منتديات ورد للفنون التشكيلية و اليدوية  

العودةالعودة   منتديات ورد للفنون التشكيلية و اليدوية > ورد للفنون منتديات عامة > منتدى ثقافي موضوعات ثقافية عامة خواطر شعر سيرة شعراء

منتدى ثقافي موضوعات ثقافية عامة خواطر شعر سيرة شعراء منتدى ثقافي موضوعات ثقافية خواطر سيرة شعراء اجمل قصائد

06-09-2014, 11:10 PM   #1
Amany Ezzat
vip
Crown5
 
تاريخ التسجيل: Jan 2014
الدولة: مصر
المشاركات: 6,586
رباعيات صلاح جاهين مرتبه ابجديا

Facebook Twitter Google LinkedIn vkontakte messenger Digg

basmala

السلام عليكم ورحمة الله وبركاته
أسعد الله صباحكم أهل ورد الغاليين
موضوعى اليوم عن شخصية مصرية حتى النخاع
إنه الراحل العظيم
صلاح جاهين

أسطورة مصرية نادرة الوجود عشق الصعب وطوع المستحيل
عشق فنه فعشقه الناس، فكان ريشة ترسم أرواحهم قبل صورهم.
لقد كان ضميرهم ينبههم ويضحكهم على أحزانهم قبل أفراحهم،
ببساطته وتلقائيته فى التعبير .
إليكم أحبتى رباعياته مرتبة أبجديا

حرف الالف


احسن ما فيها العشق و المعشقه

أحسن ما فيها العشق والمعشقة
وشويتين الضحك والتريقة
شفت الحياة، لفيت، لقيت الألذ
تغييرها، وده يعنى التعب والشقا

عجبى !!



اخطفني يالي تحبني ع الحصان

إخطفنى ياللى تحبنى ع الحصان
الدنيا قالت يوم فى ماضى الزمان
إخطفنى ياللى تحبنى ع الفرس
الدنيا قالت . . قم خطفها الشيطان

عجبى !!



الارض شوك ايوه لكن هايش

الأرض شوك أيوه لكين هايش
والحمرة مش يعنى الطريق حايش
دى دمنا السيال . وبشرة خير
ان انتى عايشه . وان أنا عايش

عجبى !!



ازاي شبابنا يقوم و ياخد دوره

ازاى شبابنا يقوم وياخد دوره
من غير صراخ يئذيه ويجرح زوره
يا هلترى أحسن له يقعد ساكت
أو ينترك ولو خرج عن طوره ؟

عجبى !!



اعرف عيون هي الجمال و الحسن

أعرف عيون هى الجمال والحسن
واعرف عيون تاخد القلوب بالحضن
وعيون مخيفة وقاسية وعيون كتير
وباحس فيهم كلهم بالحزن

عجبى !!



اقلع غماك يا تور و ارفض تلف

إقلع غماك يا تور وارفض تلف
إكسر تروس الساقية واشتم وتف
قال : بس خطوة كمان . . وخطوة كمان . .
يا اوصل نهاية السكة يا البير يجف

عجبى !!



انا شاب و لكن عمري و لا الف عام

أنا شاب لكن عمرى ولا ألف عام
وحيد ولكن بين ضلوعى زحام
خايف ولكن خوفى منى أنا
أخرس ولكن قلبى مليان كلام

عجبى !!



انا كل يوم اسمع

أنا كل يوم أسمع . . فلان عذبوه
أسرح فى بغداد والجزاير واتوه
ما اعجبش م اللى يطيق بجسمه العذاب
واعجب من اللى يطيق يعذب أخوه

عجبى !!



انا قلبي كان شخشيخه

أنا قلبى كان شخشيخة أصبح جرس
جلجلت به صحيوا الخدم والحرس
أنا المهرج . . قمتو ليه خفتو ليه
لاف إيدى سيف ولا تحت منى فرس

عجبى !!



انا اللي عشت

انا الذى عشت الزمن مضيعة
بروح حزينة معفنة مضعضعه
زرعت شجرة سنط لجل انجرح
لقيتها شعر البنت ومفرعه

عجبى !!



انا اللي عمري

انا الذى عمرى اشتياق فى اشتياق
وقطر داخل فى محطة فراق
قصدت نبع السم وشربت سم
من كتر شوقى وعشمى فى الترياق

عجبى !!



انا اللي بالامر

أنا اللى بالأمر المحال اغتوى
شفت القمر نطيت لفوق فى الهوا
طلته ما طلتوش إيه انا يهمنى
وليه … ما دام بالنشوة قلبى ارتوى

عجبى !!



انا اله الوجد

أنا إله الوجد رب الهيام
أضرب بسهم الوهم وهم الغرام
وهم الغرام من كتر ما هو لذيذ
رشقت انا ف صدرى جميع السهام

عجبى !!



انا قلبي كوره

أنا قلبى كورة . . والفراودة أكم
ياما اتنطح وانشاط .. وياما اتعكم
واقول له كل ح ينتهى فى المعاد
يقول بساعتك ؟ والا ساعة الحكم ؟

عجبى !!



انا قلبي كوكب

أنا قلبى كوكب وانطلق فى المدار
حواليكى يا محبوبتى يا نور ونار
يلف مهما يلف مابيكتفيش
وتمللى نصه ليل ونصه نهار

عجبى !!



انا قلت كلمه

أنا قلت كلمة وكان لها معنيين
كما بطن واحده وتوأمين زين
وشينلو دنيا شر . . التوأم الخير يموت
لو دنيا خير . . الشر ح يعيش منين ؟

عجبى !!



انا كانلي اب

أنا كانلى أب . وكان رئيس محكمة
ستين سنة . فى قضية واحدة اترمى
ستين سنة وطلع براءة وخرج
يشكى الحياة والموت لرب السما

عجبى !!



انا كنت شيىء

أنا كنت شىء وصبحت شىء ثم شىء
شوف ربنا . . قادر على كل شىء
هز الشجر شواشيه ووشوشنى قال :
لابد ما يموت شىء عشان يحيا شىء

عجبى !!



انسان ايا انسان

إنسان أيا إنسان ما أجهلك
ما أتفهك فى الكون وما أضألك
شمس وقمر وسدوم وملايين نجوم
وفاكرها يا موهوم مخلوقه لك ؟

عجبى !!



انشد يا قلبي

إنشد يا قلبى غنوتك للجمال
وارقص فى صدرى من اليمين للشمال
ما هوش بعيد تفضل لبكره سعيد
ده كل يوم فيه ألف ألف احتمال

عجبى !!



اه لو انا و محبوبي

آه لو أنا ومحبوبى جزنا الفضى
فى سفينة وحدينا . . وأشيا رضا
ساعة صفا تعجبنا نرجع لها
والهم قبل ما ييجى … يبقى مضى

عجبى !!



اهوى الهوى

أهوى الهوى وهمس الهوى فى العيون
وبسمة المغرم . ودمعه الحنون
وزلزلات الحب نهد الصبا
اكون أنا المحبوب . أو لا أكون

عجبى !!



اوصيك يا ابني

أوصيك يا إبنى بالقمر والزهور
أوصيلك بليل القاهرة المسحور
وإن جيت فى بالك .. إشترى عقد فل
لأى سمرا … وقبرى إوعك تزور

عجبى !!



اوقات افوق

اوقات افوق ويحل عنى غبايا
واشعر كأنى فهمت كل الخبايا
وافتح شفايفى عشان أقول الدرر
ما أقولش غير حبة غزل فى الصبايا

عجبى !!



ايديا في جيوبي

إيديا فى جيوبى وقلبى طرب
سارح فى غربة بس مش مغترب
وحدى لكين ونسان وماشى كده
وبابتعد … ما اعرفش … أو باقترب

عجبى !!



ايش تطلبي

إيش تطلبى يا نفسى فوق كل ده
حظك بيضحك وانتى متنكدة
ردت قالت لى النفس : قول للبشر
ما يبصوليش بعيون حزينة كده

عجبى !!



ايه اللي خدته

إيه اللى خدته من مرور السنين
يا قلبى الا دمعتك والأنين
بتئن وبتفرح وترجع تحن
مع إن مش كل البشر فرحانين

عجبى !!



ايوب رماه البين

أيوب رماه البين بكل العلل
سبع سنين مرضان وعنده شلل
الصبر طيب . . صبر أيوب شفاه
بس الأكاده مات بفعل الملل

عجبى !!
Amany Ezzat غير متواجد حالياً  
06-09-2014, 11:16 PM   #2
Amany Ezzat
vip
Crown5
 
تاريخ التسجيل: Jan 2014
الدولة: مصر
المشاركات: 6,586

حرف الباء


بحر الحياه

بحر الحياه مليان بغرقى الحياه
صرخت خش الموج فى حلقى ملاه
قارب نجاه ! . . صرخت قالوا مفيش
غير بس هو الحب قارب نجاه

عجبى !!



بره القزاز

بره القزاز كان غيم وأمطار وبرق
ما يهمنيش – أنا قلت – ولا عندى فرق
غيرت رأيى بعد ساعة زمان
وكنت فى الشارع … وفى الجزمة خرق

عجبى !!



البط شال

البط شال عدى الجبال والبحور
ياما نفسى اهج … أحج ويا الطيور
أوصيك يا ربى لما اموت … والنبى
ما تودنيش الجنة … للجنة سور

عجبى !!



بلياتشو

بلياتشو قال إيه بس فايدة فنونى ؟
وتلات وقق مساحيق بيلونونى
والطبل والزمامير وكتر الجعير
إذا كان جنون زبونى زاد عن جنونى

عجبى !!



بين موت و موت

بين موت وموت . . بين النيران والنيران
ع الحبل ماشيين الشجاع والجبان
عجبى علادى حياة . . ويا للعجب
إزاى أنا – ياتخين – بقيت بهلوان

عجبى !!



حرف التاء


تسلم يا غصن الخوخ

تسلم يا غصن الخوخ يا عود الحطب
ييجى الربيع . . تطلع زهورك عجب
وانا ليه بيمضى ربيع وييجى ربيع
ولسه برضك قلبى حتة خشب

عجبى !!



حرف الجيم


جالك اوان و عرفت

جالك أوان وعرفت مشى الجنايز
كيف شفتها يا عبد رب اللذايذ
قال : شفت شيل بالحيل فقير أو أمير
كما شالوا فى الخمامير فواضى القزايز

عجبى !!



جالك اوان و وقفت

جالك أوان ووقفت موقف وجود
يا تجود بده يا قلبى يا بده تجود
ما حد يقدر يبقى على كل شىء
مع إن عجبى كل شىء موجود

عجبى !!



حرف الحاء


حاسب من الاحزان

حاسب من الأحزان وحاسب لها
حاسب على رقابيك من حبلها
راح تنتهى ولابد راح تنتهى
مش انتهت أحزان من قبلها ؟

عجبى !!



حبيت.. لكن

حبيت . . لكن حب من غير حنان
وصاحبت لكن صحبه ما لهاش أمان
رحت لحكيم واكتر لقيت بلوتى
إن اللى جوه القلب مش ع اللسان

عجبى !!



حتة محاره

حتة محارة وجدتها فى يوم لقية
قالت لى شوف كيف الطبيعة شقية ؟
نظرت للكهف اللى فيها ولقيت
إن الطبيعة كمان … لا أخلاقية

عجبى !!



حدوته عن جعران

حدوته عن جعران وعن خنفسه
اتقابلوا حبوا بعض ساعة مسا
ولا قال لهم حد اختشوا عيب حرام
ولا حد قال دى علاقة متدنسه

عجبى !!



حقرا

حقرا وفوق كوكب حقير محتقر
فى الكون تكون دنياكو إيه يا بقر
رملايه من صحرا؟ .. لكين إيش تقول
والكون بحاله جوه عقل البشر

عجبى !!



الحلو يم اليم

الحلو يم اليم صابح رايح
سارح فى حضن الميه سابح سايح
الحلو داب فى البحر . . قلت أدوقه
وجدت لسه البحر برضك مالح

عجبى !!



حرف الخاء


خرج ابن ادم

خرج ابن آدم م العدم قلت : ياه
رجع ابن آدم للعدم قلت : ياه
تراب بيحيا . . وحى بيصير تراب
الأصل هو الموت والا الحياة ؟

عجبى !!



خوض معركتها

خوض معركتها زى جدك ما خاض
صالب وقالب شفتك بامتعاض
هى كده . . ما تنولش منها الأمل
غير بعد صد ورد ووجاع مخاض

عجبى !!



حرف الدال


دخل الربيع

دخل الربيع يضحك لقانى حزين
نده الربيع على إسمى لم قلت مين
حط الربيع أزهاره جنبى وراح
وإيش تعمل الأزهار للميتين

عجبى !!



دخل الشتا

دخل الشتا وقفل البيبان ع البيوت
وجعل شعاع الشمس خيط عنكبوت
وحاجات كتير بتموت فى ليل الشتا
لكن حاجات أكتر بترفض تموت

عجبى !!



الدنيا اوضه

الدنيا أوده كبيره للانتظار
فيها ابن آدم زيه زى الحمار
الهم واحد . . والملل مشترك
ومفيش حمار بيحاول الإنتحار

عجبى !!



الدنيا صندوق

الدنيا صندوق دنيا . دور بعد دور
الدكة هى . وهى كل الديكور
يمشى اللى شاف . ويسيب لغيره مكان
كان عربجى أو كان امبراطور

عجبى !!



الدنيا من غير ربيع

الدنيا من غير الربيع ميته
ورقة شجر ضعفانه مفتفته
لأ يا جدع غلطان تأمل وشوف
زهر الشتا طالع فى عز الشتا

عجبى !!



دي مذكرات

. . دى مذكرات وكتبتها من سنين
فى نوته زرقا لون بحور الحنين
عترت فيها . . رميتها فى المهملات
وقلت أما صحيح كلام مخبولين

عجبى !!



حرف الراء


رقاصه خرسا

رقاصة خرسا ورقصه من غير نغم
دنيا . . يا مين يصالحها قبل الندم
ساعتن تهز بوجهها يعنى لا
يترجرجوا نهديها يعنى نعم

عجبى !!



رقبة قزازه

رقبة قزازه وقلبى فيها انحشر
شربت كاس واتنين وخامس عشر
صاحبت ناس م الخمرة ترجع وحوش
وصاحبت ناس م الخمرة ترجع بشر

عجبى !!



حرف الزاي


زحام و ابواق

زحام وأبواق سيارات مزعجة
إللى يطول له رصيف . . يبقى نجا
لو كنت جنبى يا حبيبى أنا
مش كنت اشوف إن الحياة مبهجه ؟

عجبى !!
Amany Ezzat غير متواجد حالياً  
06-09-2014, 11:19 PM   #3
Amany Ezzat
vip
Crown5
 
تاريخ التسجيل: Jan 2014
الدولة: مصر
المشاركات: 6,586

حرف السين


سرداب

سرداب فى مستشفى الولاده طويل
صرخات عذاب ورا كل باب وعويل
. . وفى الطريق متزوقين البنات
متزوقين للحب والمواويل

عجبى !!



سلام سلام

سلام سلام . . سلام سلام .. سلام
كلام كلام . . كلام كلام . . كلام
هز الورق يا صاحبى كدهوه
يطلع كلام سلام . وسلام كلام

عجبى !!



السم

السم لو كان فى الدواء . . منين يضر ؟
والموت . . ولو لعدونا . . منين يسر ؟
حط القلم فى الحبر واكتب كمان
. . والعبد للشهوات . . منين هو حر ؟

عجبى !!



سمعت نقطة ميه

سمعت نقطة ميه جوه المحيط
بتقول لنقطة ماتنزليش فى الغويط
أخاف عليكى م الغرق . . قلت انا
ده اللى يخاف م الوعد يبقى عبيط

عجبى !!



سنوات و فايته

سنوات وفايته عليا فوج بعد فوج
واحدة خدتنى إبن والتانية زوج
والتالتة أب خدتنى والرابعة إيه
إيه يعمل إللى بيحدفه موج لموج ؟

عجبى !!



سهير ليالي

سهير ليالى وياما لفيت وطفت
وف ليله راجع فى الضلام قمت شفت
الخوف . . كأنه كلب سد الطريق
وكنت عاوز أقتله . . بس خفت

عجبى !!



حرف الصاد


صوتك

صوتك يا بنت الإيه كأنه بدن
يرقص يزيح الهم يمحى الشجن
يا حلوتى وبدنك كأنه كلام
كلام فلاسفه سكروا نسيوا الزمن

عجبى !!



حرف الضاد


الضحك

الضحك قال يا سم ع التكشير
أمشير وطوبة وانا ربيعى بشير
مطرح ما باظهر بانتصر ع العدم
انشالله أكون رسماية بالطباشير

عجبى !!



ضريح رخام

ضريح رخام فيه السعيد اندفن
وحفره فيها شريد من غير كفن
مريت عليهم . . قلت يا للعجب
لاتنين ريحتهم فيها نفس العفن

عجبى !!



حرف الطاء


طال انتظاري

طال انتظارى للربيع يرجع
والجو يدفا والزهور تطلع
عاد الربيع عارم عرمرم شباب
إيه اللى خلانى ابتديت افزع ؟

عجبى !!



حرف الظاء


ظهر المسيح

ظهر المسيح الحى على سفح ربوة
ونزل بهالة الضى وقعد فى قهوة
بصوا . تعالوا . قالوا خليه فى حاله
الناس فى حالهم يا بنى . مالهمش دعوة

عجبى !!



حرف العين


ع الجسر

ع الجسر فت الصبح تحت الضباب
بين اللى لسه بينغرس واللى طاب
ما اهتز قلبى لنبت طالع جديد
قد اللى ماشى . وتحت باطه الكتاب

عجبى !!



عاد الربيع

عاد الربيع كأنه طعم الحب
والحب نار جوه العروق بتصب
اتمتع ازاى بيه وانا متقطع
من كتر خوفى لا فى الخطيئة يطب ؟

عجبى !!



عبثا بقول

عبثاً باقول واقرا فى سورة عبس
ماتلومش حد إن ابتسم أو عبس
فيه ناس تقول الهزل يطلع جد
وناس تقول الجد يطلع عبث

عجبى !!



عجبتني كلمه

عجبتنى كلمة من كلام الورق
النور شرق من بين حروفها وبرق
حبيت أشيلها ف قلبى . . قالت حرام
ده انا كل قلب دخلت فيه اتحرق

عجبى !!



عجبي عليك

عجبى عليك . . عجبى عليك يا زمن
يا بو البدع يا مبكى عينى دماً
إزاى أنا أختار لروحى طريق
وانا اللى داخل فى الحياة مرغماً

عجبى !!



عجبي على العجب

عجبى على العجب العجيب العجاب
لما الحقيقة تطل بعد احتجاب
وتروق وتحلا وفجأة تصبح مفيش
كمثل طراطيش بحر ياما خد وجاب

عجبى !!



العشب طاطا

العشب طاطا للنسايم ونخ
أخضر طرى مالهش فى الحسن أخ
عصفور عبيط أنا . . غاوى بهجة وغنا
ح انزل هنا . . وانشا لله هبرنى فخ

عجبى !!



علقت في المسمار

علقت فى المسمار قناع مهزلة
ومعاه قناع مأساة بحزنه ابتلا
بصيت لقيتهم يشبهوا بعضهم
واهو ده العجب ياولاد . وإلا فلا

عجبى !!



علم اللوع

علم اللوع اضخم كتاب فى الأرض
بس اللى يغلط فيه يجيبه الأرض
أما الصراحة فأمرها ساهل
لكن لا تجلب مال ولا تصون عرض

عجبى !!



على بعد مليون ميل

على بعد مليون ميل من أرضنا
من الفراغ الكونى بصيت أنا
لا شفت فرق ما بين جبال أو بحور
ولا شفت فرق ما بين عذاب أو هنا

عجبى !!



على رجلي دم

على رجلى دم . . نظرت له ما احتملت
على إيدى دم . . سألت : ليه ؟ لم وصلت
على كتفى دم وحتى على راسى دم
أنا كلى دم . . قتلت ؟ . . والا اتقتلت ؟

عجبى !!



عيد

عيد . والعيال اتنططوا ع القبور
لعبوا استغماية . ولعبوا بابور
وباللونات . ونايلونات شفتشى
والحزن ح يروح فين جنب السرور

عجبى !!



عيني رأت عصفور

عينى رأت عصفور ووياه ابنه
بيحدفه فى الريح وياخده ف حضنه
نوبتين وتالت نوبه – عجبى عليهم
كانوا سوا بيرفرفوا ويغنوا

عجبى !!



عيني رأت مخلوق

عينى رأت مخلوق فى غاية البشاعة
أنا قلت له لما تأملته ساعة :
اللذة والموت علموك اللزج
وانا علمونى الفلسفة والشجاعة

عجبى !!



عيني رأت مولود

عينى رأت مولود على كتف أمه
يصرخ تهنن فيه يصرخ تضمه
يصرخ تقول يا بنى ما تنطق كلام
ده اللى ما يتكلمش يا كتر همه

عجبى !!



حرف الغين


غدر الزمان

غدر الزمان يا قلبى ما لهوش أمان
وحاييجى يوم تحتاج لحبة إيمان
قلبى ارتجف وسألنى . . أأمن بإيه ؟
أأمن بإيه محتار بقالى زمان

عجبى !!



غمست سنك

غمست سنك فى السواد يا قلم
علشان ما تكتب شعر يقطر ألم
مالك جرالك إيه يا مجنون … وليه
رسمت وردة وبيت وقلب وعلم

عجبى !!



غمض عنيك

غمض عينيك وارقص بخفة ودلع
الدنيا هى الشابة وانت الجدع
تشوف رشاقة خطوتك تعبدك
لكن انت لو بصيت لرجليك . . تقع

عجبى !!



غسل المسيح قدمك

غسل المسيح قدمك يا حافى القدم
طوبى لمن كانوا عشانك خدم
صنعت لك نعليك أنا يا أخى
مستنى إيه . . ما تقوم تدوس العدم

عجبى !!



غطس و قب الموج

غطس وقب الموج نهود بمبى
من ألف جيل جمالات ماتعلم بى
يا قلبى عيب دول أمهاتنا القدام
استغفر الله العظيم ربى

عجبى !!



حرف الفاء


في يوم صحيت

. . فى يوم صحيت شاعر براحة وصفا
الهم زال والحزن راح واختفى
خدنى العجب وسألت روحى سؤال
أنا مت ؟ . . والا وصلت للفلسفه ؟

عجبى !!



الفيلسوف

الفيلسوف قاعد يفكر سيبوه
لا تعملوه سلطان ولا تصلبوه
ما تعرفوش إن الفلاسفة يا هوه
اللى يقولوه بيرجعوا يكدبوه ؟

عجبى !!



فتحت شباكي

فتحت شباكى لشمس الصباح
ما دخلش منه غير عويل الرياح
وفتحت قلبى عشان أبوح بالألم
ما خرجش منه غير محبه وسماح

عجبى !!



فوق تحت

فوق تحت . ورا قدام . يمين شمال
فى الجو . تحت المية أو فى الرمال
طلب الكمال يحرم على الممكن
والممكنات دول محرومين م الكمال

عجبى !!



فارس وحيد

فارس وحيد جوه الدروع الحديد
رفرف عليه عصفور وقال له نشيد
منين منين . . ولفين لفين يا جدع
قال من بعيد ولسه رايح بعيد

عجبى !!
Amany Ezzat غير متواجد حالياً  
06-09-2014, 11:23 PM   #4
Amany Ezzat
vip
Crown5
 
تاريخ التسجيل: Jan 2014
الدولة: مصر
المشاركات: 6,586

حرف القاف


قالوا الشقيق

قالوا الشقيق بيمص دم الشقيق
والناس ما هياش ناس بحق وحقيق
قلبى رميته وجبت غيره حجر
داب الحجر . . . ورجعت قلبى رقيق

عجبى !!



قلبي عليل

قلبى عليل يا ناس وفى الكاس دواه
مديت له إيدى شربت م اللى حواه
جنبى الشمال خف . . اليمين اتوجع
وإيه يداوى الكبد م اللى كواه

عجبى !!



قاعده قناني الخمر

قاعدة قنانى الخمر ساكتة وساهية
مع ابن آدم فى الشبه متناهية
مفيش كده روقان فى لحظة تشوفهم
وبعدها بلحظة يودوا ف داهية


عجبى !!



قطي العزيز

قطى العزيز راقد على الكنبات
فى نوم لذيذ . . وبيلحس الشنبات
وانا كل عين فنجان مدلدق قلق
صدق اللى قال إن الحياة منابات

عجبى !!



قالوا السياسه

قالوا السياسة مهلكة بشكل عام
وبحورها يابنى خشنة مش ريش نعام
غوص فيها تلقى الغرقانين كلهم
شيلين غنايم . والخفيف اللى عام

عجبى !!



قالوا بن ادم

قالوا ابن آدم روح وبدنه كفن
قالوا لأ بدن . قالوا لأ ده روح فى بدن
رفرف فؤادى مع الرايات فى الهوا
أنا قلت لأ روح فى بدن فى وطن

عجبى !!




حرف الكاف


كان فيه زمان

كان فيه زمان سحلية طول فرسخين
كهفين عيونها وخشمها بربخين
ماتت . . لكين الرعب لم عمره مات
مع إنه فات بدل التاريخ تاريخين

عجبى !!



كل اللي ف الخماره

كل اللى فى الخمارة صابهم جنون
صبحوا الرجال يتبادلوا كاس المنون
وبدم ونبيت انكتب ع الجدار
"يا ميت ندامة ع اللى قلبه حنون"

عجبى !!



كروان جريح

كروان جريح مضروب شعاع م القمر
سقط من السموات فؤاده انكسر
جريت عليه قطه عشان تبلعه
أتاريه خيال شعراء ومالهوش أثر

عجبى !!



كيف شفت قلبي

كيف شفت قلبى والنبى يا طبيب
همد ومات والا سامع له دبيب
قاللى لقيته مختنق بالدموع
وما لوش دوا غير لمسه من إيد حبيب

عجبى !!



كان فيه قمر

كان فيه قمر كأنه فرخ الحمام
على صغيره دق شعاع شق الغمام
أنا كنت حاضر قلت له ينصرك
إشحال لما ح تبقى بدر التمام

عجبى !!



كرباج سعاده

كرباج سعاده وقلبى منه انجلد
رمح كأنه حصان ولف البلد
ورجع لى نص الليل وسألنى . . ليه
خجلان تقول انك سعيد يا ولد

عجبى !!



كام اشتغلت يا نيل

كام اشتغلت يا نيل فى نحت الصخور
مليون بئونه وألف مليون هاتور
يا نيل أنا ابن حلال ومن خلفتك
وليه صعيبه على بس الأمور

عجبى !!




حرف اللام


ليه يا حبيبتي

ليه يا حبيبتى ما بيننا دايماً سفر
ده البعد ذنب كبير لا يغتفر
ليه يا حبيبتى ما بيننا دايماً بحور
أعدى بحر ألاقى غيره اتحفر

عجبى !!



لو فيه سلام

لو فيه سلام فى الأرض وطمان وأمن
لو كان مفيش ولا فقر ولا خوف وجبن
لو يملك الانسان مصير كل شىء
انا كنت أجيب للدنيا ميت ألف إبن

عجبى !!



لا تجبر الانسان

لا تجبر الإنسان ولا تخيره
يكفيه ما فيه من عقل بيحيره
اللى النهارده بيطلبه ويشتهيه
هو اللى بكره ح يشتهى يغيره

عجبى !!



لولا اختلاف الرأي

لولا اختلاف الرأى يا محترم
لولا الزلطتين ما لوقود انضرم
ولولا فرعين ليف سوا مخاليف
كان بيننا حبل الود كيف اتبرم ؟

عجبى !!



حرف الميم


مع ان كل الخلق

مع إن كل الخلق من أصل طين
وكلهم بينزلوا مغمضين
بعد الدقايق والشهور والسنين
تلاقى ناس أشرار وناس طيبين

عجبى !!



مرغم عليك

مرغم عليك يا صبح مغصوب يا ليل
لادخلتها برجليا ولا كانلى ميل
شايلنى شيل دخلت انا فى الحياة
وبكره ح اخرج منها شايلنى شيل

عجبى !!



مهبوش

مهبوش بخربوش الألم والضياع
قلبى ومنزوع م الضلوع انتزاع
يا مرايتى يا اللى بترسمى ضحكتى
يا هل ترى ده وش والا قناع

عجبى !!



ما حد في الدنيا

ما حد فى الدنيا دى واخد جزاته
ولا حد بيفكر فى غير لذاذاته
ماتعرفيش يا حبيبتى . . أنا وانتى مين ؟
إنتى عروس النيل . . وانا النيل بذاته

عجبى !!



من بين شقوق الشيش

من بين شقوق الشيش وشقشقت لك
مع شهقة العصافير وزقزقت لك
نهار جديد انا . . قوم نشوف نعمليه
انا قلت يا ح تقتلنى . . يا ح اقتلك

عجبى !!



مزيكه هاديه

مزيكه هاديه الكون فيها انغمر
وصيف وليل وعقد فل وسمر
يا هل ترى الناس كلهم مبسوطين
ويا هل ترى شايفين جمال القمر ؟

عجبى !!



مرحب ربيع

مرحب ربيع مرحب ربيع مرحبه
يا طفل يا للى ف دمى ناغا وحبا
علشان عيونك يا صغنن هويت
حتى ديدان الأرض والأغربه

عجبى !!



منين اجيبها

منين أجيبها كلمه متألمة
لعبية فايره حايره ومصممة
منين أجيب كلمة تكون بنت أرض
تشفى اللى ما شفاهوش كلام السما

عجبى !!



الموج تلول

الموج تلول تهبط وتطلع تلول
يا بحر خدنى الشط صاحبك ملول
والا بلاش الشط ح اعمل به ايه
ده ريحته طحلب مهرى وام الخلول

عجبى !!



مانتاش بتلعب ليه

ما انتاش بتلعب ليه يا روح بابا ؟
ولا عسكرى ولا لص فى عصابة ؟
إلعب أسد أو ديب رهيب أو غزال
دى الدنيا فى نهاية المطاف غابة

عجبى !!



مركب ورق

مركب ورق من نفخة تتطوح
ركبتها والكل بيلوح
سوحت فيها اتنين وخمسين سنه
للآن . ولا بتغرق ولا تروح

عجبى !!




حرف النون


نظرت في الملكوت

نظرت فى الملكوت كتير وانشغلت
وبكل كلمة (ليه ؟) و(عشانيه) سألت
اسأل سؤال . . الرد يرجع سؤال
واخرج وحيرتى أشد مما دخلت

عجبى !!



نوح

نوح راح لحاله والطوفان استمر
مركبنا تايهة لسه مش لاقية بر
آه م الطوفان وآهين يا بر الأمان
إزاى تبان والدنيا غرقانة شر

عجبى !!



نظرت فوقي

نظرت فوقى للنجوم وانا ساير
رجليا عترت فى الحفر والحجاير
بقيت أقول وانا ع التراب : يا سلام
مش بس عبره أخذت لكن عباير

عجبى !!



النهد زي الفهد

النهد زى الفهد نط اندلع
قلبى انهبش بين الضلوع وانخلع
ياللى نهيت البنت عن فعلها
قول للطبيعة كمان تبطل دلع

عجبى !!



نقطة مراره

نقطة مرارة كمان على مشروبى
دوبها يا ساقى حسب مطلوبى
طعم الحياة . مش برضه فيها وفيها ؟
ليالى وردى ونهارات خروبى ؟

عجبى !!




حرف الهاء


هات يا زمان

هات يا زمان . وهات كمان يا زمان
غير بسمة الشجعان مامنى يبان
هو اللى داق الفرحة يوم ثورته
يقدر يعود ولا ثانية للأحزان ؟

عجبى !!




حرف الواو


و انا في الضلام

وانا فى الضلام . . من غير شعاع يهتكه
أقف مكانى بخوف ولا أتركه
ولما ييجى النور واشوف الدروب
أحتار زيادة . . أيهم أسلكه ؟

عجبى !!



و الكون ده كيف

والكون ده كيف موجود من غير حدود
وفيه عقارب ليه وتعابين ودود
عالم مجرب فات وقال سلامات
ده ياما فيه سؤالات من غير ردود

عجبى !!



ورا كل شباك

ورا كل شباك ألف عين مفتوحين
وانا وانتى ماشيين يا غرامى الحزين
لو التصقنا نموت بضربة حجر
ولو افترقنا نموت متحسرين

عجبى !!



وقفت بين شطين

وقفت بين شطين على قنطرة
الكدب فين والصدق فين يا ترى
محتار ح اموت . . الحوت خرج لى وقال
هو الكلام يتقاس بالمسطرة ؟

عجبى !!



ولدي نصحتك

ولدى نصحتك لما صوتى اتنبح
ما تخافش من جنى ولا من شبح
وان هب فيك عفريت قتيل إسأله
ما دافعش ليه عن نفسه يوم ما اندبح ؟

عجبى !!



ولدي اليك

ولدى إليك بدل البالون ميت بالون
انفخ وطرقع فيه على كل لون
عساك تشوف بعنيك مصير الرجال
المنفوخين فى السترة والبنطلون

عجبى !!



ولو انضنيت

ولو انضنيت وفنيت وعمرى انفرط
مش عاوز الجأ للحلول الوسط
وكمان شطط وجنون مانيش عاوز
يامين يقول لى الصح فين والغلط ؟

عجبى !!



وقفت ساعة الصبح

وقفت ساعة الصبح باغسل سنانى
قالت لى شايف قوتى ولمعانى ؟
إيش تطلب اليوم منى ضحكة أسد ؟
والا ابتسامة اعلانات أمريكانى ؟

عجبى !!



ورد ف ورق سلوفان

ورد ف ورق سلوفان يا حلوة اهديلك ؟
والا انقله بالطين فى شتلة واجيلك ؟
الأولانى لو وحا بحنانى
عجبى على التانى بإيه يوحيلك

عجبى !!



وسط الحطام

وسط الحطام اتفرجوا يا أنام
تمثال ملك . ومبولة م الرخام
لتنين نحتهم نفس أسطى الحجر
وكانوا ذات يوم كتلتين لسه خام

عجبى !!
Amany Ezzat غير متواجد حالياً  
إضافة رد

مواقع النشر (المفضلة)

أدوات الموضوع
انواع عرض الموضوع

ocllapseimg_forumrules تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

ward2u المواضيع المتشابهه
الموضوع كاتب الموضوع المنتدى مشاركات آخر مشاركة
صلاح جاهين ملف كامل Amany Ezzat منتدى ثقافي موضوعات ثقافية عامة خواطر شعر سيرة شعراء 64 04-21-2017 02:05 PM
قصاقيص ورق صلاح جاهين هند منتدى ثقافي موضوعات ثقافية عامة خواطر شعر سيرة شعراء 14 04-10-2012 02:00 PM
عناوين جرانين المستقبل(صلاح جاهين) سماالمجد منتدى ثقافي موضوعات ثقافية عامة خواطر شعر سيرة شعراء 1 05-12-2011 10:12 AM
اشعار صلاح جاهين على اسم مصر القطه الشقيه منتدى ثقافي موضوعات ثقافية عامة خواطر شعر سيرة شعراء 6 03-14-2010 11:18 PM
صلاح جاهين الشاعر الجميل العمدة منتدى ثقافي موضوعات ثقافية عامة خواطر شعر سيرة شعراء 4 04-24-2008 06:35 PM


الساعة الآن 05:50 PM.


Powered by vBulletin® Version 3.8.9
Copyright ©2000 - 2017, vBulletin Solutions, Inc