عرض مشاركة واحدة
04-13-2015, 12:15 AM   #20
Amany Ezzat
vip
Crown5
 
تاريخ التسجيل: Jan 2014
الدولة: مصر
المشاركات: 6,586

الواد كبر
ولازمله شعب يِهرِسُه
وقانون عظيم
بإشاره واحده يُنشُرُه
وإشاره تانيه يحبسه
ولازمله منهج حكم لكن معتبر
ع الخوف ضرورى يأسسه
ولازمله كلب من الصحافه يمدحه
وفى وقت عوزه يقدسه
وينزهه عن الغلط .. أو العبط
وفى عز أصعب وقت فى ليل الوطن
يقعد معاه يوَنسه
ويجيبله شمس تشمسه

الواد كبر
الواد كبر وصبح علامه للنبوغ
الواد خلاص قرب يطول سن البلوغ
ولازمله كرسى ينجسه
ولازمله مجلس للموافقه والسكوت
وان يوم نسى وطلعله صوت .. يتربسه
ولازمله خدام للنظام
على الجميع يتجسسوا
ولازمله حبة بلجيه م التقال .. أولاد حلال
جوه المظاهره ينكسوا علم البلاد
ويهتفوا بحب الفساد
ويلزقوا ف مزز المعارضه يقفشوا ويحسسوا

الواد كبر
وأظنه زيى مالهش قلب
والحكم حلو وابن كلب
كفايه شكل الحاشيه لما بيسجدوا من غير سجود
ساعة مايعتبروا الرضا منى صعود
أو لما ياكلوا ف بعض
علشان يفوزوا ببسمتى وسط الحشود
يتنططولى ويرقصوا زى القرود

الواد كبر
الواد كبر ولازمله حلم يمتعه
ولازمله حصه تشبعه
ولازمله حاشيه يبرطعوا
يتربعوا .. يتمطعوا .. يدّلعوا
وإذا واد معارض حب يعمل فيها مسمار .. يخلعه
يقلع عينيه .. ويأدبه
وف اى صحرا .. يقّلعه
Amany Ezzat متواجد حالياً