عرض مشاركة واحدة
03-17-2010, 02:19 PM   #8
jassmien
شريك جديد
stars-1-2
 
تاريخ التسجيل: Mar 2010
الدولة: مصر
المشاركات: 21

انا عندى مشكلة و عايزة حد اخذ رئيكم فيها اعمل ايه :

ارجو من سيادتكم التكرم بايجاد حل لى فى المشكلة التالية التى سوف اعرضها على سيادتكم ،
اولا انا بنت وحيدة ماما و بابا فى يوم و انا رايحه الى الشغل
كان فى اثنين كبار ماشين ورايا بالعربية انا خفت جدا و الست شاورت ان انا اقف بس انا وقفت من خوفى ان اعمل حادثة نزلت اتكلمت معايا انا فىالاول فتحت الشباك بس فهى سالتنى انتى مرتبطة و لالا و ان هى ليها ابن عايزة لى عروسة و ان هى شافتنى و انا بركب العربية بتاعتى انه حست ان انا مادبة و هادية لكن انا قولت لها مايصحش تتكلمى و انت واقفة برة و دخلتاها العريبة (انا عارفة ان دة غلط كبير انا عملته بس انا تعاملت معاها باخلاقى ) دخلت و سالتنى انت اسمك ايه و جاوبت عليها و فى كل سوال تساله انا احاول اعرف هى مين هى قالت على اسمها و اسم زوجها بس وان هما مش جيران و مها كانوا جايين فى مشوار و شافونى بس عقبال ما قرروا ان يسالونى عند البيت انا كنت مشيت فهما مشيوا ورايا بس و سالت عن بابا اسمه اية و بتشتغلى فين المهم قالت اية رايك العريس يجى الشغل يشوفك هناك انا رفض طبعا علشان وضعى فى الشركة و ان انا مش بحب كدة و قولتلها لو عايزة تعالى فى البيت و انت عارفة فين فاخذت رقم التليفون و خلاص مشيت
طبعا انا اول ما روحت الشغل كلمت بابا و قولتله ان انا عملت مصيبة و وقفت لناس معرفهاش و اخذت رقم التليفون و كان يوم ما يعلم بى غير ربنا لما روحت
المهم ان كل الافكار السيئة جات لماما ان ممكن يكونوا نصابين و كويس ان هما سابونى من غير ما يعملوا فى حاجة
و بعدين فى اخر الاسبوع الست اتكلمت فى التليفون ماما اللى ردت عليها و ياه كان ماما لاقت الست نزلت فيها استجواب و قفلت فى الكلام معاها لكن الست تحاول تيجى كدة او كدة مش عارفة تاخد حق و لا باطل معاها بس قالتلها خلى بابا يكلم زوجها احسن و كلمه الراجل عرف يتفاهم مع بابا و اتفقوا على ان هما يجوا البيت تانى يوم
المهم بابا وافق و جم
جلسنا و اتكلمنا و كانت جلسة كويسة جدا و طبعا ماما لا يمكن تفوت ان تعاتب الام و الاب على اللى عمله و الناس اعتذت و الموضوع عدا و خلص
المهم العريس دة عمره 36 سنة مهندس كمبيوتر مستقبله كويس جدا و شكله مقبول جدا و روحه حلوة يعنى تقريبا موافقه مبدئية منى و من ماما و بابا و العريس و بابه و مامه و احنى جلسين الاب قال طلبتكم ايه من اول جلسة طبعا بابا قاله مش لما يتعرفوا على بعض الاول طيب كويس هو مسافر السعودية و جاى يومين اصلا علشان يشوفنى بس فبابا مراعاة للظروف دى اتفقوا على ان ياخذ تليفونى علشان نتكلم و ناخذ على بعض زى ما بابا قال
انا مكنتش موافقة على الخطوة دى الى ان احنا نسال عليهم الاول المهم حصل بس و الجلسة عدت على خير و مشيوا و ماما ارتاحت لى و بابا كمان بس انا كنت خايفة اقول رائى علشان ماما متزعلش منى لان انا احتمال اسافر معاه و اسيب ماما و بابا
المهم انا اجلت رائى افصح عنه للاخر
تانى يوم بابا كلمهم ان احنا نرد الزيارة و نروح عندهم بس هما قالو لنهم مشغولين و عندهم فرح فى اليوم دة بس ممكن العريس دة يروح معانا للنادى بس بلاش بتاخر عليهم علشابن الفرح بابا وافق و رحنا النادى و اتكلمنا و طلب من بابا ان نتمشى مع بعض فماما قالت ممكن بس احنا هنمشى وراكم من بعيد هو وافق و قمنا اتمشينا شوية و انا مبسوطة و هو كمان
سالنى انت ارطبتى قبل كدة و وقولتله لا و اتكلمنا فى حاجات كثير
بس رواحنا و تانى يوم سافر السعودية و كلمنى من هناك بس انا علشان دى اول مرة واحد غريب عنى لسة يكلنى فى التليفون ارتبكت جدا
عدى كام يوم و ماما كلمت الام تانى علشان نروح نزرهم قالت لما ينزل مصطفى من السعودية علشان نتقابل كلنا مع بعض
انا مكنتش عايزة بحصل كلام بنا الا لما نعرف عنهم كل حاجة احنا كل اللى عارينه اللى هما قالوا فى الجلسة الاولى فقط
المهم بابا اقنعنى ان هى دى الظروف اللى هو فيها هو مسافر و مفيش فرصة للتعارف و ان بابا ارتحلوا جدا لدرجة ان انا استغربت جدا من جلستين بس هو فعلا مريح جدا من اول جلسة
المهم انا اسفة ان طولت بس فعلا التفاصيل اللى فى اول مهمه علشان هى دى المشكلة
كلنى فى يوم و قال ان هو نازل اجازة يومين و عايز نروح نستقبلوا فى المطار مع باباه و ماماة انا اعترض علشان ملهاش لازمة بس هو كلم بابا و بابا وافق على طول و رحنا المطار و من هناك روحنا البيت عندهم و كان كل حاجة ماشية حلوة جدا و خلاص كانو ها يجوا تانى يوم عندنا و لقراءة الفاتحة علشان انا مش مدياله فرصة يتكلم عادى معايا كل كلمنا عام و بتحفظ شديد بس حصل حاجة صاعقة نزلت علينا
باباه قال فى حاجة لازم اقول عليها قبل ما يحصل حاجة رسمى بنا مصطفى ارتبط قبل كدة كان مجوز واحدة لمدة خمس سنوات و عنده بنتين
بس هو ملوش علاقة بيهم دلوقتى و ان الست التانية دى هى اللى كانت مش كويسة معاه
وان باباه هو اللى يرسل لهم مبلغ هو عمله وديعة فى البنك باسم البنات دى و باباه هو الوصي عليها
و روحنا و احنا ماشين قال لبابا ان هو انسان كريم و كويس و متدين و قاللى فكرة لبكرة و رودوا علينا اما بالموافقة و نيجى نقراء الفاتحة او الرفض و كل واحد يروح لحالة
روحنا طبعا ماما كل الحب اللى كان لى اتغير الى كره فى اللحظة دى
اما بابا فقال يا بنتى هو الولد اقصد الراجل كويس و فى راحه نفسية لى اتجوزى و سافرى معاه و مفيش حد هيضايقوا من طرف الست التانية دى
اما انا فكرت ليه و اشمعنا انا اللى يحصللى كدة يمكن علشان سنى كبر بس بعد ما هديت شوية و صليت استخارة توصلت ان هو مالوش ذنب و ان ممكن يكون الكلام عنها صحيح ماشى موافقة عليه بس لازم اسمع منه انها مش هتددخل فى حياتى و اذا حصل هو يوقف ليها و يعترض و ان البنات دى مليش علاقة بيهم حتى لو الست دى اتجوزت بابا وافق على الكلام دة و ماما لم تبدى اى كلام و قالتلى اعملى اللى انتى عايزة بس انت هتقدرى توقفى فى وجه اى حد يعترض عليه ان هو كان مجوز انا قولت ان انا حرة فى حياتى و مفيش حد يدخل فيها غير ماما و بابا
بابا كلمه علشان يرد عليه ان احنا عايزين نجلس مع بعض مع مصطفى علشان نعرف موقفه من الوضع دة بس هو قال لبابا ان هو هيشوف و يرد علية
هو مردش على بابا طول اليوم و لا اتكلم يعتذر ان مش هيقدر يجى
طبعا ماما قالت دى مسالة كرامة بابا ازاى هو ما يعبرش بابا
بس هو سافر تانى يوم و بعدين كلمنى بس مش على التليفون بتاعى اتكلم على الارضى انا مش عارفة انا عملت ايه اول ما عرفت ان هو سلمت لبابا التليفون من غير اى كلمة اقوللها لى و بابا عاتبه على التصرف اللى عمله
اعتذر لبابا وان هو كان مستنى باباه لما يجى من برة و يقوله و هو جاه متاخر كان مصطفى نام المهم اعتذر و بابا قبل الاعتذار و قالو خلاص المهم ان انا و ماما نقبل الاعتذار بس لما تنزل تانى مش هينفع فى التليفون بس لحد لما تنزل و نتكلم ومفيش كلام معايا فى التليفون هو زعل شوية بس فعلا متكلمش خالص بعدها
المهم حسيت بابا وافق و خلاص مش زعلان و ان هو موافق عليه و ان كل حاجة ماشية و لكن ماما لا ازاى يحصل كل دة
و بعد شوية فى نفس اليوم باباه اتكلم مع بابا و اعتذرله بس بعد مجادلة ان بابا متكلمش فى وقت بدرى لكن هو اعتذر المهم
لكن ماما كل كلامها بعد كدة
ازاى ميحترمش بابا و ازاى دى كرامتك من كرامة بابا و ان هو انسان غشاش مقالش على الموضوع بناعه من الاول و ان هما ناس نصابة و غشاشين و كدابين و لازم ننهى الموضوع كله من الاول
فجاه بابا غير كل رايه و بقى زاى راء ماما
و المضلوب منى ان انا ارفضوا كمان علشان انت مش ممكن تعملى حاجة ضد مصلحتك و لا ضد رغبة بابا و ماما و ان هما ناس غشاشة و ان انت ازاى توافقى على الوضع دة انت احسن لكى متتزوجيش على انك تقبلى واحد كان عنده ماضى مع واحدة قبلك ويكون فى مقارنة بينك و بينها
طبعا بعد الضغط الراهيب اللى علي وافقت ان ارفضو بس مش مقتنعة
و بابا كلم الاب و قاله القرار دة و ان المفروض يكون فى صراحة و ثقة من الاول و هو رد عليه ان لو كنا قولنا الموضوع دة من الاول كان هيترفض و ان هو انسان كويس بس الحظ مكنش معاه
المشكلة دلوقتى ان انا نفسيتى فى الارض او تحت الارض فى سابع ارض انا حاسة ان هو هيكلمنى او لما ينزل يجى و بجلس معاهم و يتفاهم و انا حسة ان هو دة نصيبى و انا عايزة و بالعكس عن الاول انا اتعلقت بى اكثر من الاول
و حسه ان انا جوايا غضب كبير جدا مش عارفة اعمل اية و فى ناس بتقولى اكلمه من غير ما حد يعرف و اعتبه ان هو محاولش و ان هو سكت بسهولة كدة و افهمه ان انا مسبتوش علشان هو كان متجوز قبل كدة

اعمل اية ارجوكم تجاوبوا علي فى اقرب وقت لان الموضوع دة بقاله 3 اسابيع
jassmien غير متواجد حالياً