عرض مشاركة واحدة
03-10-2016, 02:02 PM   #5
SaMaR_ BakR
شريك محترف
stars-2-8
 
تاريخ التسجيل: Nov 2007
الدولة: cairo
المشاركات: 3,482

السلام عليكم ورحمة الله وبركاته

معلش أتأخرت عليكم ,,,
أعتذر عن التأخير
أنا سعيده جدا أنى اتعرفت على أمهات فاضلات
منى سامى الله يعافى ماما ويباركلك فيها حبيبتى
هاله ونانو
الله يرحم امهاتكم ويجعل من دعاؤكم لهن نقله من حال لحال أفضل

يالا تعالوا على أمى ,,, وادعولها بالشفا ,,
أنا حاولت اجيب صور أمى
لكن كل صوري على جهازى القديم
للأسف لم اتمكن من فتحه اليوم
والموبيل أنتو عارفين ,, راح فين
هههههههههههههههه

بس أوعدكم يوم عيد الأم
نعمل حفلة صور فى موضوع منمن
وأجيبلكم صور أمى وأنا معاها وكمان مع قرودي الصغار
ولادى حبايبى الملايكة ,,, ههههههههههه


تزوجت امى من أبي( رحمه الله ) كان قريبا لها
قرابه غريبة شويتين
بس ركزوا ,,,, هو يبقى ابن خال ابوها
اللى هو جدي
يعنى ابويا وجدى ابو أمى ولاد خاله
ماتسألونيش يعنى ايه ؟؟ لأن أنا حاولت افهم قبل كده
ومافلحتش
خصوصا أن أمى الله يشفيها
وصفتلى القرابة من ناحيه العمة مرة ومن ناحيه الخال مرة
فا انا سلمت انهم قرايب وبس

أنا الأبنه الرابعه وبعدى اتنين
غير أن ليا 3 أخوات توفاهم الله
يعنى أمى الله يديها الصحة خلفت 9
فتخيلوا حجم المعاناه اللى عانتها فى كل ولادة
وبعدها فى تربيه 6 من الأولاد والبنات فى مراحل عمريه مختلفة
لكن الحمدلله ,,, ربنا اعانهم -امى وابي -على تربيتنا
الحقيقة أنا كنت شايفه ان عدد اللأولاد
مع متطلبات المعيشه كانت قاسيه جدا عليهم
لكن بذلوا كل وسعهم فى توفير ما نحتاجه

ابى كان موظف تربية وتعليم
وأنتم أدرى منى بهذا العبء الازلي
على كل من ينتمى لهذه المؤسسة العريقه

كانت أمى واعيه جدا
عقليه فى محاولة التدبر والتوفير
مثل أنها كانت بتخيطلنا هدومنا
بيت وخروج ,,, وأنا فاكرة أنى كنت بتباهى بالفستان اللى بتخيطهولى أمى
أو البيجامه الكستور
أو القميص الحمالات اللى ماما تقولى ده تلبسيه وأنت داخله تنامى
وفاكراه كان ابيض وفيه فيونكات زرقا صغيره
وماما بذوقها زودتلى دانتيل على الصدر أزرق تحفة

مامة منمن عملت فستان من مفرش السفرة
أمى عملتلى فستان خروج من ((ملايه سرير))
ههههههههههههههههههه
كان عندى عيد ميلاد
وهى بتخيطه كنت بعيط بالدموع
وبعد ما خلص بدأت ,, اقول ,,, اممم يعنى معقول
ولما خرجت بيه واصحابي قالولى الفستان حلو أوى جايباه منين
الأبتسامه علت وشي ووثقت فى نفسي

وبقيت كل خروجه البسه
هههههههههههه

وبقت تقولى مش ده اللى مكنش عاجبك ؟؟؟؟

ومع ذلك كان لما يتوفر معاها فلوس
كانت تشتريلى اغلى واحلى حاجه
كنا على كده وكده والحمدلله الحال ماشي

كانت شاطرة أوى عقليه تجارية واعيه
اشتغلت فى فترة من الفترات
أنها تجيب جهاز العروسة جمله
وتبيعه قطاعى لعرايس العمارة عندنا
واعتزلت لما جوزت جيراننا كلهم الحمدلله
يعنى كانت بتوفر طلبات بيتها
وكمان بتحاول يبقى فى دخل اضافي


أمى كانت بتفكر فى كل حاجه حتى القصص
يعنى شهريا كانت تاخدنى على المكتبه وتجيبلي قصتين
دول بتوع الشهر
اللى كانت بخلصهم قرايه بعد ساعه من وصولنا البيت
كنت بحب اقرا جدا جدا

وفاكرة المكتبه كانت تحفة
كنت ادخلها انسي نفسي
وابقى عاوزة اشتريها كلها
بس ماما ببصه عين
بفهم أن الفلوس على القد ,,,
اقول الحمدلله ,,, هاحيب قصتين حلوين أوى ى
كانت شديدة ,,, فعلا كانت مظبطانا كلنا ولاد وبنات ببصه
بصه عين يا مؤمن وتفهم أنك لو ما تلمتش ,,, هاتاخد علقة محترمة

أنا كانت ليا علاقه خاصه جدا بامى
أكاد أجزم 100 % أنى ما ضربتش منها غير مرة واحده
ألم على الوش محترم كده
والمرة دى عييت فيها اسبوع
وكنت فى اعدادى ,,, لا قبلها ولا بعدها اتعاقبت
بس كانت تخاصمنى ,,,

أمى كانت انسانه قارئة ,,,
ماكملتش تعليمها لكن مثقفه ,,,
تقولى اشتركى فى كل حاجه فى المدرسة
واتعلمى كل حاجه
وأنا ما صدقت اشتركت ...
فى الكشافة والمسرح والتمثيل
والغنا وجماعه تحفيظ القرءان
وكنت بذاكر وبطلع بدرجات عاليه الحمدلله


أمى كمان كانت ولا زالت بتخاف أوى من الحسد
يعنى أنا كنت بقرا كويس من وأنا صغيره
وبحفظ قرءان ,,, تقولى ماتقريش قدام حد
ولا تعرفى حد أنك بتقري كويس

وياسلام لو دخل عندنا حد هى بتقلق من عينه
ههههههههههههههههههههه
كانت ترحب بيه جدا ,,,
لكن طول ماهى قاعده قرءان ,,, قرءان وتكبير فى وشها
ههههههههههههههههه
عسل ,,,

أمى كانت فى منتهى الكرم ,,
أى ضيف يدخلها
تحطله كل اللى عندها
حتى لو كان الموجود ده غدانا مثلا
وبعد ما يمشي
تقوم تعمل اى حاجه متوفره بس نكون بنحبها
علشان ما نكرهش الضيف
ودايما كانت تقول الضيف ينجى من النار


الحقيقة هى بكل المقاييس تعبت جدا فينا
ولم توفى حقها منا ايدا ,,,
وليشهد الله أن كل ذرة فيا بتحبها
أنا بموت فى ضحكتها
أمنيتي فى كل لحظة انها تفضل مبتسمه وسعيده
لما يتضحك فعلا بتضحكلى الدنيا

جزاها الله عنا خيرا
وشفاها وعفاها
وأمهاتكم جميها ,,,
كل عام وكل أم سعيده وفرحانه ومبسوطة
ادعو حبيبتي امانى عزت تعرفنا بالست الوالدة

__________________

signature

SaMaR_ BakR غير متواجد حالياً