عرض مشاركة واحدة
03-11-2016, 10:12 PM   #6
Amany Ezzat
vip
Crown5
 
تاريخ التسجيل: Jan 2014
الدولة: مصر
المشاركات: 6,577

أجمل أم في الدنيا
حبيبتي الغالية منى سامي
موضوع جميل جدا و فكرة و لا أروع
و مواقف و ذكريات لا تنسى
أقل واجب لكل أم من امهاتنا
ابدأ منين و اقول ايه
الموضوع صعب و خصوصا بالنسبة لي
انا أمي منذ نعومة أظفارها و هي
شخصية غير اعتيادية
كانت البنت الكبرى لجدي رحمه الله
اكبر اخواتها و ممتازة في دراستها
طبعا أخدت دور المدرسة مع اخواتها
و مستشارة جدي و مساعده ليه في تجارته
و سبحان الله كبرت و اتجوزت والدي الله يرحمه
كانوا مدرسين في مدرسة واحدة
لكن القدر لم يمهلهم استكمال مسيرتهم
توفى والدي و عمره 36 سنة
بعد 10 سنين من الزواج
و أنا و أختي و أمي كملنا حياتنا لوحدنا
اكيد وفاة والدي كان صاعقة بالنسبة لنا
بنعاني منها للآن لكن الحمد لله على كل حال
ربنا قدر والدتي على تربيتنا
طبعا مرتبها كمدرسة و معاش والدي
و كمان مصنع صغير عمي كان متولي ادارته
اكيد مرينا بأزمات مادية
لأنها أصرت على بناء منزل كبير
و جنينة كنا بنزرعها ورد و فل و ريحان و خضار كمان
من قوانين أمي
كانت لازم تصحينا نصلي الفجر و بعد الصلاة جزء قرآن
و مع اول ضوء للنهار
ننزل الجنينة نظبطها و نرويها دا أساسي
طبعا في الصيف -كانت ايام جميلة -
اليوم كان طويل صحيح 24 ساعة
لكن فيهم بركة ببداية اليوم بالقرآن
و نشاط كمان شئ فعلا مفتقدينه جدا حاليا
في بيوتنا و مع اولادنا
عموما البيت و الجنينة و تعليمنا الطبخ
و وجبات و معجنات بأشكال جميلة
من اختراعها طبعا و عمل مربات و مخللات
شئ مهم طبعا كل دا و كنا نعد أطفال
بعد الانتهاء من الطقوس اليومية
عندنا وقت كبير طبعا مش هيعدي الوقت
من غير شئ مفيد بصراحة
كانت بتوفر لنا كل ما في استطاعتها
لتنمية مهارات متعددة
كتب ، مجلات ،آلات موسيقية ،
اشغال ابرة و كل لوازمها
كانت مؤمنة بشئ هام جدا
ماينفعش يعدي يوم من غير ما اعمل حاجة
اتعلم حاجة جديدة
اقرا كتاب مثلا او رواية و ألخصها في أجندة
لكن هوايتها المميزة كانت شغل التريكو
لبست كتير طبعا انا و اختي من شغل إيديها
و الحمد لله ربنا عطاها الصحة
و عملت لأولادي أجمل فساتين و شيلان
بالنسبة لي ماما كانت كل حياتي
و طبعا لاني الكبيرة كنت بالنسبة ليها
اختها مش بنتها اتعلمت منها كتير جدا
و أخدت من شخصيتها كتير
لكن الشدة و الحزم لأ بصراحة
اعتقد ظروفها و هى اكبر اخوتها
و كمان وفاة والدي كانوا سبب فيها
افتكر كانت في المدرسة منعاني انا و اختي
نناديها ماما تقولنا ماما في البيت
أنا هنا أبلة و العقاب على اي خطأ طبعا
كان مضاعف بالنسبة لنا شئ طبيعي
برغم كل دا و كل حاجة عملتها
كل ما تكلمني تقولي
انت لسه شايله و زعلانه مني
لأني رفضت دخولك فنون جميلة
يا بنتي كنت خايفة عليك بضحك
و اقولها مش هسامحك لانك غيرتي شكل حياتي
ملامحها تتغير أضحك و أقولها غيرتيه للأحسن
ربنا يخليهالي مش عارفه من غيرها
كنت هعيش ازاي سواء و انا طفلة و للآن

و أخيرا
الى كل أم أعرفها
إلى كل ورده فاح شذى
حبها في أرجاء منزلها إلى كل
شمعه أضاءت درب عائلتها
الى كل من حملت و أنجبت
و ربت وسهرت و ضحت و تحملت
لتجني ثمار زراعتها
الى نبع الحب و العطاء تحيه حب
و تقدير و احترام
كل عام و أنت أطيب و أرق
و أحلى أمل مشرق
كل عام و أنت البسمه و النور
التي تنير طريقهم

ادعو حبيبتي الغالية
علا الاسلام
لتعريفنا بوالدتها الكريمة
__________________

signature

Amany Ezzat غير متواجد حالياً