عرض مشاركة واحدة
07-14-2014, 05:23 PM   #42
Amany Ezzat
vip
Crown5
 
تاريخ التسجيل: Jan 2014
الدولة: مصر
المشاركات: 6,580

احدث قصيدة كتبها يونيو 2014

أول كلامى أصلّى ع النبى العربى

نبى ما كان يكره إلا ريحة الخايْنين

وَافْتَّح كِتابَ مصر واقرا القصة بالعربى

وما جرى فيها فى يونيه فى يوم تلاتين.

يتمطّع الضىّ ع الخُضرة فى ساعة عصر

كأنه نسْمَة خصُوصى جايّه للمساكين

كان مين قِدِر والاَّ يقدر يِتْنِى راية مصر

حلم الغزاة اللى داير من قرون وسنين؟!

ومصر اهِه لسّه عايشة ولسّه بِتعافِر

وعَزْمَها المر.. صبَّرها على الغازْيين.

فاصْحَى وفوق ياللي بنعيم الوطن كافر

ورامى صنانيرك النَّحْس فْ بحور تانيين!!

■ ■ ■

أمرك عجيب يا تى.. ياللّى صابِغْها همّ

هل دا عبط أيدلوجى والاّ عِلْم دفين؟

ساكن مع المجرمين فى فصول كتاب الدم

تتآمروا على شعبكم وتروّعوا الآمْنين

سِبْت الأصيلة.. ورحت تلُوف على «ابوالدّقْن»

وتمجِّدوا الكدابين.. كانت أوامر مين؟

سيدكم هناك.. قالّكم: «دى فى انتظار الدفن..

بسّ اصمدوا والحكاية.. حتنتهى فى يومين»

هيّأتوا نَفْسيِكُو للمنصب يا عبْط يا بُكْم

كما (جلبى) و(المالكى) وابصر مين وزفت الطين.

وخلاص يقين إنه قرّب ليكو كرسى الحكم

طِلْعوا لْكو وِلْد الأبالسة جيوش يوم تلاتين.

الطَّبْخَة تمت هناك فى مطبخ الأعداء

عُملا وجواسيس وقبِّيضَة وشباب خاينين.

أخدوا الأوامر يخلُّوا مصر دى أشلاء

من بياعين النضال.. لبياعين الدين

كلُّه صناعة أمريكانى والتيكيت مغلوط

مزوّرينه بِقِلِّةْ صنعة.. يا فاشلين

سحروك يا ثورى؟ خَلاص إفضل كده (مربوط)

تنكر ودانك هدير الشعب بالملايين!!

■ ■ ■

ويا مصر مدّىْ الخُطى.. وحققى الفكرة

إنتى ابتديتى الكتابة والفنون والدين

لو شايفه بكرة أكيد راح توصلى لبكره

وارمى وراكى اللى قاصدين يبقوا مش شايفين!!



يوليو 2014




مرسال

الشعب عمره ما راح يعود للوهم
والرجرجة في القول والأفعال
المسألة غياب سلوك الحسم..
في حرب جبارة جهاد وقتال
المسألة دعم أو مش دعم
رايحين لفين أهو ده أهم سؤال
أنا مش مصدق مهما صدق العزم
إنك تشيل الميه في الغربال
كله أخد على البلطجة والخم
ومصر مرضانة مرضها عضال
الشهر يسحب خلف منه شهر
تقع المروءة مهما هتكون شهم
يا أيها القبطان قانون البحر
متخفش على الساري وخاف على اللحم
والشعب طاشي لا نظر ولا سمع..
وفضيت الساحة من الحرافيش
الدم متنكر في صورة دمع..
والكبد متمزع والقلب مفيش
فاحذر لسان مسموم بقولنا وقال
وآخر النهار لا جدعنة ولا مال
عيون أزاز أما قلوبهم شمع
والروح حتة شقف وضمير خيش
متتكلش على اللى مبيديش
طواويس منفوشة هوادج ريش
ويخافوا جدا من حكاية الجيش
زمان جه حاكم قلع الطرابيش
وخد بأيد المنسي في التهميش
وأنت سمحت إزاي يغلوا العيش
وسبت أهل النهب والتكويش
ناسك لو انصرفوا هيفضى الكون
لو ناديت مش رح يرد سؤال
الفقراء ضاعوا لا مدد ولا عون
كأنما الثورة خيال في خيال
يالى طردت شيطانها الملعون
فارس ونعمه بسالة الخيال
تحت الفرس قلب الفقير مطعون
ولا من سمع أنين فقير الحال
ضحك المرابي.. وداس على المديون..
والغالية رايحة ترهن الخلخال
فتحت قلبي وبحت بالمكنون
والفقراء بعتني إليك مرسال



يتبع
Amany Ezzat متواجد حالياً