عرض مشاركة واحدة
07-03-2014, 11:20 AM   #45
Amany Ezzat
vip
Crown5
 
تاريخ التسجيل: Jan 2014
الدولة: مصر
المشاركات: 6,583

الى المفاوض الاسرائيلى


مستر الياهو بن آليسار
ياللى عيونك كلها أفكار
فكر . . فكر زى ما تختار
بس اتذكر
انك مش وحديك المكار !
ولا انك وحديك الوطنى
اللى بيقول قلبى على وطنى
وعلى الأطفال اللى ف وطنى
وعلى الخضرة
وعلى النضرة
وعلى الأزهار
وعلى الأطيار
والدانتيللا ف شبابيك الدار
والبمبنى اللى ف لوحات رينوار
إلى آخر قواميس الأشعار !
شوف يامبجل ..
لو كان واحد فينا اتمكن
من صاحبه ماكنشى كل ده صار
كان واحد بس اللى ترفرف
اعلامه ويلبس تاج الغار
والتانى يتجر مسلسل
خلف المركبة موسوم بالعار
لكن جرى ايه ؟
قاعدين كده ليه ؟
وسبايا مفيش ليه يا عزيزى ؟
قال لك ده ماعادشى " فرن ايزى "
حرب نهاية القرن العشرين
نهايتها فناء البنى آدمين
المنتصرين والمنهزمين
والناس اللى واقفين ساكتين
يتفرجوا على العاب النار.
آدى القصة
من غيرغصة
من غير ولا حقد دفين ولا تار
علشان كده مستر بن اليسار
موجود ويانا على الطاولة !
علشان فشلت كل محاولة
لسياسة الارغام والاجبار
فى العالم كله كبار وصغار !

والان ورينا ابتساماتك
ابتسامات حلوة ان جيت للحق
انما لو حجبت نياتك
ح نقول لك آسفين لأ .. لأ .. لأ
مستر الياهو بن آليسار
أنت مش وحديك المكار !



فزورة

حزَّر فزّر .. واحد ( مِستر ) ،

يصحى من النوم و شّه مزنهر ،

يشرب ( فيتامين ) قبل ما يفطر

يفطر زبده ، و فينو مَقمّر ،

و مربّه ، و بيض بكذا محمّر ،

ثم القهوه لجل يعمّر

ثم لبانه ، ثم يعفَّر ،

ثم يقوم لك كده يتمخطر ،

يكبش أوراق لونهم أخضر

أكوام أكوام ، آخر منظر ..

يملا جيوبه ، و يمشى يفنجر ،

يركب (كاديلاك ) طالعه تزمجر ،

يشرب ( ويسكى ) ملو الأنجر ...

و لا عنده هموم ، و لا متعكر ،

و ف حضرتنا مش بيفكر ،

و إن جت سيره ، لا يتذكر ،

أصله ف نفسه ، و مش متبحّر ،

و لا يعجبهوش اللىن لاسمّر ،

غير فى البدله لما بيسهر

... إنما خفه ، و دمه سكر ،

مين بقى هوه ؟ .. مش راح أفسر ،

واضح جدا .. حزّر .. فزّر .




أجمل ما فيهم

يا بنت يام المريله كحلى ،

يا شمس طلله ، و طالله م الكواله ،

لو قلت عنك فى الغزل قوله ،

ممنوع عليا ، و الا مسموح لى ؟

أنا احب اقول الشعر فى الحلوين ،

و الحلو اقوله : يا حلو فى عيونه ،

و لو ابتديت بشفايفك النونو ،

ما يكفنيش فيهم سبع دواوين !

يا ملاك يا جنيه ، يا ست الحسن ،

يعجبنى توهانك فى أحلامك ،

يعجببنى شد الخصر بحزامك ،

يعجبنى أخدك للكتب بالحضن .

.. .. راحوا الصبايا ، و الصايا جم ،

أجمل ما فيهم مين ، غير بنتى ؟

و أجمل ما فيكى يا بنتى ، ان أنتى ،

فى عنيكى من نينتى .. .. حنان الأم !


Amany Ezzat متواجد حالياً