عرض مشاركة واحدة
07-14-2014, 03:33 PM   #41
Amany Ezzat
vip
Crown5
 
تاريخ التسجيل: Jan 2014
الدولة: مصر
المشاركات: 6,581

بإبتسامتي البلها وأنا حاضن ترابي
لما يعجن دمي شبرين من تراب أرض الوطن
وأنا حاضن اللي خانوني......إذكروني
إذكروني
لأني كان ممكن أعيش
وأبقي طاووس يختبي
صوته القبيح في أحلي ريش
بين طواويس الوطن
الربيع يخضر أكتر في العطن
أتصدر المحافل
لابس البدله اللي بداري الكفن
أتصدر المحافل
وأنا قافل اي شباك عالضيا
وأبقي سافل
وأستخبي تحت لفتات الحيا
.........المثقف......المجفف
اللي فرعه مهما طاطا
عمره ما يشبع تدني
.................يا صديقي
يسقط الجسد اللي بيزاحم طريقي
واللي بيغرس خطايا في الخطايا
نصحي عاليوم الجديد
نلاقينا فقدنا حريتنا
وتاجرنا من تاني بالنشيد
تسقط الحرية من غير قصد
في عالمنا البليد
تسقط العزة....وأقنعة الكرامة
الاحتراف قتل الهواية
والشرف كما تعلمون شيء مش مفيد
تسقط الحرية
نتخلق باخلاق العبيد
وفمعاصم كل أيد
ينبت القيد الحديد
لا طموح لأي فكر
والوتر مايعدش بكر
لا يعود للعفة ذكر
والضمير يتباع في أسواق النخاسة بالوقية
والمواقف بالدراهم
والنجاسة بالروبية
اللي طاهر يصحي خاين
تصبح الجماهير زباين
حاجة بدعة
تسكت الأصوات
لكن الأمة سامعة
والقضية الإنسانيه
تبقي سلعة

وسط ده كله إذا قلت الحقيقة
............ ها تكرهوني
ولسنتكو يشوهوني
هكذا قال المغني
ثم غني بصوتي...دمّع من عيوني
لما يعجن دمي شبرين
من تراب ارض الوطن
إذكروني

إحنا عصافير الزمن ده
اللي حافظة كل فرع وكل وردة
واللي بتزقزق قلوبها
فلحظة واحدة للوطن
قتلونا باللي حاصل
متعونا بالسلاسل
الأمان والضحكة مش هايعودوا واصل
بعد مالشققا خانونا
إحنا عصافير الزمن ده
اللي حافظة كل فرع وكل وردة
الوطن كان حلمنا وكنا بابه
الوطن ده اللي حلمنا بضحكته
وهو فاكرنا بعذابه
اللي ما وراثنا الا الدمع في قراية كتابه
الوطن عبقري العالم في تنويع البلادة
واللي بيعذبنا فحضوره وغيابه
ساعة نتمرغ في صدره
وساعة نلعن أبو اللي جابه
الوطن الكلمة دي
العذاب اللي بنوره بنهتدي
العذاب ما نقولش أخ
ده وطن ده ولا فخ

أوصفك يا وطن بأيه
بالنبات الغض يتغزل في مناشير الجرادة
الليلادي ولا بكرة الصبح
تصطادني الرصاصة
البدن يرجع لأصله تراب وماء
الرصاصة لأني فاشل في المداهنة
لأني كاذب في النفاق
دون ما أسأل ليه بموت من دون جميع الأصدقاء
أنطرح وافرد دراعي
دون ما أسأل عن السبب أو الدواعى
ربما لأني قصدت لكن فشلت
أبيع لساني قطعه قطعه
ربما لأني رومانتيكي وعواطفي لسة خرعة
الديابة العبقرية أصدقائي
وفنهم ساعات بنوره يطفي فني
اللي واثقين من غناهم
وأنا يرعبني الغني ساعة ما غني
كلهم قلبوا قلوبهم
غيروا وشوشهم وقولهم
ضحكوا علي جهلي وسابوني
هكذا قال المغني
وكأنه مد أيده إستل صوتي
وقاله عني
وسرقها من ضلوعي
ودسها فصدقه الجنوني
لما أعداء النزاهة يبندقوني
أوعوا تنسوا شهقتي
وتمشوا بدوني
أوعوا بالصمت المليل ترعبوني
تتركوا اللي هيزرعوا الموت في ترابكم
من ترابكم ينزعوني
وإغفروا خيبتي القوية
إغفرولي تفاهة الموته
عشان خيبة القضية
لموا خلقاتي عليه...لملموني
وانتو بتقولوا عليه
المغني إبن الغبيه
اللي فاشل في المداهنه
واللي خايب في النفاق
مات مايعرفش شهيد
شعب الكويت واللا العراق

لما بفخر بالديار
أو بغني للصغار
ليه بحس فصوتي رنة لاتجار
ليه بحس بصوتي.. مش صوتي.. كأنه مستعار
قد ما يحافظ المغني علي صوتّ
قد ما يفحت تراب قبره
ويسعي نحو موته
وتنعدم فيه قدرته علي الحوار
إنما عالم نعيشه
والبطل فينا اللي يعرف
مطرحه في قلب جيشه
هكذا قال المغني
قد ما ننورها هي مضلمه
قد ما نعلمها مش متعلمه
كل ليله بايته مظلومه وهي الظالمه
قد ما نحجمها تفلت ملاطار
يا صديقي.. الوطن ما خبزش عيشه
والتاريخ لو مش كلام
نرفض أبوه .....نرفض نعيشه
......السلاح من صنع بره
.....والكلام من صنع بره
......والهوي البارد في بيتي ..صنع بره
لا نسجت الهدمه علي نول الخشب
ولا إيدي بتبني بيتي
....جلابيتي ...عمامتي...حواديت الصغار
الحلاوه حلوه مره ....شغل بره
أيه يهم إن عشت في عالي القصور
أو قضيتها أغمس الكسره في زيت
أيه يهم إن مت من أجل البشر
ولا سبت الديب يصرخ و اتغابيت
أو نسيتها أو اتناسيت
أيه يهم إن دورت أغني للعراق
أو أغني للكويت
.....الشهاده مجانيه
والبطوله نفحات إستعراضيه
والمعاناه حجة العاجز وعجز الانكسار
بافترض ليه إني شخص عام
ما بمثلشي شخصي
وانا عارف إن أمري كله شخصي
هكذا قال المغني
اللي كان معجب بفني
وكأنه أخدها مني
ودسها فصدقه الجنوني
غني لما قاللي غني
غني ويايا بدوني
لما يعجن دمي شبرين من تراب أرض الوطن
لما أحضن وانا قصدي أتحضن
لما يرحل صوتي خارج الزمن
لا اشتريكوا..ولاتبيعوني
ولا جرنال الصباح يخرق عيوني
في قلوبكم إدفنوني
وإذكروني.....إذكروني
Amany Ezzat متواجد حالياً