارع حطوا للحدودته حد

الشوارع حواديت
حودايه الحب فيها
وحودايه...عفاريت
اسمعي يا حلوة لما أضحكك

الشارع دا شفتك إنتي ماشية فيه
لابسة جيب...وبلوزة وردي
وعاملة ديل حصان وجيه
اتجاهك اتجاهي...مشينا ليه
والشارع دا زحام وتيه
بس لازم نستميت
والشوارع حواديت
حودايه الحب فيها
وحودايه...عفاريت
واضحكي يا حلوة لما اسمّعك

صلاح جاهين ملف كامل
Amany Ezzat غير متواجد حالياً  
07-03-2014, 05:36 AM   #32
Amany Ezzat
vip
Crown5
 
تاريخ التسجيل: Jan 2014
الدولة: مصر
المشاركات: 6,586

كدا جمعنا عدد كبير من الأغانى للراحل العظيم
لكن ابداعاته لا حصر لها
المسرحيات:
أبدع صلاح جاهين فى مجال المسرحيات فكتب سيناريو وأغانى مسرحيات:
* الليلة الكبيرة.
*الشاطر حسن.
*حمار شهاب الدين.
*صحصح لما ينجح.
*قاهر الأباليس مع العروسة والعريس.
*الفيل النونو الغلباوى.
*القاهرة فى ألف عام.

كذلك قدم أغانى وأشعار مسرحيات:
*إيزيس.
*الحرافيش.

مجال الترجمة، قام صلاح جاهين بترجمة بعض المسرحيات العالمية مثل:
*الإنسان الطيب
*دائرة الطباشير القوقازية

السينما والتلفزيون:

أولا :السيناريو:
قام صلاح جاهين بكتابة العديد من السيناريوهات للسينما منها:
*خللى بالك من زوزو.
*أميرة حبى أنا.
*عودة الابن الضال.
*شفيقة ومتولى.

وللتلفزيون:

*سيناريو مسلسل "هو وهى"
*فوازير رمضان: "عروستى"، و"الخطبة".
*لغز الملكة شهرزاد.
*استعراض الأسانسير.
*استعراض اللعبة.
*سيناريو مسلسل 4 بنات + ولد

وللإذاعة:

*أغانى مسلسل رصاصة فى القلب.
*مسلسل "الزير وغطاه" عن قصة حياته.

ثانيا :التمثيل

قام صلاح جاهين ببعض الأدوار الصغيرة فى عدد قليل من الأفلام مثل:
*جميلة بوحريد.
*اللص والكلاب.
*شهيدة العشق الإلهى عام 1962.
*لا وقت للحب عام 1963
*موت أميرة.
* المماليك عام 1965

ثالثا: الإنتاج السينيمائى

أنتج صلاح جاهين العديد من الأعمال للسينما والتلفزيون:

السينما:
*المتوحشة.
*"خللى بالك من زوزو" بالاشتراك مع المنتج تكفور أنطونيان.1972
*أميرة حبى أنا.

التلفزيون:
*لغز الملكة شهرزاد.
*فيلم تلفزيونى قصير.
*فيلم هاشم وروحية كمنتج منفذ.



و من آراء بعض كبار الفنانين فيه :

قال عنه احسان عبد القدوس:

" كانت طاقة صلاح جاهين الفنيه تدفعه الى ممارسة كثير من الفنون ،
كان يرسم الكاريكاتير ، و يؤلف الاغانى و المسرحيات و السيناريوهات ،
و كان موسيقيا يضع الألحان ، و يقوم بالتمثيل على المسرح و أمام الكاميرا ،
و كان ناجحاً نجاحاً باهراً فى كل هذه الاعمال "

قال عنه الكاتب أحمد بهجت:

"كان صلاح جاهين شمساً تشع بالفرح رغم أن باطنه كان ليلاً من الأحزان العميقة ،
و كان يدارى أحزانه و يخفيها عن الناس ،
و يصنع منها ابتسامه ساخره و يظهر على الناس بوجهه الضاحك كل يوم "


قال الكاتب الصحفي فتحي غانم :

«إنه شاعر عمره خمسة آلاف عام»..

وقال عنه الدكتور لويس عوض:

«كان صلاح جاهين متعدد المواهب بدرجة لم يسبق لها مثيل في تاريخ الفنون والآداب المصرية،
كان في تقديري أعظم رسام كاريكاتيري عرفته مصر في كل تاريخها
وكان أعظم شاعر بالعامية عرفته مصر منذ بيرم التونسي،
وكان مخرجا وممثلا وملحنا ومؤديا كشعراء الربابة..
ومع ذلك فلن يذكر أحد إخراجه ولا تمثيله ولا تلحينه،
وإنما سيبقى منه عبر القرون للفن المصري رسمه الكاريكاتيري
وللأدب المصري شعره العامي.. وسيبقى قبل هذا وذاك
من صلاح جاهين توهجه الوطني وإيمانه بالجماهير».

وقال عنه الدكتور يوسف إدريس:

«أخطر ما عرفته حقيقة عن هذا الشاعر أن في قلبه للعالم حبا،
وللناس في وجدانه مكانة ما صادفتهما في الشعراء
من مختلف المذاهب والعصور والألوان إلا نادرًا،
وأروع ما في هذا الحب أن الشاعر قادر على التعبير عنه».

وقال عنه الفنان زهدي:

«كان صلاح جاهين في عالم الفكر معملًا جبارًا
يفوق الأجهزة الالكترونية الحديثة غزارة وفيضانا وكأنه شلال فكري يهدر في جريانه»

و أعلنه الفنان جورج البهجورى ملكاً على عرش الكاريكاتير


صلاح جاهين ملف كامل
Amany Ezzat غير متواجد حالياً  
إضافة رد

مواقع النشر (المفضلة)

الكلمات الدلالية (Tags)
ملف, جاهين, سلاح, كامل

أدوات الموضوع
انواع عرض الموضوع

ocllapseimg_forumrules تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

ward2u المواضيع المتشابهه
الموضوع كاتب الموضوع المنتدى مشاركات آخر مشاركة
رباعيات صلاح جاهين مرتبه ابجديا Amany Ezzat منتدى ثقافي موضوعات ثقافية عامة خواطر شعر سيرة شعراء 21 05-20-2016 11:47 PM
قصاقيص ورق صلاح جاهين هند منتدى ثقافي موضوعات ثقافية عامة خواطر شعر سيرة شعراء 14 04-10-2012 02:00 PM
عناوين جرانين المستقبل(صلاح جاهين) سماالمجد منتدى ثقافي موضوعات ثقافية عامة خواطر شعر سيرة شعراء 1 05-12-2011 10:12 AM
اشعار صلاح جاهين على اسم مصر القطه الشقيه منتدى ثقافي موضوعات ثقافية عامة خواطر شعر سيرة شعراء 6 03-14-2010 11:18 PM
صلاح جاهين الشاعر الجميل العمدة منتدى ثقافي موضوعات ثقافية عامة خواطر شعر سيرة شعراء 4 04-24-2008 06:35 PM


الساعة الآن 07:21 AM.


Powered by vBulletin® Version 3.8.9
Copyright ©2000 - 2017, vBulletin Solutions, Inc