عرض مشاركة واحدة
09-23-2010, 12:27 PM   #1
alaaaboabdo
شريك جديد
stars-1-2
 
تاريخ التسجيل: Sep 2010
الدولة: مصر
المشاركات: 9
كعك العيد والكل سعيد

basmala

[]كعك العيد والكل سعيد


يوم الخميس قبل السحور بشوية قامت خناقة بين نبيهة وجوزها
خش التقاها مكشرة وملوية شافت خياله دغري مطت بوزها
ميل على الكرسي القديم واتمدد وقال كفى الله الشر ليه زعلانة؟
قالت له ليه ما احزنش حتى واعدد والطم كمان على قسمتي الندمانة؟
كل الحريم في بيوتها متهنية وانا اللي من دون الحريم متعوسة
قال فهميني المسالة يا ولية قالت له وحياتك لاموت مفروسة
ولع سيجارة وتنه يسفق فيها وحط ايده تحت خده وفكر
آخرتها قال مش تعقلي يا نبيهة قومي سخني لي الأكل لاجل اتسحر
القصد قامت سخنت له الحلة وحطت الصحنين على الطبلية
ضحك وقال اتفضلي باسم الله من إيه يا ستي مكلضمة وملوية
قالت له من فضلك تلم لسانك خللي الليلة دي تفوت بخير وسلامة
هو انت مش راجل وزى جيرانك خليتني حاطه فوق شفا يفي كمامة
إن كان على الكحك اللي راح يحييني لو جه قصادي ادهسه برجليه
بس الفضيحة لما واحدة تجيني وتدور تلسن بين حبايبي عليه
قال كحك إيه واحنا العيال عريانة والعيش باجيبه والغموس بالعافية
ليه نفتخر ونبات بطوننا جعانة دا يبقى تغفيل م الحمار بلا قافية
بدال ما افرق ع الضيوف أرزاقي اكسي العيال دي والا افصل جزمة
بلاش خراب ما تضيقيش أخلاقي وبلاش أمور الفشخرة ف الأزمة
قول كلمة منها وكلمة منه اشتدوا والشر وهوج والخناقة اشتدت
وهما لتنين ف الشتيمة احتدوا اتغاظ وقام لطش وايده اتمدت
نامت نبيهة مكسرة وعدمانة والعلقة كانت في الحقيقة علقة موت
والصبح راحت لامها غضبانة ورت لاخوها الضرب فيها متوت
قام خد له شومة وتنه واخد بعضه وراح لجوزها بين صحابه وهانه
قام جوزها راخر هفه بوكس وعضه وطسه راس طير له صف سنانه
والضرب دار والدم ساح غرقهم واستقتلوا لتنين وباعوا أعمارهم
والخلق قامت بدها تفرقهم والعسكري جه ع البوليس جرجرهم
فاتت ليالي العيد على الرجالة نايمين على الاسفلت في التخشيبة
واجب على الستات تراعي الحالة ولا يخلقوش بالكحك ألف مصيبة
[/]
alaaaboabdo غير متواجد حالياً