عرض مشاركة واحدة
12-02-2015, 08:26 AM   #11
SaMaR_ BakR
شريك محترف
stars-2-8
 
تاريخ التسجيل: Nov 2007
الدولة: cairo
المشاركات: 3,482

صباح سعيد عليكم

يومية جديدة بعنوان (( انا وسواق الميكروباص ))
تحذير :
اليومية دى فيها تييييييت واللى بيحافظ على عنيه وودانه
ما يقرااااش .... ادينى حذرت


تملى الصبح بدري
آخد عيالى وشنطتى وشنطهم واجري
اجوب جنبات المعادى والبساتين وصقر قريش
مشوار توصيل الولاد الصبح حاجه كده لوز لوز لوز

الصبح والناس نازلة شغلها
اللى بيسوق وهو لسه نايم

واللى متاخر وفى قمة العصبية

واللى زىى كده ... سايقة
وولادها قاعدين ورا عاملين حرب عالمية
على الشباك و شنطة اخوه اللى مضايقاه
واخوه شخصيا اللى مش طايق وجوده فى العربية
لدرجة ان كل واحد يقولى وصلي التانى الاول

كل دول بقه كووم
وسواقين الميكروباص دول كوم تانى خالص

اولا هما شايفين نفسهم عفاريت الاسفلت
وكووووووول اللى سايقين اى كانت نوع العربية - بهايم بس -
العداوة بينهم وبين سائقي العربات فى الطريق تتدرج كالتالى
من الاشد عداوة الى الاقل عداوة

العربية الملاكى اللى سايقاها ست
انطباعه عنها (الله يخربيت اللى سوقهالك ))

التوكتوك
انطباعه عنه( صرصار الطريق ولازم يضرب بالشبشب))

العربية الملاكى اللى سايقها راجل
انطباعه (( اكيد امك اللى جايبهالك ))
ولو امه ميته (( انت راجل كبير وعيب اهزأك ))

النقل الخفيف
انطباعه (( بصه قرف وينفخ دخان السيجارة بامتعاض شديد ))

سواقين التاكس
انطباعه (حمار وبياخد فى التوصيلة آد كده
وزاحملنا الدنيا على الفاضي ))

الميكروباصات التانيين
على حسب بقه لو مش نفس الخط
ممكن يسمحله يعدى قدامه
واحتمال يرفعله ايده علشان يقوله شكرا

مافيش مانع يوقفله الطريق وراه
وهو راكن جنبه فى نص الطريق
علشان يفكله جنيه اربع تربع

لكن لو نفس الخط
ممكن تتفرجوا على سباق ميكروباصي مجانا
يتضمن لم غرز بالعبيط يمينا ويسارا
واثناء ذلك انسي انسي ان حد فيهم يبطل كلكسات
ولا تلكسات ؟ ... انا مش عارفه اسمها ايه
بس الكلكسات لسواق الميكروباص (اسلوب حياه)
ممكن ما يركبش ناس ولا ياخد اجره
بس ما يقدرش يعيش من غير صوت الكلكس
هو تقريبا ضغطته على الكلاكس دى اللى بتمشي العربية

عاوزة اقول ان لو الشارع فاضي قدامه
بيضرب الكلاكس ده ... يمكن
احتمال ...
يعنى بالمرة ...
Just in case ....
يعنى اهو اسلي نفسي بدل ما امشي ساكت
يعنى وليه لا

اول ما سقت العربية
كنت ببعد عنهم بالمشوار
لانى بتنرفز جدا من صوت الكلاكسات المستمرة
كان ممكن اركن على جنب علشان اللى ورايا ده يعدى
واخلص منه
وبعدين غاظتنى طريقتهم فى تقفيل الطريق على الناس
وتعاملهم على انهم ملاك الطريق
بالاضافة الى ... ما بيخلصوش ..
تخلصي من واحد يجيلك اربعه

قلبي جمد شوية فى السواقة
والعربية اصلا متخرشمة
فامعدش بيهمنى
ساعات احب اجرب هاعرف اقفل عليه الطريق ولا ﻻ
واحب جدا اشوف ردود فعلهم
لا تخلوا من كلكسات عصبية تحمل معانى سب وقذف
وتشويح بالايد
وساعات وهو سايق بيخرج من شباك العربية
بايديه وراسه علشان يعبر عن اعتراضه
على تجرأى- كاكتر سائق ما بيعرفش يسوق فى الدنيا -
تجرأى انى اعمل اللى بيعملوا كل دقيقة
ساعتها ببقى هانام على قفايا من كتر الضحك

تلاقى الواحد من دول ماشي فى الحارة اليمين
تتجرا الحارة اللى فى النص تمشي اكتر من اليمين
تلاقى كسر عليكى
ودخل ببوز العربية بينك وبين اللى قدامك
وبعدين يخرج رجله-اقصد ايديه- من الشباك معتذرا او بيشكرك
او حركه عصبيه لا يقصد منها اى شئ
واللى عندك اعمليه .....

وبعدين لغتهم بقه ..
حرف الشين اللى حشرينه فى كل كلمة
مرة واحد منهم بيقولى (( هاتشخبطشتينى كده))
الترجمة :هاتخبط ينى كده
علما بانه جه من ورايا ودخل يعدى منى من على اليمين
بينى وبين عربية راكنه اصلا
وزعل منى مش علشان ملت عليه يمين
لا ... علشان مشيت فى طريقي وما وقغتش مكانى
علشان حضرته يعدى ...

ساعتها وانا هاموووت من الضحك
قلتله ...انت اللى هاتشخبط نفسك
حرف الشين عجبنى اوىىى فى وسط الكلام
هابقى استخدمه كتير

طلع مؤدب ورد عليا بالكلكسات بس
هاتعلم اللغة دى كمان بتبقى اسرع فى الشتيمة


المهم بعد ما بوصل الولاد
و اوصل المدرسة
بطلع بقه حصة كاملة استغفر على كمية الذنوب
اللى بعملها تريقة وتيييت كتير على سواقين الميكروباص

ما يمنعش ...
ان فى منهم عدد قليل جدا
شباب محترم ومهذبين
ربنا يكترهم

اتصبحوا واتمسوا بالخير
__________________

signature

SaMaR_ BakR غير متواجد حالياً