عرض مشاركة واحدة
08-19-2010, 09:03 AM   #16
هالة
مراقب عام
Crown5
 
تاريخ التسجيل: Jun 2007
الدولة: القاهرة - الاسكندرية
المشاركات: 26,209

بوذا وتاج الجزيرة

ياصباح الورد على اجمل صحبة ورد
ايه اخباركم اليوم ان شاء الله تكونوا بخير
حبيت اخذ رأيكم النهاردة في جدل محتدم
في بيتنا ...حتقولوا خير ياترى
وحتسألوا بينكم وبين نفسكم ايه حكاية
بوذا وتاج الجزيرة ده هههههههههه
في الاول احب اوضح لكم ان سيدي البيه
موفد في مهمة رسمية لدولة من دول الاتحاد
السوفيتي السابق * مش سفير ولا وزير *
المهم الدولة دي حدود الصين وبالتالي معظم العمالة
هناك من الصين وسيدي البيه مدير المشروع
هناك وعليه في اجازة من اجازاته عاد
ومعاه صندوق كبير ما اكدبش عليكم انا قولت
ده هدية اخر تمام ويعني ممكن تكون واحدة من
طلباتي اللي باطلبها ومش بتيجي يمكن ...
سألت ببراءة ايه ده ؟؟؟ كان الرد نظرات ضاحكة
وقال ده هدية من الصينين في الموقع
انا قولت خير ماكل حاجة عندنا الوقت
بقت من الصين حتى اللي جاي من بره
كمان من الصين المهم انتظرت اشوف ايه
اللي في الصندوق واول ماشوفته ضحكت كثير
وافتكرت تاج الجزيرة ... السلطانية
ههههههههههههههه
للي مايعرفش حدوتة السلطانية اقول لهم كان فيه
اسكافي اسمه مرزوق مراته اعطته سلطانية يشتري
سمن وكان زهقان من الدنيا وقلة الشغل
قال يسافر يدور على شغل خارج بلده
ركب البحر وللاسف غرقت السفينة ومابقى معاه
غير السلطانية ولما رماه الموج على البر كانت
جزيرة قابلوه اهلها واكرموا ضيافته ولما
سألوه عن الهدايا اللي احضرها معاه
امسك بالسلطانية اول ماشافوها قالوا تاج الجزيرة
ورجعوه بلده محمل بالهدايا والمجوهرات
حكي لجاره الطماع حكايته وان سبب السعد السلطانية
سافر جاره للجزيرة محمل بالهدايا وقال يمكن
يرجع باللي احسن منها ... لكن وهو راجع
سلطان الجزيرة قال ان مافيش عندهم اغلى من
تاج الجزيرة يهديه له اول ما سمع الطماع
تاج الجزيرة قال ........ السلطانية
انا قولت كده برضة مافيش اغلى عند الصينين من
تمثال بوذا وهو ده اللي كان قاعد يبص
لي بعيونه الضاحكة داخل الصندوق هههههههه
تمثال مقلبظ حافي القدمين ولما تبص له
غصب عنك تضحك وده المقصود منه
حكي الصينيون لسيدي البيه قصة التمثال
انه لما يكون في بيتك حتكون سعيد
لانك كل ما تبص له حتضحك ... بصراحة قعدت
كام يوم كل ما اشوفه قدامي اضحك لحد
ما في يوم كنت متضايقة قوي وبصيت له وانا بانظفه
ماضحكتش زي كل مرة بالعكس
مسكت الفرشاة اللي بلمعه بيها وضربته على
ام رأسه اصلي كنت فعلا متضايقة والاكثر
من كده قولت لازم اتخلص منه .. المشكلة انه
غالي جدا كقيمة مادية وطبعا غالي عند سيدي البيه
لانه هدية طيب اعمل ايه ..؟؟؟
ألبسه كيس في راسه مثلا علشان مايبصش لي
في الرايحة والجاية ولا اقفل عليه صندوقه ثاني
ولا اشوف له بيعة ولما يجي سيدي البيه يعمل
اللي يعمله ... شوروا عليا في تاج الجزيرة ده
اقصد تمثال بوذا بيني وبينكم انا مش حابة يكون
عندي تمثال لبوذا ايا كان المعنى لكن
ده احساسي هو صحيح عند الصينين حاجة مهمة
هم احرار لكنه لا يعني لي اي شيء سوى
مهارة الصانع في نحت كل التفاصيل
اللي في التمثال

يلا اسيبكم الوقت كفاية رغي
سلام ياحبايب قلبي
__________________

signature

هالة متواجد حالياً