عرض مشاركة واحدة
06-11-2015, 10:42 PM   #10
Amany Ezzat
vip
Crown5
 
تاريخ التسجيل: Jan 2014
الدولة: مصر
المشاركات: 6,577

يرحل عنا
بأسرع ما يمكن
أجمل الناس وأصدقهم ،
وكأن حياتنا لا تروق لهم
يرحلون و يتركون لنا الدهشة .
كتب الأبنودي فى رثائه




قصيدة
عدودة تحت نعش يحيى الطاهر عبد الله
يا يحيى يا عجبان يا فصيح
يا غنوة يا زغروتة
اتمكن الموت من الريح
وفرغت الحدوتة
كنا شقايق على البعد
وع القرب شأن الشقايق
أنا كنت راسم على بعد
وخانتنى فيك الدقايق
حرة كطير البرارى
أسما.. وعاش المسمى
دلوقت بتنام جوارى
فى فرشتك يا ابن عمى
أبويا مات السنة دى
وأمى بتموت وتحيا
ما مد لى الموت أيادى
إلا فيك انت يا يحيى
أبكيك وللذكرى رعده
كنت الونس فى الوسع ده
خايف مونس قبيلة
عملت م الغربا عيلة
وفتحت للحب طاقة
دى لعبة تانية رزيلة
ولا امتحان للرفاقة؟
أديك مت ولا عدت تحيا
والدنيا "طفله ومومس"
غريب مت كما مات "يحيى"
لا طال نجد ولا طال تونس
غربا وجينا النواحى
الكل للكل شاهد
ننام وانت اللى صاحى
انت اللى مجموع وواحد
الحمل فوق الكتاف مال
والدم نازل قنايه
يا جمل ما يوم خزمه جمال
ولا قتله عشق الصبايا
يا جمل ما يوم قصر السعى
يا مغلب الجماله
حسدونا فيك حتى ع النعى
واعتبروا حبك عماله
يا موت وتعبته تأجيل
يا موت ودى موته ظلومه
ليلة انقطف "وردة الجيل"
شمتت كلاب الحكومة
يا قبر جالك ولد زين
ما ارتاح غير الساعه دى
يا ملحد لحده زين
يحيى مالوش فى الرقادى
يحيى عليه السلام
كان يعرف الموت وقيمته
لا فى سكرة الموت اتعدل وقام
ولا قال كلمة لبنته
آخر حروف الأبجدية
أول حروف اسم يحيى
للموت كمان عبقرية
تموت لو الاسم يحيى
يا يحيى يا عدلان يا مليح
يا يحيى يا خى اليتامى
مش حمل تشريح وتمليح
يا يحيى بالسلامة
وبرغم باعنا القصير
رغم الزمن مش بتاعنا
حتعيش معانا وتكبر
وحتضيع لو احنا ضعنا
وحيعيش عذابك يا خيه
قناديل وسكه وغايه
دى مش نهايتك يا يحيى
يمكن تكون دى البداية
Amany Ezzat غير متواجد حالياً