عرض مشاركة واحدة
06-09-2014, 11:38 PM   #5
Amany Ezzat
vip
Crown5
 
تاريخ التسجيل: Jan 2014
الدولة: مصر
المشاركات: 6,575

وأخيرا وليس بأخر

حرف الياء


ياما صادفت

ياما صادفت صحاب وما صحبتهمش
وكاسات خمور وشراب وما شربتهمش
أندم على الفرص اللى انا سبتهم
والا على الفرص اللى ما سبتهمش

عجبى !!



يا باب

يا باب أيا مقفول . . إمتى الدخول
صبرت ياما واللى يصبر ينول
دقيت سنين . . والرد يرجع لى : مين ؟
لو كنت عارف مين أنا . . كنت أقول

عجبى !!



يوم قلت اه

يوم قلت آه . . سمعونى قالوا فسد
ده كان جدع قلبه حديد واتحسد
رديت على اللايمين أنا وقلت . . آه
لو تعرفوا معنى زئير الأسد

عجبى !!



ينبوع

ينبوع وفى الحواديت أنا سمعت عنه
إنه عجيب . . وف وسط لهاليب لكنه
شقيت كما الفرسان طريقى . . لقيت
حتى الخنازير والكلاب شربوا منه

عجبى !!



يا قرص شمس

يا قرص شمس ما لهش قبة سما
يا ورد من غير أرض شب ونما
يا أى معنى جميل سمعنا عليه
الخلق ليه عايشين حياه مؤلمة

عجبى !!




يا نجم

يا نجم . . نورك ليه كده بيرتجف ؟
هو انت قنديل زيت ؟ . . أو تختلف ؟
أنا نجم عالى . . بس عالى قوى
وكل ما انظر تحت اخاف انحدف


عجبى !!



يا طير يا عالي

يا طير يا عالى فى السما طظ فيك
ما تفتكرشى ربنا مصطفيك
برضك بتاكل دود وللطين تعود
تمص فيه يا حلو . . ويمص فيك

عجبى !!



ياللي نصحت الناس

ياللى نصحت الناس بشرب النبيت
مع بنت حلوه . . وعود، وضحك، وحديت
مش كنت تنصحهم منين يكسبوا
تمن ده كله ؟ . . والا يمكن نسيت

عجبى !!



ياللي انت بيتك قش

يا للى انت بيتك قش مفروش بريش
تقوى عليه الريح . يصبح مفيش
عجبى عليك حواليك مخالب كبار
وما لكش غير منقار وقادر تعيش

عجبى !!



يا مشرط الجراح

يا مشرط الجراح أمانة عليك
وانت ف حشايا تبص من حواليك
فيه نقطه سوده فى قلبى بدأت تبان
شيلها كمان . . والفضل يرجع إليك

عجبى !!



ياللي عرفت الحب

ياللى عرفت الحب يوم وانطوى
حسك تقول مشتاق لنبع الهوى
حسك تقول مشتاق لنبع الغرام
ده الحب . . مين داق منه قطره .. ارتوى

عجبى !!



يا ميت ندامه

يا ميت ندامه ع القلوب الخلا
لا محبة فيها ولا كراهه ولا
حتى يا قلبى الحزن ما عادش فيك
معلهش … لك يوم برضه راح تتملا

عجبى !!



يأسك

يأسك وصبرك بين إيديك وانت حر
تيأس ما تيأس الحياه راح تمر
أنا دقت مندا ومندا عجبى لقيت
الصبر مر وبرضك اليأس مر

عجبى !!



يا عندليب

يا عندليب ما تخافش من غنوتك
قول شكوتك واحكى على بلوتك
الغنوه مش ح تموتك إنما
كتم الغنا هو اللى ح يموتك

عجبى !!



ياللي بتبحث عن اله

ياللى بتبحث عن إله تعبده
بحث الغريق عن أى شىء ينجده
الله جميل وعليم ورحمن رحيم
إحمل صفاته … وانت راح توجده

عجبى !!



ياللي في حماه

يا للى ف حماه الشمس تلقى الملاذ
وألف بكره وبكره … فى ضلوعه لاذ
مين انت؟ مارد؟ رب؟ قال لأ ده بس
يا اللى باروى القمح واسقى الفولاذ

عجبى !!



يا كل كلمه

يا كل كلمة للعجب فى قاموس
انسكلوبيديا لسان عرب أو لاروس
تعالوا نجدة . ده لسه فى عصرنا
الشمس والبحر العريض بالفلوس

عجبى !!



يا ورده

يا وردة قلبى معاكى فى الريح لعب
لا تعبتى م الريح ولا قلبى تعب
احنا كده : نرتاح فى صخب الجنون
وفى السكون بنخاف قوى ونترعب

عجبى !!



يا خالق الكون

يا خالق الكون بالحساب والجبر
وخالقنى ماشى بلختيار والجبر
كل اللى حيلتى زمزمية أمل
وازاى تكفينى لباب القبر ؟

عجبى !!



يا ملونين البيض

يا ملونين البيض فى شم النسيم
لون الحنين والشوق وخمر النديم
ماتعرفوش سايق عليكو النبى
تلونوا الأيام بلون النعيم ؟

عجبى !!



يومي

يومى على الله تنتهى وتغيب
الشمس . وتعود تانى يوم لهاليب
زى الحياة . مأساه . ومن كترها
بقى لا انتهاءها وابتداءها عجيب

عجبى !!

دى بس الرباعيات للراحل العظيم
جزء يسير من أعماله لو عجبكم ممكن نكمل

فلقد وصلت اعداد أشعاره فى الرباعيات 160 رباعية
أما أشعاره وصلت إلى 52 قصيدة عامية
و الأزجال 59 قصيدة زجلية و الأغانى 55 أغنية
وكانت منوعاته الغنائية متعددة و وصلت إلى 37 منوع غنائى
و المسرحيات 7 مسرحيات دا غير الرسومات الكاريكاتورية .
Amany Ezzat غير متواجد حالياً