عرض مشاركة واحدة
01-13-2014, 08:17 PM   #13
زهرة الكاميليا
شريك استاذ
stars-2-7
 
تاريخ التسجيل: Jun 2007
الدولة: مصر - اسكندريه
المشاركات: 2,663

صباح غد
14 يناير 2014
عيون العالم على مصر
وهى تستعيد نفسها .. ثورتها
مكانتها ..هويتها الأصيلة
تسقط حكما فاشيا ..
تخطو بكل ثبات على طريق بناء دولتها الحديثة
وتعلن أن القرار هنا
والجيش ..حارسها وحاميها
من بعد الله سبحانه وتعالى ..هنا
والشعب الذى بنى السد العالى
وآلاف المصانع والمدارس والمستشفيات
هو نفسه الذى يخوض غدا معركته
ويرفع راية الإستقلال ليقول للعالم أجمع
مصر صانعة المستحيل والأمل..هنا !
لن تثنينا تهديدات ..ولا وعيد
ولا تربص الأعداء
ولن نزرع فى أرضنا إلا الأمل
تتردد جملة القائد العام
للقوات المسلحة
الفريق أول
عبد الرحمن السيسى
فى هذه اللحظة الفارقة لشعب مصر
مصر فى رقبتنا كلنا !
مع كلمات الخال
عبد الرحمن الأبنودى
مش كل ورقة بتتمضى

ننتظر الغد القريب ..بلهفة ..بشوق ..



خلاص فهمنا من اللي فات
حكمونا حبة أغوات
دا بعد ماراح اللي راح
وبعد ما‏..‏ مات اللي مات‏!!‏

بحر الدقون
إللي غرقنا فيه وخان
ومازال يخون
وباعنا م الاربع جهات
لحيزبونة.. وحيزبون

كل اللي كوّع واللي بات
دلوقت وبيملوا السجون
يوم غيبونا في الكلام
يوم ما اشترونا في الحرام
بقزازة الزيت والسخام

تاجروا في فقرنا الرضى
ولاد الرضى
مش حلو كل من رضي
ولا كل ورقة.. تتمضي

إمضا.. خدتنا للغرق
كاس الهموم عبيّ وفضي
لازم نفتش في الورق
مش كل ورقة تتمضي

وقالولي: فيه دستور جديد
سرح دماغي في اللي فات
سرح دماغي بعيد.. بعيد
فسألت عن عدة حاجات
وقلت:' يا صحابي العزاز

حيستر البت اللي علي باب الجواز..؟
حيعالج الست اللي مرمية سنين
من غير علاج
عايشة.. لوان الروح يابوي
كام مره هربت م الجسد
حيجيب وظيفة للولد..
حيزود الكام لقمة لقمه
راح يحارب اللي فسد!..؟
ولا ميت سؤال طوال كإنهم أبد

'حيجيب لنا زعيم أسد
يرد حق الغلبانين
اللي ظلمهم الزمن
ويسد ريحة العفن
اللي بقالنا نشمها مدة ومدد..؟

ويفك حبل الظلم عن
رقبة أبوكم عب صمد

ما بدناش م العركة غير دستور كريم
شمس وهدي
يعوض الزمن اللئيم
اللي ابتدا
من ميتة البطل العظيم
ييجي استجابة للندا
وتزيح كفوفه المغسولين
الفاسدين والكدابين والظالمين
والمفجوعين
إللي كلوا لقمة عيالنا في جمعتين.. ؟

واللي بيتربص بحلم الملايين
واللي فتح دكانة بيبيع فيها دين
ولحي.. تداري.. عيون مريبة لراسبوتين

دستور أمين
حيجيب لنا حاكم كما شعبه يعيش.. ؟
ساعات معاه.. وساعات مافيش..؟
لو حتّمت ليام ينام علي فرش خيش..؟
ويبات.. ما يملاش بطنه عيش.. ؟
يحميها أرض.. وناس.. وجيش.. ؟
يفهم كلام عمك عليش

وليه ورا عيونه عين.. ؟
يكره هتاف' يعيش.. يعيش
ونيته مش نيتين
يردنا تاني نصدق حلمنا
وقصاد أعادي الأمة نفتح صدرنا
ويحس بينا لما يزهق صبرنا

إن كان كده حاحل بسناني الحبال
واخد( زبيده) والعيال
ونفك صوتنا اللي اتكتم
ونقول نعم
لكن( نعم) غير الـ.. نعم

نعم) اللي طالعة من هنا.. من قلبنا
ضد الوحوش الرابطة في سكك الصباح
ضد الحروب بالأجرة ضد الشعب
ضد الشماتة في المماته.. والجراح
وقزازة النار في إيدين الكلب

ضد اللي بيبيعوا الوطن
وهم فاكرينه كفاح
ضد اتفاق الأجنبي مع اللي خان
ضد اللي ما عرفوش مكانة المكان.
ضد اللي مش منا ولا نعرف له أصل.
ضد اللي بادلوا عصرنا بأغبي عصر

ضد اللي كارهين اسم مصر
ووش مصر.. وحس مصر
وفن مصر.. وعلم مصر!!
لملم فلولك واندفن تاني يا عم
ياللي مليتها نار.. ودم!!

نعم بصوت أجدادنا صاعد
م الثري
ثورتنا ما تعرفش تتقهقر ورا
إحنا صحيح بنحب لا
ياما علي صوتنا بـ لا
ياما علي صوتنا بـ لا
ودفعنا حق الـ( لا) سجون وقطع عيش
لكنما( نعم) النوبادي بألف لا
لم اللي عاوزين يوصلولها
بالكتاف
واجمع بناتك اللطاف..
عمي عيونكم الغرور..
ثرنا.. وكان لازم نثور
ما عادش في قلوبنا العجاف..
حتة تخاف.

حنقول( نعم) تفكر الدنيا..
بلحظة العبور
نعم تخلي الدنيا نور.. وخير عميم
غير انها حتجيب لنا رئيس عظيم
رئيس يفكرنا برئيس مصر القديم





نعم تزلزل البلد
نعمكو إنتو..
غير نعم
عبدالصمد!!



دمتم أعزائي بخير ..
وأصبحتم على أغلى وطن .
زهرة الكاميليا غير متواجد حالياً