عرض مشاركة واحدة
01-13-2014, 09:07 AM   #12
زهرة الكاميليا
شريك استاذ
stars-2-7
 
تاريخ التسجيل: Jun 2007
الدولة: مصر - اسكندريه
المشاركات: 2,663



قصيدة
موتوا ..أو إتحدوا
عبد الله حسن .


هند
ماباقاش بيجي مع الحمام
فوقوا
و اللي طبخ بالسم.. بيأكّل ولا يدوقه
و فوق في السما
فيه ناس بتبص علي اهليها ليل و نهار
بيكلموهم عنّهم .. بيطمنوهوم عنّهم
من بعد ما نسيوا يقولوا اسمهم
في نشره الاخبار
فى جنّة تجري في عرضها الأنهار
قاعدين هناك شايفين
كل اللي تاجروا بدمهم جايين
كل اللي خاضوا في عرضهم جايين
يوم الحساب ولا حد راح يفلت ثواني من العذاب

بس الأهم و احنا هنا في الدنيا
ماله شكلنا في ايدينا دم ؟

يا رب انا ماقتلتهوش لكن سكتت
يارب انا ماقتلتهوش يمكن غلطت
يمكن في وسط كلامي قولت ايه يعني عادي
يمكن عشان موت البشر في بلدنا عادي
يمكن عشان اما هموت هيقولوا عادي

هو احنا ليه في ايدينا دم
هو احنا ليه دايسين في دم
هو احنا ليه أشكالنا أشبه بالغيلان

هو احنا ليه سكتنا
علي غزو العراق و علي الجولان
و علي السودان و علي الشيشان
و علي الصومال
باسم النضال
كفنّنا ميت مليون شهيد
و صرخنا قولنا مكملين
رغم العذاب رغم الجراح
و قعدنا في بيوتنا نألّف ميت كتاب
و حفظنا احكام النكاح !

و الدين بقي بالنسبه لينا كلنا
وفّق ولاة أمورنا
فطبيعي جدا انهم برّة يغاروا مننا
ده احنا العرب
ده احنا بلاد الشرق مهد المعجزات
احنا التاريخ لكن بلا حاضر
علشان بناكل بعضنا
و دة اللي عاملينه هناك
و دة اللي عايزينه هنا

زمن الحروب يا ابني انتهي
ماهوش بحاجه انه يحرك جيش
مادام سيادتك بالشياكة و بالأدب بتضُر بلدك
بالهتاف ياللعجب
بتموت قصادي الف مرة عايزني اعيش

بتقوللي حرية و كرامة ليه مافيش
علشان سيادتك لما بترخص بلد
انت كمان بتكون رخيص

علشان هتفنا الشعب أسقط النظام
اشرب بقي وماتقولش لا
ادي النظام لما سقط
ماسقطش وحده انما واخدك معاه

قُصر الكلام انت النظام
و انت اللي سقّطته و انت بتنشئه
و انت اللي غميت في عينيك جنبك و هما بيحرقوا
و انت اللي بجهل ساعدتهم يتحاموا فيك او يسرقوا
ماتقولش سرقوا الثورة مني و كنت جاهل
ده انت المناضل اللي نافش ريش
عم النشيط المتفائل
قالوا الجعان يحلم بسوق العيش
عمرك لاقيت واحد مع بقال
بيقول له نص دييمقراطيّة
و رُبع عدل و بجنيه كرامة
بتقول لمين قبل اما تلبس في الكوفية
و تاخد حبّاية الشجاعة
اسأل ابوك المحترم رباك منين و عمللك ايه
اسأل ابوك و امك تحاملوا قد ايه علي نفسهم
علشان تدوق طعم الهنا
اتغربوا كدة كام سنة
علشان سيادتك لما تكبر بكل كِبر و عنجهة
رافض تعيش جوا البلد رافض البلد
و تقوللي بكرة هتبقي احسن
ازاي وانا شايف ولد عمال يهد
عمال يشد و يتفرد علي اقرب الناس ليه

حق الشهيد
عمره ما يرجع بالكلام ولا الاعتصام
ولا اني ازود في عداد الميتين
و اقفل بيبان ..الحق بان وانت حافظلك كلمتين
نكتة و بقت ماسخه و مابتضحكش

عارف عدوي مهما يتدارى و يلبس ألف وش
عارف هيتدارى معانا في وسط لمّة
عارف هيقنعني بموتي و عنده ألف مُسمى
حق الشهيد حق الجهاد
كتروا العبيد احنا في مزاد
و الكل مربوط من رقبته في الجثث

و الكل نصّب نفسه للثوره حرس
و الكل ماشي بالجرس

الائونا .. الاديو .. الاتريه ..
عم النشيط انا مش هقولك خدت كام او ايه

الائونا .. الاديو .. الاتريه
البيت بيولع و انت ماسك اخوك
النار بتمسك فيك و تمسك فيه

الائونا .. الاديو .. الاتريه
مين يشتري بلدي و تسوي قد ايه
لتر دم و بالتعود عَشَرة لتر و مين يزود

اقدم بلد في الدنيا تسوي كتير
مية .. ألف .. اتنين .. تلاتة
و احنا خيال الماتة نخوّف العصافير
وحوش يا دوب علي نفسنا
و فيران بقالنا كام سنة بنتزق علي طوابير

وقف انتحاري تاني و قصاده كاميرا ياباني
و سلاحه روسي الصنع
وقف يقول الشهادة
هقتل عبيد البيادة

ماتفوق بقي اسمع
الشيخ فلان الفلاني عربيته الماني
و الساعة Made In Switzerland
و موباليه فنلندى
حواليه خدم هندي أشبه خدم كسرى
و سبحته صيني
و حذائه ارميني و العطر باريسي
يقعد علي السفرة ويقول
بلاد كافرة بتساعد السيسي !!

و الزهد و الزاهد و الكل بيزايد
و انا روحت في الهوجة
منهي و انا ببدأ
حتّى وانا بغرق ملعون من الموجة
سجّل انا عربي
و كأنني قاتل قتيل وكانها سبّة
سجّل انا عربي
و اسمي للنسيان و حياتي للغربة
سجّل انا عربي
انا من بلاد الضاد
انا من بلاد التضاد و كأننا غُربا
سجل انا عربي
دستورنا هو العناد
صرخ الولد في البلاد لما اتنبح صوته
سجل انا عربي
و الاحتلال اهو عاد بمساعدة الاوغاد
اتّحدوا أو موتوا !


[YOUTUBE]7R1-g8UGVI0[/YOUTUBE]
زهرة الكاميليا غير متواجد حالياً