عرض مشاركة واحدة
04-03-2014, 11:31 AM   #584
SaMaR_ BakR
شريك محترف
stars-2-8
 
تاريخ التسجيل: Nov 2007
الدولة: cairo
المشاركات: 3,482

س 1 عرفينا بنفسك؟

سمر بكر
معلم تربية فنية
أدرس بمرحله الدكتوراه - تخصص معادن
زوجة وأم لطفلين - كلكلم عارفينهم كويس
وعارفين عمايلهم البيضا - هههههه



س 2- كلمينا عن الفن وكيف طرقتى بابه وفيما تخصصتى فيه؟
الفن بالنسبه لى ,, موجود فى كل شئ من حولنا -
أعتبره لغة يستخدمها الإنسان
لترجمة احاسيسه ومشاعره سلبيه كانت أو إيجابية -
لا يوجد فى العالم إنسان لا يتذوق الفن
ولكن لكل انسان درجة لهذا التذوق
طرقت بابه منذ ان كنت صغيره فى مرحله ابتدائي
كنت اجلس بجوار اخى الأكبر لأشاهده وهو يرسم
وكنت انبهر بقدرته على تمثيل وتوصيف الأشياء بالقلم رسما

بدأت شخصيا بالرسم - وبدأ التشجيع من مدرسيي فى مراحل التعليم المختلفه
إلا أن بدأت دراسته الأكاديميه فى تربية نوعيه بورسعيد
ومن بعدها ابيت التوقف عن الدراسة

تخصصت لفترة قصيرة فى النحت
ثم استقريت على التخصص فى مجال المعادن



س3--فن الحلى وصباعه الاكسسوارات المعدنيه عالم واسع ايه اللى عجبك فيه؟

فن صياغة الحلى والأكسسوارت
فرع من أصل علم تشكيل المعادن
عجبنى فيه هذا الكم الهائل من التنوع فى التقنيات
فدارس الحلى فى الغالب يدرس معظم تقنيات تشكيل المعادن
بما فيها التقبيب والطرق والصب
تقنيات قليله يختص بها علم المعادن
وتطبق على فروع أخرى مختلفه عن الحلى

كما أنه يمكنك اختيار 20 طالب من طلاب كلية التربية الفنية
وطرح نفس الخامات بنفس المقاسات
ولن تجدى منتوج أحدهم يشبه الآخر
هذا وقد وحدتى الخامات
مابالك لو تركتى لهم حرية الأختيار

بالإضافه إلى ,, جميل أن تتزيني بما تصنعه يديك


س4- كيف تعرفتى على ورد للفنون ؟

قصه طويلة شوية
ههههههههههه
واحدة صاحبتى قالتلى عليه فى البداية
ووصفتلى قد ايه انه رائع وخطير وهيعجبنى
المهم صاحبتى دى مش عضوه فيه اصلا
هههههههههههه

لكن كتبت اسمه غلط ومادخلتش على المنتدى ونسيت

بعدها قابلت استاذ محمد ورد
وقالى عليه وبرضه كتبته غلط ونسيت
ههههههههههههه

لغايه لما مرة اتفرجت على فيديو على اليوتيوب
فيه اعمال احد الأعضاء
كان عامل مجموعة جداريات رائعة
والفيديو كان مكتوب فيه اسم الموقع صحيح
فدخلت الحمدلله ,, وحمدلله على سلامتى
ههههههههههههه



س5- هل جربتى فن الديكوباج كلمينا عن تجربتك؟

أنا اتعرفت على الفن ده من المنتدى
اقصد التقنية والطريقة
وزودتنا بيه خبرة نانو الواسعة فى المجال ده
عرفت من موضوعاتها ومن لقاءاتها التليفزيونية
كمان الطريقة الصحيحة للصق
جربت بعدها وشاركت فى المنتدى باعمالى فيه
مثل :

فراشاتى تزور ورود العام الجديد

ديكوباج وعجينة سيراميك وحدات ديكور من اعمالي


طبعا الشئ بالشئ يذكر
فكرة أن شخص خبير فى عمل أو فن معين
وبيحاول نشر خبرته فى المجال ده دون بخل
دى من اروع الأحاسيس فى ورد
وما انساش طبعا استضافه نانو ليا
علشان اختار من النابكنز الخاصة بها
ومعاودة العرض تانى بعد وصول اى نابكنز جديدة
تستحق الذكر والشكر
شكرا لك نانو


س6 ماهى اهم الموضوعات التى جذبتك لمنتدى المطبخ؟

اقولك يا ستى
موضوع اتعلمت منه الشيكولاته المروار والدوناتس

حلويات شرقيه وغربيه فى دوره تعليميه بالصور
وكتير موضوعات لكن ده له ذكرى جميلة عندي
شكل انبهار اولادى بالحلويات مش بيروح من بالى



س7- شخصية اثرت فيك فى ورد للفنون من تكون وكيف اثرت فيكى؟

بصي يا منمن
كل فاكهه لها طعمها وتأثيرها عليكِ
ده مش رد دبلوماسي لكنه حقيقي

استاذ محمد ,, ايقونه المنتدى استاذي بيعلمنى كتير
آخد باله من بيتنا اللى ما نقدرش نستغنى عنه حتى لو يوم

زهرة الكاميليا وهذا الفيض المبهر من نظم الكلام
وصياغة الموضوعات الأكثر جفافا بطريقه مشوقه
لا يمكن تشعري بصحبتها بملل

هالة حبيبتى - مش عاوزة اكبرها
لكن احساسي بيها ام وحنيه جامدة جدا
مثقفه وفنانة وجواها كتير - لسه ما استغلتوش

نانو ,, دماغى
أو أنا دماغها زى ما بنقول لبعض
كتير اوى بنفكر زى بعض
مع فارق الخبره فى صالحها طبعا
ونشطاها المحمود ربنا يحميها
وضحكها اللى هى عارفه بيعمل فيا ايه
هههههههههههههه


أنت ,, المضيفه الأكثر روعة فى ورد للفنون
يعنى تعزمى كده بقلب جامد
وأنت عارفه انك تقدري تسدى
مش أكل وشرب ,, لأ
ترحيب واستهلال
مش بخيلة ,, وبرضه مش أكل وشرب
لأ مساعدة ومواساه - يعنى ما انساش أكتر من مرة
بتحسي من صوتى أن فيا حاجه
وتسالى وتحاولى تعرضى المساعدة


وكل الحبايب ,, من ورد
مبدعتى وهنوده ,, هناء ربنا يرجعها بالسلامة
وكل حبايبى الأعضاء لكل منهم نكهه وطعم خاص
بارك الله فيكم جميعا


س8- ماهو الفن الذى تحلمى بتنفيذه واتقانه؟
هى تقنية اتمنى ان اتقنها
تفنية الجمع فى المعادن
وهى باختصار تحويل المعدن المسطح لآنية ثلاثية الأبعاد

بدأت فعلا فى تعلمها ,, والله المستعان


س9- كلمه تقوليها لكل عشاق الفن
كيف نتقنه وننتج منه افضل واجمل الاعمال؟
لكل عشاق الفن ..
الفن يغدو أقوى وأكثر ثراءا
بتعديد التفكير فيه وفى رؤيته
زى ما بيقولوا كده رأيين افضل من رأى واحد
فكثير منا دارسين أو لا
يحسن من عمله الفنى بمجرد تلقى الآراء فيه
ومعرفه نقاط القوة والضعف فى كل عمل
برؤية انطباعات الآخرين فيه
ليس من الضرورى تنفيذ هذه الآراء
إلا أن اثراء العمل يتطلب تعديد التفكير
من خلال ثقافات مختلفة


تتقنيه إزاى :
تقرى كتير فى مجالات الفنون بشكل عام
تقرى اكتر فى مجال مستهويكِ جدا
تبدئى اى عمل بتخطيط
يعنى تصميم ,, تبقى قبل ما تبدئى فيه
عارفه خطوات واستراتيجيه العمل
وايه الأدوات والخامات اللى هاتحتجيها
فى مجال للتلقائيه فى العمل
لكن بنسبه مش متروكه على المشاع
حاولى تاخدى آراء المتخصصين
أو الهواه أو حتى المتذوقين
فيه افادة كبيرة جدا من تلقى الآراء


س10 خطواتك لانتاج عمل فنى كيف تكون
كلمينا عن طقوسك لاخراج عمل فنى جميل؟
فى البداية برسم تصميم
أو مجموعة تصميمات
اختار احسنهم وأقربهم تنفيذا لوجهه نظري
وبكتب على التصميم كل حاجه
الخامات، التقنيات، الطريقة ، الخطوات
بحضر الأدوات وببدأ التنفيذ
ممكن اثناء العمل اغير حاجات وممكن لأ
ولازم اعدل فيه بعد الأنتهاء منه
او حتى بعد انتهاءه وعرضه بفتره يتم التعديل فيه
ثقافة الأنسان بتجبره يتطور ويطور تعبيره
علشان كده ممكن تشيلى لوحتك من على الحيطه
وتحطيها بعد سنة على استاند التعديل

شكرا حبيبتى نورتى القهوة باجمل طلة
يااا اجمل سمر

الشكر كله لك
ولأهل الورد
فنور طلتكم تنير حياتى
تسلمى
__________________

signature

SaMaR_ BakR غير متواجد حالياً