عرض مشاركة واحدة
02-04-2016, 02:50 PM   #2
Amany Ezzat
vip
Crown5
 
تاريخ التسجيل: Jan 2014
الدولة: مصر
المشاركات: 6,577

دي كانت نبذة بسيطة عن معرض الكتاب
الحمد لله نلت شرف زيارته
أكثر من مرة في أعوام سابقة
لكن بما أن زيارة معرض الكتاب
مسألة مش سهلة هحاول ألخص التجربة
في نقط بسيطة ممكن تفيد نتيجة لتجربتي و أخرين

فعلا لو أول مرة تزور المعرض هتحتاج تسأل كتير

و بالنسبة للتعديلات لو فيه بتكون بسيطة جدا

نبدأ الجولة

بسم الله



* لازم تدرس مداخل و مخارج المعرض كويس
و إيه انسب مواعيد ممكن تزوره فيها.



*معرض الكتاب ليه 3 منافذ دخول مفتوحة للجمهور
واحد رئيسي ناحية مسجد آل رشدان شغالة طول اليوم



*منفذ صلاح سالم اول ما تطلع من محطة مترو المعرض
لكن أحيان كتير بيقفلوها على الساعة 6



*فيه منفذ كده مجهول ناحية كوبرى الفنجري


*وفيه مدخل 2 في طريق مسجد آل رشدان
دا خاص بدور النشر



*لو هتزور المعرض يوم واحد حاول بقدر الامكان
تبعد عن يوم الخميس والجمعة والسبت والأحد
لأنهم أيام أجازات وكله بيركز عليهم.



*هنركز على بوابة آل رشدان
أول ما بتدخل هتلقى نفسك
وسط صفين خيم العرض المكشوف
هنسميها «طريق الكباش» ودى خطرة ..
احذر ممنوع الاقتراب غير لما تخلص يومك خالص ..



**«طريق الكباش»
فيه مكتبة مدبولي- مكتبة الشروق -المصرية اللبنانية -
دار سما -أطلس -مكتبة تنمية -
وخيمة إيطاليا ودى مليانه كتب أكاديمي وأجنبي
وفي نهايته على يمينك دار الكرمة
وفي الوش هتلقى دار نون..



*أول ما تخلص طريق الكباش
هتلاقى نفسك دخلت تقاطع
خللى دار الكرمة على يمينك ونون على شمالك
وبص قدامك وقول يارب ..
هتمشي خطوتين هتلاقى
منفذ تاني لدار سما على شمالك
دى الناشر الحصري لكتب
د ابراهيم الفقي لو عايز تنمية بشرية
على يمينك هتلقى أكشاك كلها كتب ولعب أطفال
هتتمشي شوية هتلاقى تقاطع جديد
هنسميه السوق الحرة
ودا اللي هنقضي فيه طول اليوم ...
في ضهرك هتلاقى المطاعم لو حابب تريح شوية.

و يفضل تشتري أكلك معاك كأنك طالع رحلة ..


*السوق الحرة
على شمالك هتلقى 3 خيم جنب بعض
خيمة 2 و 3 و 4
وعلى يمينك
المؤسسة الحديثة ودار نهضة مصر
ودار ميريت وأخبار اليوم
ومكتبة الأسرة وهيئة الكتاب.



*الجزء اللى على اليمين دا متسيبهوش
خاصة مكتبة الأسرة وهيئة الكتاب
ومكتبة مصر وميريت والمؤسسة الحديثة.



*في نهاية الصف دا هتلقى خيمة اسمها
المقهى الثقافي
دى طول أيام المعرض بتقدم ندوات
لنجوم فى الأدب والفن



*للأسف فيه أسطورة بتقول إن
خيم 2 و 3 و 4
هى أهم خيم المعرض وكله بيجري عليها
علشان كل دور نشر الشباب تقريبا فيها
والروايات والقصص وكتب الشعر بتاعت الدور الخاصة ..
لو دخلتهم فلوسك هتروح على رويات أصحابك
و دا اللي حصل معايا بالظبط
لأنك وانت ماشي قدام كل دار هتلاقى
كتاب الدار واقفين
بيستقبلوا الزوار وطبعا هتتكسف وهتشتري ..
لكن فيهم دور مهمه لازم تزورها
زى مصر العربية والعين والعربي وأفاق
ومنفذ الهيئة العامة لقصور الثقافة
والمركز القومي للترجمة
واصدرات المركز القومي للبحوث الاجتماعية والجنائية



*لو دخلت أي خيمة من التلاته من ناحية
«طريق السوق الحرة» وخرجت للناحية التانية
هتلقى أرض خضراء وجنينة وقعدة حلوة



*وانت مستمتع بالخضرة بص علي شمالك كده..
أيوة هناك هتلاقى كام خيمة لوحدهم بعيد
هنسميها «الأرض المحرمة»
لأن تقريبا محدش بيقرب منها غير المخضرمين...
الجزء دا فيه خيمة دار الهلال وروزا اليوسف
وأخبار اليوم والأهرام ودار المعارف ..
ابدأ بدار الهلال هتلاقى عدد يخض من روايات
لأسماء كلها عمالقة فى الأدب والرواية
مش هتعدي 5 جنيه بعد الخصم
كمان دار المعارف ركز عليها ..



*لو اديت ضهرك للأرض المحرمة
واتمشيت شوية هتلاقى سلم انزله
هتلاقى طريق فى أوله دار سما على شمالك
وعلى يمينك دار الكرمة ومكتبة ألف.



*طبعا فى ضهرك هتلاقى بوابة صلاح سالم
جنبها هتلاقى مبني ضخم
دا اسمه مبنى هيئة الاستثمار..
لو بتحب الندوات
هتلاقى جواه ست قاعات
بيقدموا ندوات مهمه جدا
وهتلاقى المركز الصحفي لو محتاج تعرف
أى تفاصيل عن المعرض وفعالياته
وفيه مطبوعات مجانية
بتتوزع للتعريف بالمعرض
وكمان هتلاقى نجوم فى الكتابة والأدب والفن
لو حابب تتصور



*هنرجع تاني لمنطقة المطاعم
ناحية «طريق الكباش» و«السوق الحرة»
أيوة هنا ..
لو حابب تتعشى أوطالبة معاك فنجان قهوة ..
المرة دي مش هتدخل السوق الحرة اللى فيها
على الشمال خيم 2 و 3 و4
وعلى اليمين مكتبة الأسرة والأخبار والهيئة وميريت .



*هنكمل على طول لو المطاعم على يمينك
هتلقى مجموعة مخيمات جديدة أول سنة في المعرض
الهيئة مقسماها طريق على الجنبين مخيمات
لدور النشر هنسميه «طريق الكباش 2»
وغالبا هتلقوا فيه مجموعة عصير الكتب
لوعايز روايات
البيست سيلر والشباب وأدب الرعب والخيال العلمي.



* خلى «طريق الكباش 2 » دا فى ضهرك
هتلاقى خيمة «ألمانيا أ»
وامتدادها خيمة «المانيا ب»
آخرهم هتلاقى سور الأزبكية
وعلى يمينهم هتلاقى صاله 19 وصالة 18
وعلى الشمال هتلاقى طريق فيه كل دور النشر الاسلامية



*ألمانيا أ و ب وصالة 19
دى أماكن تواجد دور النشر العربية ..
الساقي والجمل والتنوير والانتشار ونوفل
وهتلاقى هناك ما لذ وطاب
لكن دى دور صفوة المجتمع ...
يعني بلاش تقرب من هناك اللهم بلغت.



*لكن دا لا يمنع إن القاعات العربية مهمة جدا
لأى حد أكاديمي بيعمل دراسات عليا



*فيه منفذ بيع لمكتبة الأسرة في صالة 19
لو انت عاوز تهرب من
زحمة قاعة مكتبة الأسرة
فى العرض المكشوف فى المنطقة اللى سميناها السوق الحرة ..
وفيه كمان مطبوعات الكويت
وهتلقى سلسلة عالم المعرفة بسعر رخيص جدا ..



*صالة 18 دى لكتب التراث والكتب الدينية.


*في وش سور الأذبكية في أكشاك
منها كشك لهيئة الكتاب
بيبيع الكتاب بجنيه مهما كان ضخم أو مهم ..
وجنبه كشك اسمه دار مركز الحضارة، كتبها رخيصة
وجنبهم هتلاقي منفذ لدار دون
وفي نفس المحور هتلاقي
منافذ دور نشر كتب الاقباط.



*لو عايز كتب مترجمة فيه المركز القومي للترجمة
فى صالة 2 أو 3
وفيه سلسلة الجوائز اللى بتصدر عن
هيئة الكتاب وفيه دار العربي للنشر فى صالة 4



*لو عايز أدب رعب وخيال علمي
فيه دار نون في وش طريق الكباش
ودار عصير الكتب فى خيمة 2
وهتلقوها فى منطقة الكباش 2
وريح نفسك من اللف ودى عند بوابة صلاح سالم ..



*الناس اللي غاوية كتب الترث والكتب الدينية
والناس اللى بتعمل شغل أكاديمي
ومحتاجه مصادر ومراجع
والناس اللى مدمنة روايات عربية
والناس اللى ما بتروحش غير سور الأزبكية



**سور الأذبكية
ما تطلبش من البائع كتابا بعينه،
لأنه ممكن يستغل حاجتك للكتاب ويرفع السعر.
في السور كتب للعرض وأخرى في داخل المكتبة،
ما تشتريش من أول مكتبة تدخلها،
لأنك ممكن تشتري كتابا بعشرة جنيهات
وتلاقيه في مكتبة تانية بجنيه واحد.
لو وصلت لمكتبة أسعارها مناسبة متسيبهاش.
Amany Ezzat غير متواجد حالياً