عرض مشاركة واحدة
11-13-2015, 06:39 AM   #1
SaMaR_ BakR
شريك محترف
stars-2-8
 
تاريخ التسجيل: Nov 2007
الدولة: cairo
المشاركات: 3,482
يوميات فنانة فى قاهرة مصر

basmala

منذ فترة وعدت اصدقائى بمشاركتهم
(( يوميات مدرسة فى القاهرة ))

وبالفعل كتبت كتير
فى ضهر كشكول تحضيري
وفى مذكرات التليفون
وعلى ضهر روشته دكتور اطفال بيعالج ابنى
وفي ورق فواتير كتيرة مرمية فى شانون العربية

لما حبيت اجمعها ... لاقيت انى متجهة فيها
اتجاه ساخر بشده من حال البلد
واقع نعيشه كلنا فى مصر ان الحال يحتاج اصلاح
الحقيقة اليوميات تلاته ارباعها ((تييييييييت))
هههههههه

كتابات وخواطر وسرد لمواقف تحدث يوميا
بتضحك جدا ..... لكن بعد الضحك الكتير
تحزن حزن شديد وتدخل فى حالة التعبير عن الاسوأ
لانك عايشه ... بس متعايش معاه
مش عاوز حد يضغط على زرار التعبير عندك

ومن مبدأ المشرحة مش ناقصة قتله
قررت آجلها او اقننها ...
يعنى استنى لما يحصل حاجه كويسة

اكتبها ... تفرحوا ..
ارزعكوا حاجه كئيبة تزهقوا ..
ابقى حققت الهدف من توازن الشخصية
اللى المفروض يتحقق داخل كل واحد فينا

وافتكرت مسرحية الجوكر للجميل محمد صبحى
((فيتكلكع زيااااده .. يتعقد زياااادة ))


(( اليومية الاولى ))
قررت النهاردة اشارككم بحاجه مختلفة
حاجه فعلا بتخاطب فينا جانب لسه فيه امل

القريبين منى يعرفوا انى بدأت من تانى امارس مهنة
التربية عن طريق الفن .... ليتنى افلح
الترجمة : مدرسة رسم يعنى .. زى ما كتير بيقولوا

والحمد لله ربنا وفقنى واختارولى صدفة
مش علشان انا قيمة فنية
يمكن الاستفادة منها ولا حاجه
اختارولى مدرسة تجريبي اسمها صقر قريش

من اسبوع جه الوزير بتاعنا -وزير التربية والتعليم-
والمحافظ وحبة ناس ببدل وكرافتات كتييييير
وكدابين زفه بالهبل
والمدرسة اتشدت اسبوعين قبل الزيارة المفاجئه دى
اللى محدش كان عامل حسابها خالص........!!!

بس ستر ربنا فى ناس جم رصفوا الشارع ودهنوا الرصيف
عماويد النور اللى على جانب الطريق الرئيسي قدام المدرسة
المواطنين الشرفاء علقوا على كل عمود علم رائع ونضيف
ولا الشمس مأثرة عليه ولا المطر ممطر فوقية

وفى حد كده من الوزارة مكنش يعرف خالص اى حاجه
جه اهدى المدرسة مجموعة كبيرة من حاملات الاعلام
ومجموعة كبيرة من قصاري الزرع الخضرا
واعلام مصر الكبيرة انتشرت فى المدرسة
واللون الاخضر انتشر فى المرسة بطريقة منظمة وجميلة

الغريب ان الاعلام وقصاري الزرع دى
بقت انفزبل ( غير متوفره ) بعد الزيارة
الظاهر انها كانت اهداء لمدة ساعة ونص بس
وعرفت ان الزيارة دى بسبب افتتاح مبنى جديد بالمدرسة
باسم ((طه همام ))
مجهز ومعد بشكل ادمى لاستقبال طلاب كى جى وابتدائى

فى وسط القرف ده
اقصد المظهر الحضاري ده
لفت انتباهى بين الحاضرين
سيدة هاديه شيك محتفى بيها جدا
هى اللى قصت الشريط الستان الاحمر ابو فيونكة
بمقص كبير على صينيه متذوقة




لاقيت الطلاب بيجروا عليها عاوزين يتصوروا معاها
وواضح انها معروفة وسط الطلاب وكمان محبوبة اووى
لان ولاد كبار وصغيريين جريوا عليها
وهى استقبلتهم حلو جدا
واتصورت معاهم لحد ماااا استكفوا تصوير
((السلفي ونا ادراااااك ما السلفي .... ))








لما سالت مين دى ...
قالولى دى الدكتورة ((رجاء المنصورى ))
اللى تكفلت ببناء المبنى الجديد وتجديد كل مبانى المدرسة
وتجهيز المعامل بكل ما تحتاجه
والموضوع ده يتكلف ملايين

وعرفت انها والدة الشاب المتوفى (( طه همام ))




اللهم ارحمه واغفرله ووسع قبره مد بصره
وجازيه وجازى والدته بثواب علم ينتفع به

الحقيقة انا ما اعرفش اى حاجه عن ظروف وفاة الشاب ده

لكن من كل قلبي بدعيله بالرحمه فى كل لحظة
بشوف تاثير مشاركه اسرته فى تجهيز المدرسة

فى كل مرة بشوف الدكتورة رجاء وسط الولاد
وبين المدرسين بتسالهم محتاجين ايه ؟

فى طريقة كلامها مع المدرسين وهى بتقولهم :

((كل اللى انا اتعمل مالوش قيمة من غيركم
انا بس بحاول اوفرلكم بيئه مناسبه
تطلعوا فيها احسن ما عندكم ))

من خلال نافذة ورد للفنون
ادعوكم للدعاء بالرحمة للشاب المتوفى -رحمه الله-
ولكل مصري ومصرية بيحاولوا يفيدوا البلد
بالكتير او بالقليل ...
مش مهم .. المهم انهم بيحاولوا

اتمسوا واتصبحوا بالعافية ... الى لقاء جديد
__________________

signature

SaMaR_ BakR غير متواجد حالياً