عرض مشاركة واحدة
04-13-2015, 12:14 AM   #19
Amany Ezzat
vip
Crown5
 
تاريخ التسجيل: Jan 2014
الدولة: مصر
المشاركات: 6,586

الواد كبر

إبنى العظيم .. إبنى الجميل
إبنى إللى قادر ينتصر ع المستحيل
الدنيا قاعده ف مجلسه
وله مهابه يحسها كل البشر
إللى ف حضوره اتعطروا
واللى ف هواه اتنفسوا
كل الكبار ولا الصغار
لو قربوله بيهمسوا
كلماته شعر .. مفتى .. وعالم عبقرى
كوم التراب يصبح دهب
لو لمسه واحده يلمسه

الواد كبر
تجيبوله جيش .. هَيْفَوَرُه
تجيبوله عصر من الجهاله .. ينَوَرُه
تجيبوله سد .. بطرف إيده يهندسه

الواد فهم
من غير ماحد يعلمه معنى العلام
من قعدته فى مجلسى
درس الحروب قبل السلام
هضم المذاهب كلها
سربتله بين السطور علم النفور والانسجام
علمته ينظر للبشر وف عينه مليون اتهام
يرمى بذور الخوف فى دقة قلبهم
ومن الوشوش .. يحصد نسيم الإبتسام

الواد كبر
الواد كبر وكبر معاه وطنه الأشم
الواد كبر ولازمله هم
ولازمله قصر
ولازمله عرش .. وصولجان
وحدود وحاشيه ومهرجان
ممكن كمان .. سيرك وجنينة حيوانات
سجن ومعارضه وتضحيات
وحزب من أهل الكلام يدبوله فى الخطب
ويحفظوه بعض النصوص
وهيلمان وزرا ولصوص
شويه منهم يسرقوا
وشويه ياخدوا حقهم لما يوزع فى الوطن ويفرقه
قلب الوطن لاجل التخين
راس الوطن لاجل الكهين
داعر لطيف .. أكبر حرامى ومدّعى إنه الشريف
عين الوطن معروفه طبعا لاجل مين
للمخبرين
Amany Ezzat متواجد حالياً