منتديات ورد للفنون  
Freedom-4-Shady-Ward

العودة   منتديات ورد للفنون > منتديات ورد المتخصصه > منتدى مطبخ ورد للفنون

منتدى مطبخ ورد للفنون وصفات طبخ سهله ووصفات طبخ بالصور ووصفات اشهى ماكولات وصورها مع الطرق المختلفة لاعداد الاطباق الرئيسيه واطباق الحميه

اشهى طبخه واسهل وصفه من المطبخ العالمى

اشهى طبخه واسهل وصفه من المطبخ العالمى
إضافة رد
 
أدوات الموضوع
قديم 06-02-2012, 03:18 PM   #1
منى سامى
ward2u مراقب عام
ward2u
ward2u
 
تاريخ التسجيل: Oct 2007
الدولة: عيد ميلادك احلى عيد
المشاركات: 12,311
منى سامى is on a distinguished road
افتراضي اشهى طبخه واسهل وصفه من المطبخ العالمى

ward2u



يمتاز المطبخ العالمى


بأشهى المأكولات واسهلها


واليوم اخترت لكم اشهى واسهل


30 وصفة من المطبخ العالمى


بطريقة التنفيذ والمفادير والشرح الوافى


اتمنى ان ينال رضاكم



اولا-- مع المطبخ الكندى


وصفة-سالمون مع صوص الصويا مطبوخ بخشب الأرز


.. Cedar Planked Salmon







الوصفة اللي بسوي اليوم جدا تقليدية


خصوصا في غرب كندا.


الوصفة عبارة عن سمك سالمون


مطبوخ فوق خشب أرز ومدهون بصوص مصنوع


من الميبل و الصويا.


السالمون للي ما يعرفه نوع سمك دهني جدا جد


ا لذيذ واحد من ألذ الأسماك بالنسبة لي


عكس السمك الأبيض السالمون له طعم


واضح ودايما رطب عشان الدهن اللي فيه


الميبل عبارة عن شيره تطلع من نوع شجر معين


هذي الشيرة جدا لذيذه وهي مكون أساسي


في الأكل الكندي


(لدرجة إنهم حاطين ورقة الشجر حقتها عالعلم !).


الخشب بيعطي السمك نكهة دخان خفيفة


تشبه السالمون المدخن تقريبا.


خشب الأرز هو اللي بستخدم اليوم بس


أي خشب قوي ممكن يستخدم أهم شي


ما يكون معالج يعني يكون طبيعي ١٠٠٪.


السالمون بعد موب ضروري لهذي الوصفة


تقدرون تستخدمون دجاج مع الجلد و العظم


أو حتى السمان أو الحمام بيكون رهيب بهذي الطريقة.



المقادير :



كوب ميبل سيرب maple syrup (يسمونه الظاهر شراب القيقب )


ملعقتين كبار زنجبيل مهروس أو مبشور


٥ ملاعق كبيره عصير ليمون


٣ ملاعق كبيره صوص صويا


فصين ثوم مفرومه


كيلو فيليه سالمون


قطعة من حطب الأرز الغير معالج تكون أطول شوي من السالمون


بصل أخضر مقطع على زاوية


* خشب الأرز مقطع جاهز متوفر عندنا في السوبرماركت



الطريقة :


نخلط الميبل مع الصويا و الزنجبيل و الثوم



و عصير الليمون وشوي ملح وفلفل في


قدر ونخليه يطبخ على غلية جدا خفيفه


إلين ينقص ويصير الخليط تقريبا ٣/٤ كوب تقريبا نص ساعة.


نشيل الخليط من النار ونخليه يبرد شوي.


نسخن الفرن ل ٣٥٠ بعدين ندهن الخشب


لو كنا بنستخدم بزيت زيتون. ندخل الخشب الفرن


ونخليه تقريبا ربع ساعة. الهدف هنا


هو إننا نطلع شوي من نكهة الخشب


عشان تدخل بسرعة في السمك.


نطلع الخشب من الفرن ونفرش الخشب


بشوي بصل أخضر بعدين نحط شريحة


السالمون عليها. نرش ملح وفلفل على


وجهين السالمون بعدين ندهن بفرشة شوي


من الصوص عليه من كل الجوانب. ندخل الخشب


وفوقه السالمون عالفرن ونخليه إلين يستوي


تقريبا ٣٥ دقيقه إذا كان بالخشب أو ٢٠ دقيقه إذا كان بصينية فرن.


نوزع السالمون عالصحون ونقدمها مع زيادة من الصوص الباقي .










ثانيا-- المطبخ الامريكى


ووصفة-- تيكساس تشيلي .. Texas Beef Chili








فكرة الناس عن الأكل الأمريكي مغلوطة ومشوشة ،

أغلب الناس يعرف الأكل الأمريكي إنه همبرجر وبطاطس و أي شي جاهز ،


سريع ، ماله طعم ومضر بس هذي الفكرة خطأ !.


الأكل الأمريكي جدا متنوع ومختلف.بسبب المهاجرين


هذول المهاجرين أختلط أكلهم التقليدي


بمكونات جديده عليهم لقوها في موطنهم الجديد


ومن هنا بدأ يتشكل مفهوم الأكل الأمريكي.


المهاجرين توزعوا مع الوقت في


مناطق مختلفه وفي كل منطقة كانت فيه مكونات مختلفه ،


وفرة في الأكل البحري في الشمال الشرقي


و الغربي ، مراعي ممتازة في الجنوب و الوسط


مناطق زراعية ممتازة في الوسط و الغرب


فواكة إستوائية في الجنوب الشرقي وغيرها كثير.


بعد كذا نلاقي تأثير المهاجرين اللي جو في الفترات


اللي بعدها مثل المهاجرين من الصين و اليابان في غرب أمريكا و المهاجرين


الإيطاليين و اليهود في الشرق و العبيد الأفارقة في الجنوب


و طبعا مهاجرين كوبا و المكسيك في جنوب أمريكا .


هذي العوامل كلها خلت الأكل الأمريكي جدا


متنوع ومن الظلم إننا نتعامل معه كأكل دولة وحده بس .



نقدر نقسم الأكل الأمريكي لعدة مطابخ


عندنا أول شي أكل منطقة نيو إنجلند


new England في الشمال الشرقي


أكل نيو إنجلند يعتمد على الأكل البحري أكثر شي


وهو قريب من الأكل الفرنسي في طرق الطبخ


بعدين عندنا أكل نيورك new York اللي يعتبر


أكل عالمي تقريبا مع أثر واضح للأكل اليهودي و الإيطالي عليه


بعدين عندنا أكل فلوريدا في الجنوب الشرقي


وهو أكل إستوائي أو كاريبي يجمع بين عدة مطابخ


كاريبية مع أثر جدا قوي من الأكل الكوبي


بعدين عندنا مطبخ الكيجن و الكريول Cajun , Creole


وهي واحد من أكثر المطابخ في أمريكا تطورا


الكيجن هو أكل ولاية لويزيانا


و الكريول هو أكل ولاية نيو أورلينز، سبب تطور هذي


المطبخين بالذات هو إن هذي الولايتين كان فيها


كمية كبيره من المهاجرين الفرنسيين وفي هذاك


الوقت كانوا أسياد الطبخ في العالم و ساعدوا


على تطور أكل المنطقة. في الكريول و الكيجن


نلاقي طرق طبخ وصوصات فرنسيه دخل عليها


مكونات أمريكية فنلاقي مثلا فلفل حار ( أمريكي )


مع زعتر بري ( فرنسي ) ونلاقي أمثلة من أكلات


فرنسيه كثير بنكهات أمريكية و أكلات نشأت


في هذيك المنطقة مثل الجمبو gumbo و الجمبلايا


عندنا بعدين أكل ممفيس و ميسسيبي و المناطق


اللي حولينها وهنا نلاقي أكل أبسط شوي يعتمد على


البقوليات و اللحوم و الذرة بشكل كبير و غالبا مبهر بقوه


إذا تبون تتخليلون طعم الأكل اللي في هذي المناطق


تذكروا الباربيكيو صوص هذي تقريبا هي النكهات الموجوده


بعدين عندنا تيكساس و التيكس ميكس


تيكساس يكثر فيها مزارع البقر بشكل كبير


وعشان كذا أكلهم يستخدم لحم البقر بكثره


تيكساس بعد قريبة من المكسيك و هنا طلع


نوع أكل جديد اللي هو التيكس ميكس


اللي يخلط بين الأكل المكسيكي و أكل تيكساس


التيكس مكس يمكن هو الأكل المكسيكي


اللي أغلب الناس يعرفونه من المطاعم زي تشيليز وغيره


أخيرا عندنا مطبخ كاليفورنيا و خليج سان فرانسيسكو


هذي المناطق غنية بالمنتجات الزراعية


وفي نفس الوقت قريبة من البحر ومن المكسيك


و فيها نسبة مهاجرين من الصين و اليابان وهاواي


كبيره جدا .. عشان كذا نلاقي إن أكلهم


خليط شوي غريب من كل هذي الثقافات .



التشيلي ممكن تتسوى بدجاج أو أي نوع لحم


أو حتى ببقوليات زي الفاصوليا وغيرها يعني تكون نباتيه


الشي المشترك بين كل وصفات التشيلي


هو إنها حاره أو فيها لذعة ومبهرة بشكل قوي.



المقادير :



كيلو ونص لحم بقر قاسي من منطقة الصدر


أو الرقبة أو حتى الرجل. مقطع مكعبات.


حبة بصل كبيره مقطعة أجنحة


فصين ثوم مقطعة شرايح


ملح وفلفل أسود


ملعقة كبيرة خل تفاح أو عنب


علبة بيرة بدون نكهة !


علبة صلصة مكسيكية salsa اللي تجي ٤٥٠ جرام


علبة فاصوليا حمراء مصفيه ومغسولة


٣٠ حبة تقريبا شبس تورتيا


حبتين فلفل تشيبوتلي chipotle ( فلفل هالبينو مدخن ) مع ملعقة كبيره من الصوص


اللي محفوظة فيه


ملعقة كبيرة معجون طماط


ملعقة كبيرة كمون


نص ملعقة كبيره فلفل أحمر مطحون


نص ملعقة كبيرة بابريكا


نص ملعقة كبيره أوريجانو


للزينة :


ساور كريم


بصل أخضر مقطع على زاوية


ورق كزبرة


جبن تشيدر أو موتري جاك مبشور



الطريقة :


نسخن قدر ضغط على حرارة أعلى من الوسط



بشوي تقريبا دقيقتين ، بعد ما يسخن نحط شوي


زيت بعدين نحط نص كمية اللحم مع رشة ملح


وفلفل ونطبخ اللحم إلين يتحمر من كل وجه مع


التحريك من وقت لوقت بعد ما يتحمر كله نشيله


في صحن ونحط زيادة زيت ونحمر باقي اللحم بنفس


الطريقة. بعد ما يتحمر كل اللح


م نشيله على صحن بعدين ننزل الحراره لحرارة


هادية ونحط شوي زيت لو أحتاج بعدين نحط


البصل و نطبخة إلين يذبل وبعدين نحط الثوم


ونطبخه إلين تطلع ريحته شوي.نحط الخل


ونمسح القطع البنية من قاع القدر.


نرجع اللحم للقدر بعدين نحط الصلصة ، الفاصوليا


شبس التورتيا بعد ما نكسره بيدنا شوي


التشيبوتلي ، معجون الطماط و البهارات


ونزيد مويه للحم إلين تغطي اللحم. نرفع


الحرارة لأعلى شي ونحط الغطا و السدادة


حقت قدر الضغط و أول ما يبدأ يطلع صوت


ننزل الحراره للوسط (أو حسب كيف يستخدم قدر الضغط


اللي عندكم ، كل قدر ضغط غير ) بعدين نطبخ


اللحم تقريبا ٣٠ دقيقة أو إلين يستوي اللحم ويصير لين


نشيل القدر من النار ونفتح الصمام


أو نحط القدر كله تحت مويه بارده بعدين


نفتح غطا قدر الضغط. نذوق اللحم و البهار


ات ونعدل حسب الرغبة بعدين نقدمها


مع الإضافات اللي تحبون وزيادة تورتيا عالجنب


زي ما تشوفون الأكله جدا


سهلة وما تاخذ وقت أبدا ..


تقدرون تسوون نفس الشي بقدر عادي


بنفس الطريقة بالضبط حطوا كل شي بالقدر


زي ما سويت وخلوه يطبخ


على حرارة هادية إلين يصير اللحم لين مره تقريبا


ساعتين ونص إلى ثلاث ساعات.


منقول بتصريف لعموم الفائده
منى سامى غير متواجد حالياً   رد مع اقتباس
قديم 06-02-2012, 03:22 PM   #2
منى سامى
ward2u مراقب عام
ward2u
ward2u
 
تاريخ التسجيل: Oct 2007
الدولة: عيد ميلادك احلى عيد
المشاركات: 12,311
منى سامى is on a distinguished road
افتراضي

ثالثا مطبخ موزمبيق : بيري-بيري شرمب



الأكلة اللي بسويها اليوم إسمها بيري
بيري شرمب أو ربيان بصوص البيري بيري

الأكلة جدا لذيذة وجدا سهلة و سريعة
هي عبارة عن ربيان
سوتيه مع صوص بيري بيري

البيري-بيري نوع من أنواع
الفلفل الحار الأفريقي يستخدم
بكثرة في دول شرق أفريقيا

و حتى دول شمال أفريقيا زي تونس و المغرب
اللي يستخدمونه في عمل صوص “الهريسة”.



المقادير :
لصوص البيري-بيري :
٤ حبات فلفل أحمر حار . يفضل فلفل بيري-بيري

بس أي فلفل حار أحمر ينفع.
٣ فصوص ثوم مفرومه.
ربع كوب عصير ليمون
كوب زيت زيتون
ملعقة صغيرة بابريكا ويفضل لو بابريكا مدخنة
للربيان :
نص كيلو ربيان كبير منظف.

شوي زيت
بقدونس مفروم
* في الربيان لكم الخيار تقدرون تخلون
القشر و الراس أو تشيلونهم
القشر بيعطي الربيان طعم حلو ويحميه من إنه ينشف
و الراس لذيذ للأكل ( نعم الراس ينوكل !).
* الصوص هذا حار ! ، الخيار لكم إذا تبون الصوص
أبرد شيلوا البذور حقت الفلفل أو شيلوا جزأ منها.
الطريقة :
للصوص :

نحط الفلفل مع الثوم و الليمون و البابريكا
في خلاط ونطحنهم. و الخلاط شغال نزيد
الزيت شوي شوي بعدين نذوق الخليط ونعدل حسب الرغبة.
للربيان :
نتبل الربيان في صوص البيري-بيري

نص ساعة بالكثير ! أكثر من كذا
الحمض اللي في الليمون بيبدأ يطبخ الربيان
ننشف الربيان من التتبيلة في
مناديل رول ونحاول نجففه قدر الإمكان.
نسخن مقله ستانلس على حرارة أعلى من وسط بشوي.
و المقلة قاعدة تسخن نرش الربيان

عالوجهين بالملح وشوي فلفل أسود
نحط شوي زيت في المقله ( زيت نباتي عادي )
بعدين نحط الربيان ونخليه يطبخ إلين
يقلب الوجه الأول برتقالي بعدين
علطول نقلبه ونطبخ الوجه الثاني
إلين يقلب برتقالي ولا دقيقة أكثر.
نعصر شوي ليمون لو نبي

ونحط البقدونس ونقدمه علطول



مطبخ السينيغال : الشوربة السينيغالية
Senegalese Soup


أكلة اليوم عبارة عن شوربة سينيغالية باردة
مع صوص تشتني أناناس ( مربى مع بهارات ).
الشوربة هذي يمكن فكرتها غريبة
شوي للبعض وبعيدة عن كل شي

يربطونه بالشوربة بس أضمنلكم إنها
جدا جدا لذيذة و الهدف من الفعالية نجرب شي جديد لاتنسون.
الشوربة هذي عبارة عن شوربة خضار

وتفاح ومطعمه بالكاري، الشوربة أنا مقدمها
باردة و أنصحكم تجربونها باردة بس تقدرون
تقدمونها حاره لو تبون. كثير ناس يستغرب
من فكرة الشوربات الباردة بس هي شي موجود ومنتشر.
لو جينا للصراحة إحنا أكثر ناس في العالم

مفروض نشرب شوربات باردة مع الجو الرهيب اللي عندنا.



الحرارة تأثر على اللسان وقدرته في
إنه يستشعر الطعم عشان كذا نفس الأكله
يختلف طعمها وهي بارده عنها وهي حارة
جربوا هذي الشوربة في
الحالتين وشوفوا كيف الطعم يفرق

مع العلم إنها نفس الشوربة. الصوص
اللي بنسويه مع الشوربة هو تشتني أناناس
تشتني يعني تقريبا مربى مطعمه ببهارات هي

أي صوص يكون حامض ، حلو ، حار وفيه طعم فواكه
ويمشي مع الشوربة هذي بشكل رهيب بس هو إختياري.


المقادير :
للشوربة :
٣ حبات تفاح أخضر مقطعة مكعبات

حبتين جزر كبار مقطعه
حبة بصل مقطعة
ملعقتين كبار زبدة
١/٤ كوب زبيب
فص ثوم مقطع
٣ ملاعق كبيرة بودرة كاري
ملعقتين كبار طحين
٨ أكواب مرق دجاج من نوعية
جيدة ويفضل صناعة بيت
ملعقة كبيرة معجون طماط
١/٢ كوب كريمة
للتشتني :
١/٢ كوب بصل مقطع مكعبات

١/٢ كوب عسل
١/٢ كوب خل عنب
كوبين ونص أناناس مقطع مكعبات
ملعقتين صغار بودرة كاري
١/٢ ملعقة صغيرة زنجبيل
١/٢ ملعقة صغيرة ملح
ملعقة صغيرة فلفل أحمر مجروش
* مرق الدجاج ضروري
و أساسي لأي شوربة ناجحة
مافيه شي راح يعطي نفس الطعم
العميق و القوام الثقيل اللي المرق يعطي للأكل.
الطريقة :
للشوربة :
نطبخ البصل و الجزر و التفاح و الزبيب و الثوم

في الزبدة مع رشة ملح على
حرارة وسط إلين تذبل
نضيف الكاري ونطبخ دقيقة زيادة بعدين
نحط الطحين و نطبخة زيادة دقيقتين تقريبا
الحين نحط معجون الطماط ونطبخة شوي بعدين
نحط المرق ونخليه يطبخ على غلية جدا خفيفة

و القدر مغطى ساعة و عشرين دقيقة تقريبا
نشيل الغطاء ونحط الكريمة ونخليه يطبخ
على غلية خفيفة ١٠ دقايق زيادة بعدين نذوق
الشوربة ونعدل الملح و البهارات لو أحتاجت
نطحن الشوربة في خلاط على دفعات بعدين
ندخلها الثلاجة إلين تبرد تماما وتصير
باردة مره ونقدمها مع الصوص أو دجاج مسلوق.
للتشتني :
نحط مقادير التشتني كلها في قدر ونخليها

تطبخ على غلية خفيفة إلين تثقل ويصير
الأناناس لين مره. التشتني ينحفظ في الثلاجة
أسبوع تقريبا أو ممكن يتفرز لو تبونه
لوقت أطول هو رهيب مع أكلات كثير مره.
منى سامى غير متواجد حالياً   رد مع اقتباس
قديم 06-02-2012, 03:24 PM   #3
منى سامى
ward2u مراقب عام
ward2u
ward2u
 
تاريخ التسجيل: Oct 2007
الدولة: عيد ميلادك احلى عيد
المشاركات: 12,311
منى سامى is on a distinguished road
افتراضي

مطبخ تونس : ستيك بصوص الهريسة ..

Harissa Marinated Top Sirloin

كلة اللي بسويها اليوم مأخوذة من النكهات التونسية بس
هي موب أكلة تونسية تقليدية
الأكلة عبارة عن ستيك توب سيرلوين متبل بهريسة
ومشوي ومقدم مع صوص مصنوع
بعد من هريسة وزبادي عشان تخفف الحرارة شوي
تقدرون تعتبرون الأكله فهيتا تونسية إن صح التعبير
الهريسة عبارة عن معجون تونسي حار
مصنوع من فلفل حار وبهارات ومستخدم
بكثرة في أكل شمال أفريقيا ( وواحد من أحلى المكونات الجديدة علي ).
المقادير :
للستيك :
كيلو ستيك توب سيرلوين Top Sirloin
٦ ملاعق كبيرة زيت زيتون
٤ فصوص ثوم مهروسة
ملعقتين كبار سكر بني
ملعة كبيرة هريسة
ملعقتين كبار خل عنب
ملعقة كبيرة زعتر بري طازج Thyme أو شوي أوريجانو مجفف
للصوص :
ملعقة كبيرة هريسة .
ملعقتين كبار زيت زيتون
ملعقتين كبار مويه
عصير ليمون أو خل
* أي نوع ستيك تحبون ينفع هنا
بس الطعم ماراح يكون نفس الشي
نحتاج هنا ستيك بطعم قوي عشان يمشي
مع النكهات القوية اللي حاطين هنا.
التوب سيرلوين و الفلانك
أو السكرت ستيك skirt or flank هي أفضل قطع هنا
هذي القطع رخيصة وقاسية ( إذا ما أنطبخت صح)
أكثر من أنواع كثير ثانية زي الريب آي
أو الفيلية بس طعمها أقوى بكثير
كونها قاسية مهم جدا نطبخها صح !
عشان تصير لينة.



لتوب سيرلوين زي ما أنتم شايفين
في الصورة وين مكانة. غير التوب سيرلوين
تقدرون تستخدمون الفلانك flank أو ال plate
وكلها واضح وين مكانها في الصورة
في حال مالقيتوا هذي القطع فأكيد أكيد
فيه سيرلوين في أي محل sirloin
وهو بديل جيد و متسامح أكثر من هذي القطع.
* الهريسة موجودة في كل سوبرماركت في العالم
هي تجي في علبة زي علب
الصلصة أو أحيانا تكون في معجون.



الطريقة :
للصوص :
نخلط مقادير الصوص مع بعض ونذوق إلين نوصل للطعم اللي نبي.
للستيك :
نخلط الهريسة مع الزيت و الخل و السكر البني
و الثوم و الزعتر ورشة ملح وفلفل أسود
في صحن ونتبل الستيك فيهم على حرارة الغرفة ساعة.
نطلع الستيك من التتبيلة وننشفة
بشكل خفيف بمناديل رول بعدين
نرش شوي ملح وفلفل عالوجهين
نشوي الستيك ونريحة ونقطعة بالضبط
زي ماشرحت في موضوع الفاهيتا
نقدم الستيك مع الصوص و مع شوي زبادي
مخفف بمويه عشان يخفف الحرارة
لو حابين ورز أو كسكسي أو حتى بطاطس عالجنب.



أسبانيا : بلح البحر ( مسل ) بالزعفران ..
Mussels with Leeks and Saffron


المطبخ الأسباني واحد من أهم المطابخ حولين العالم.
لو نظرنا للمطبخ الأسباني
راح نلاقي إنه يميل للنكهات القويه أكثر من الهادية .
إذا تبون تتخيلون الطعم ، تخيلوا
المطبخ المكسيكي مع الشمال أفريقي
و الفرنسي وبعد أكل البحر
المتوسط في طبق واحد وهذي هي النكهة الأسبانية تقريا.
الطبق اللي بسويه اليوم جدا سهل
هو عبارة عن بلح البحر أو المسل mussels
مطبوخة بالبخار مع صوص بنكهة أسبانية
المسل نوع من أنواع الصدفيات زي المحار تقريبا
بس طعمه مختلف شوي ، يجي بقشرة
سوداء أو في حالات نادرة تكون مايلة للخضرة
مدري الصراحة عن توفر المسل عندنا
في السعودية ( ولازم تكون حية !! )
بس في حال ما لقيتوها تقدرون تستخدمون
المحار العادي ( بعد لازم يكون حي ).


المقادير :
ملعقتين كبار زبدة
حبتين كراث كبيره ( كراث هندي )
منظفة ومقطعة شرايح نحيفة. الجزأ الأبيض بس .
تقريبا ٥٠ حبة مسل mussels منظفة
ملعقة صغيرة خل عنب أبيض أو عصير ليمون
شوي زعفران
رشة بابريكا
١/٢ كوب قشطة خفق
بقدونس مفروم للتزيين
خبز فرنسي أو إيطالي محمص للتغميس
* الكراث الهندي طعمه تقريبا زي البصل
بس أهدأ و أحلى شوي. تقدرون تستخدمون
بصل أخضر أو حتى بصل عادي كبديل
إذا جيتوا تستخدمون الكراث الجزأ المستخدم
هو الجزأ الأبيض و الأخضر الفاتح بس
في هذي الوصفة نبي بس الجزأ الأبيض.



* إذا ما لقيتوا مسل تقدرون تستخدمون
محار أبيض عادي أو أي نوع محار
ثاني أهم شي تأكدوا إنه حي و يفضل تطبخونه بنفس اليوم.
أول ما تشترون أي صدفيات شيلوا الحبات اللي قشرتهم مكسوره.
بعدين إذا لقيتوا حبات مفتوحة أضربوها ضرب
خفيف و إذا ما قفلت الفتحة يعني إنها ميتة و أرموها بعد.
إذا كنتوا بتحفظون الصدفيات حطوها
في صحن و حطوا فوقها منشفة مرطبة
بمويه وحطوها في أبرد مكان في الثلاجة
لاتغطونها في مويه ولا تحفظونها في الفريزر و طبعا
لا تحطونها في كيس في الثلاجه تذكروا إنها ماتزال حية.
الشروط اللي ذكرت فوق لا تتهاونون فيها
أبدا لأن التسمم من الأكل البحري موب موضوع هين أبدا.
* تنظيف المسل mussels : إذا سويتوا الخطوات
اللي فوق وشلتوا الحبات الميته
و اللي قشرتها مكسوره غالبا التنظيف
موب ضروري خصوصا إذا كانت المسل
من مزرعة بس التأكد حلو. عشان تنظفون
المسل حطوها في مويه باردة
قبل الطبخ بنص ساعة ، المسل راح تشرب المويه
وراح تطلع أي غبار أو شي موجود داخلها
بعد النقع صفوها من المويه و أمسكوها
حبة حبة و شيلوا أي أشياء عالقة فيها
زي الطحالب أو غيرها بإستخدام فرشة قويه
بعض الحبات راح تلاقون عالجنب
فيه زي “الشنب” طالع أنتفوه بإنكم
تسحبونه وبيطلع معكم بسهولة
تنظيف المسل
لازم يصير قبل الطبخ بفترة قصيرة
لأن المسل تموت إذا راح الشنب.
الطريقة :
المسل أسهل و أسرع شي في العالم ينطبخ
وقت الطبخ مايتعدى ١٠ دقايق .
نذوب الزبدة على حرارة وسط بعدين
نحط الكراث مع رشة ملح إلين يذبل
نحط الخل ونطبخة إلين تقريبا يتبخر
بعدين نحط الكريمة و الزعفران و البابريكا
ونخليها تطبخ على حرارة هادية إلين تنقص شوي
الحين نحط المسل و نغطي القدر
ونخليها تطبخ تقريبا ٥ دقايق إلين تفتح المسل معنا
نشيل الحبات اللي ما فتحت بعدين نرش ملح
وفلفل حسب الرغبة و نزينها بالبقدونس.
منى سامى غير متواجد حالياً   رد مع اقتباس
قديم 06-02-2012, 03:25 PM   #4
منى سامى
ward2u مراقب عام
ward2u
ward2u
 
تاريخ التسجيل: Oct 2007
الدولة: عيد ميلادك احلى عيد
المشاركات: 12,311
منى سامى is on a distinguished road
افتراضي

فرنسا : بوبيت السمك مع صوص الربيان ..
Crisp Paupette of Cod with Shrimp Sauc


مميزات المطبخ الفرنسى
فرنسا بدون أي شك هي عاصمة الطبخ
في العالم كل شخص يطبخ في أي مكان
في العالم إلا ويكون أستخدم شي له علاقة بالمطبخ الفرنسي
سواء كانت أدوات ، مكونات ، طرق طبخ ، أو حتى أطباق.
مافية مطبخ أثر على الأكل إلى يومنا زي المطبخ الفرنسي.
قبل الثورة الفرنسية المطبخ الفرنسي
ماكان مختلف بشكل كبير عن باقي المطابخ الأوروبية في هذيك الفترة.
كان الطباخين مجرد عمال في قصور النبلاء
بدون أي صلاحيات أو حرية وكان التركيز غالبا على الحفلات الكبيرة
و الأطباق المبالغ فيها و المكلفة




في هذيك الفترة، كانوا مثلا يحشون وزة ببطة
ويحشون البطة بدجاجة ويحشون الدجاج بحمام !! كانوا مثلا
يحمرون ١٢ دجاجة ويستخدمون حبة وحدة منهم للأكل و الباقي
يعصرونه في عصارة كبيرة ويستخدمون مويتها كصوص !
وكانوا أغنياء وهذا يعني إنهم كانوا يقدرون يستخدمون
بهارات في أكلهم اللي كانت بسعر الذهب في هذيك الفترة.
كذا كان الأكل الأوروبي قبل الثورة الفرنسية.
قامت الثورة وتغير كل شي. الطباخين اللي كانوا
يشتغلون عند النبلاء صاروا بدون وظائف وكون الغالبية من
السكان فقراء ماكان فيه أحد يقدر يدفع أجورهم.
غير كذا بسبب الفقر أو
الحروب مع الدول المجاورة أنقطعت البهارات
اللي أصلا محد كان عنده فلوسها و اللي
كان الطباخين يعتمدون عليها عشان النكهة .





كثير من الطباخين بعد الثورة كان عندهم فخر
ببلدهم وقرروا إنهم يتركون أي شي من برا فرنسا
من هنا بدأ التغيير وبدأ المطبخ الفرنسي يتشكل
الطباخين صاروا يفتحون محلات
يبيعون فيها أكل ( ومن هنا نشأت فكرة المطاعم )
وكون فرنسا فقيرة بالمكونات الطبيعية
أضطروا إنهم يستخدمون كل شي حولينهم ويحسنون
من طعمه بإستخدام طرق الطبخ
اللي طوروها و المكونات المحلية مثل الأعشاب و الفقع وغيرها .




لو نظرنا لأكلات فرنسية مشهورة
بنكتشف علطول كيف الإعتماد على طرق الطبخ
لتحسين مذاق وقوام الأكل واضح.
مثلا لو أخذنا شي زي السوفليه نلاقي
إنه أساس كسترد ومرفوع ببياض بيض المكونات
تافهة ومتوفرة بس كيف تنجمع مع بعض وتنطبخ
تعطي شي أكثر من عادي. مثال ثاني
عندنا البف بيستري اللي هي عبارة عن
عجينة معجونة بطبقات زبدة بحيث الزبدة تفصل
الطبقات عن بعض وتوفر الرفع اللي يخليها تنفش زي كذا
مرة ثانية نلاقي المكونات تافهة وسهلة
بس كيف تنخلط مع بعض وتنطبخ هي
اللي تسوي كل الفرق و الشخص
اللي فكر إنه يحط الزبدة ويستخدمها كذا هذا عبقري
مثال ثاني لو أخذنا المرق وكيف يستخدمونه بأكلهم
زي ماقلت كانوا يعصرون الدجاج و اللحوم
عشان يسوون صوص بس بعد الثورة
بدأ إستخدام المرق و طرق التثقيل لعمل صوصات لذيذة ومتنوعة.



نجي لأكلتنا اليوم

البوبييت
هي الأكلات اللي تجي ملفوفة حولين حشوة مثلا صدر دجاج أو قطع
لحم عجل أو أي شي ثاني
الطبق اليوم عبارة عن بطاطس ملفوفة
حولين قطعة سمك ومطبوخة في زبدة
إلين تصير البطاطس تقرمش و السمك
لين ورطب، مقدمة مع كراث مطبوخ وصوص ربيان رهيب .
هذي الأكلة موب أكلة فرنسية تقليدية
هي في الأساس حقت طباخ فرنسي
مشهور إسمه دانييل بولود
Daniel Boulud أخذها هو من طباخ فرنسي
ثاني تعلم عنده وعدل عليها. دانييل للي مايعرفة
من أفضل طباخين العالم وعنده مطعم
في نيوورك حاصل على ٣ نجمات مشلن !!
وهي أعلى مستوى المطعم يوصلة.
هذي نفس الوصفة بس مع صوص غير
أخترت الوصفة لأنها تمثل الكلام
اللي أبي أقوله بالضبط عن الطبخ الفرنسي.
مكونات عادية ، مجموعة مع بعض بطريقة ممتازة .




المقادير :

لصوص الربيان :
٤ أكواب مرق ربيان
ملعقتين كبيرة زبدة
طحين
رشة فلفل حار
للكراث :
حبتين كراث هندي كبيرة مقطعة شرايح ( الجزأ الأبيض بس )
٣ ملاعق كبيرة زبدة
للسمك :
٤ حبات فيليه سمك بدون جلد أو أي عظم وبشرط تكون سميكة شوي.
حبتين بطاطس كبيرة مره
ملعقة كبيرة زبدة ذايبة
شوي ورق زعتر بري thyme
زبدة للطبخ


* مرق الربيان ضروري ماله بديل هنا
بس تقدرون تسوون الأكلة بدون الصوص لو تبوون.
* الكراث الهندي اللي ما يعرفه يشوف موضوع أسبانيا هنا
* السمك أي أي نوع ينفع أهم شي يكون
السمك طازج وجديد هذا أهم شي. سمك
طازج من نوعية عاديه زي البلطي مثلا أحسن
من سمك قديم من نوعية ممتازة. إذا شميتوا
السمك ولقيتوا فيه ريحة غير ريحة البحر يعني قديم.




الطريقة :
للصوص :
للصوص أول شي نسويه هو إننا نطبخ المرق
على غلية جدا خفيفة إلين يصير نص حجمة الأصلي.
بعدين في قدر سميك ثاني نذوب ملعقة كبيرة
من الزبدة ونسوي فيها رو أشقر. الحين نصب
المرق عالرو ونحرك إلين يرجع الخليط لغلية
هادئة بعدين نحط الفلفل الحار. نخلي ال
خليط يطبخ إلين يختفي طعم النشا ويثقل
بعدين نذوق الصوص ونعدل الملح و الفلفل
ونزيد شوي خل أو عصير ليمون لو كان يحتاج.
نطفي النار ونحط ملعقة الزبدة الباقية ونحركها
إلين تدخل في الصوص ويصير الصوص يلمع ويثقل شوي.
للكراث :نذوب الزبدة على حرارة هادئة بعدين
نحط الكراث مع رشة ملح وفلفل
ونطبخه إلين يذبل ويصير لين تقريبا ٥ دقايق.




لسمك :أول شي نسويه هو إننا نغسل البطاطس
في مويه باردة بعدين نقشرها.
الحين ناخذ حبة البطاطس ونقطع جوانبها
بحيث نحاول نخليها مستطيلة قدر الإمكان.





الحين بإستخدام قطاعة ماندولين mandolin
( جهاز مفروض يكون في كل مطبخ )
نقطع البطاطس شرايح نحيفة قدر الإمكان.
هذا يمكن أهم جزأ في الوصفة. البطاطس
لازم تكون نحيفة لدرجة إنكم تقدرون تقرون
جريدة من وراها. لو البطاطس كانت سميكة ماراح
تلف معكم حولين السمك ولو ماكانت
مقطعة بالتساوي راح تتحمر
وتصير تقرمش من جهة وتكون رطبة ويمكن
ما تستوي من جهة عشان كذا مهم
إن الشرايح كلها تكون بنفس السماكة.
الماندولين قطاعة موجودة في كل محلات
الأدوات المنزلية حولين العالم ولها إستخدامات
كثيرة مرة ، هي تستخدم عشان تعطي
قطع متناسقة صعب نسويها بسكين مهما كان الواحد فنان.
منى سامى غير متواجد حالياً   رد مع اقتباس
قديم 06-02-2012, 03:26 PM   #5
منى سامى
ward2u مراقب عام
ward2u
ward2u
 
تاريخ التسجيل: Oct 2007
الدولة: عيد ميلادك احلى عيد
المشاركات: 12,311
منى سامى is on a distinguished road
افتراضي


ناخذ أحسن
شرايح من البطاطس (يعني اللي بطول وعرض متقارب)
ونضيف عليها الزبدة و رشة ملح ونقلبها
مع بعض. بعد التقطيع أنتبهوا تغسلون البطاطس !
النشا اللي عالبطاطس مهم عشان تلصق في بعض.
الحين ناخذ فيليه السمك ونقطعة
بالسكين بحيث يكون شكلة مستطيل
قدر الإمكان ونرش عالوجهين ملح وفلفل وشوي من ورق الزعتر .

الحين ناخذ شرايح البطاطس
ونرصها جنب بعض بطول السمكة بحيث تتقاطع
فوق بعض إلا جزأ بسيط بس (شوفوا الصورة تحت أوضح من كلامي) .


نحط الفيليه وسط البطاطس
بعدين نقفل عليها بالبطاطس من الجهتين شوي شوي .
نحط السمكة في الثلاجة
ساعة تقريبا عشان تلصق البطاطس ببعض وبالسمكة.
نسخن الفرن على ٤٢٥ .



الحين نسخن مقلة تيفال على حرارة عالية
ونذوب فيها شوي زيت وزبدة . بعد ما تذوب الزبدة
نحط السمك ونخلي الوجه اللي قفلنا البطاطس
فيه تحت ونطبخ السمك إلين يتحمر الوجه
الأول تقريبا ٣-٥ دقايق بعدين نقلبه شوي شوي
ونطبخ الوجه الثاني إلين يتحمر .
في حال تحمرت البطاطس من الجهتين بس
ما تحمرت من الجنب أو في حال السمك
ما أستوى نحط المقلة كلها في الفرن
كم دقيقة إلين يستوي السمك
أو يتحمر البطاطس ( أستخدموا مقلة تتحمل فرن ) .


نقدم السمك علطول فوق الكراث و نحط الصوص حولينه .
منى سامى غير متواجد حالياً   رد مع اقتباس
قديم 06-02-2012, 03:27 PM   #6
منى سامى
ward2u مراقب عام
ward2u
ward2u
 
تاريخ التسجيل: Oct 2007
الدولة: عيد ميلادك احلى عيد
المشاركات: 12,311
منى سامى is on a distinguished road
افتراضي

مطبخ ألمانيا : ساور براتن مع شبتزل ..
Sauerbraten with Spaetzle


مميزات المطبخ الالمانى
اليوم عندنا ألمانيا و إذا قلنا ألمانيا فإحنا نقصد معها
النمسا كون أكلهم جدا قريب من بعض.
الألمان و النمساويين أكلهم جدا متطور خصوصا في الحلويات
و المعجنات و اللحوم المحفوظة مثل النقانق و السجق.
النمساويين بالذات خبازين
مهرة ،هم اللي علموا الفرنسيين يصنعون الخبز و المعجنات
وهم اللي علموهم صناعة الأفران المتطورة في هذيك الفترة.
النمساويين غير كذا هم أصحاب الحلويات المتطورة و
المعقدة إلى يومنا أمثال التورتات ( تورت غير كيك ! )
اللي أبدعوا فيها مثل اللنزرتورت Linzer torte
و الصخا تورت Sachaertorte .



ساور براتن عبارة عن كلمتين ساور sauer
يعني مخلل بالألماني أو حامض و براتن braten
تعني محمر وهي بالضبط وصف للطبق.
الطبق عبارة عن قطعة لحم قاسية مخللة
لفترة طويلة بعدين مطبوخ لفترات طويلة
على حرارة هادية إلين تصير لينة وتذوب في الفم
ومقدمة مع صوص مثقل غالبا بكوكيز زنجبيل !
( نعم كوكيز !!! ) .





الساور براتن
مثال لنوع من اليخنات يسمونه pot roast
وهي اليخنات اللي يكون اللحم فيها قطعة
كبيرة يعني ما يكون مقطع صغار زي باقي اليخنات ..
هي أكلة ألمانية جدا مشهورة ويعتقد
إنها بدأت كطريقة لحفظ اللحم لفترات
طويلة. الشبيتزل طبق جانبي منتشر
في شمال وشرق أوروبا بشكل جدا كبير
الشبيتز موجود في ألمانيا و النمسا و شرق
أوروبا وحتى شمال فرنسا و إيطاليا.
هو عبارة عن باستا طازة من نوع خاص
مختلفة بشكل كبير عن الباستا الإيطالية العادية.





المقادير :للساور براتن :
3 كيلو فخذ بقر ملفوف على شكل
أسطوانة من منطقة ال bottom round.
كوب ونص خل عنب أو تفاح أو خليط منهم
كوبين مويه
ورقة غار
5 حبات فلفل أسود كامل
3 حبات قرنفل
ملعقتين كبار ملح
بصلتين مقطعة أجنحة
4 ملاعق كبيرة زبدة
5 ملاعق كبيرة طحين
ملعقة ونص كبيرة سكر
3/4 كوب بسكوت زنجبيل مطحون Gingersnaps
للشبيتزل :كوبين وربع طحين
ملعقة صغيرة ملح
رشة فلفل أبيض
رشة جوزة طيب
٣ بيضات
٣/٤ كوب حليب
ملعقتين كبار أعشاب طازجة مشكلة
حسب الرغبة ( ريحان ، زعتر ، طرخوون ، نعناع ، حبق .. إلخ .. )
* كالعادة دايما نوعية اللحم مهم تكون
ممتازة ومهم تكون من النوع اللي يمشي
مع طريقة الطبخ المستخدمة.
النوع اللي بنستخدم هنا إسمه bottom round
وهو لحم من منطقة فخذ البقر وهي منطقة
جدا قاسية وجدا لذيذة وبطعم قوي.
مع الطبخ الطويل تصير لينة وتذوب في الفم.





نرجع للرسمة هذي .
الراوند
round هو زي ما أنتم شايفين في الصورة .
أي لحم من هذي المنطقة ينفع بس لو قدرتوا تلاقون
لحم من المنطقة اللي تحت يعني
أقرب للرجل أو اللي يسمونها bottom round
بوتوم روند يكون أحسن . إذا مالقيتوا من هذي
المنطقة تقدرون تستخدمون أي قطعة قاسية
ثانية مثل الصدر brisket أو الرقبة chuck
. في حال كانت القطعة مسطحة يفضل
لو تلفونها على شكل أسطوانة وتربطونها
بخيوط هذا بيخليها أسهل في النقل و التقليب
و التحمير وبتكفي داخل أي قدر بس هي خطوة إختيارية. تقدرون
تسوون الطبخة بكذا نوع لحم ثاني
غير البقر ( غنم أو حتى حاشي
أو لو قدرتوا لحم الغزلان رهيب في الساوربراتن )
أهم شي تستخدمون لحم قاسي ويتحمل طبخ فترات طويلة .




* الطبخة هذي
تعتمد على الخل كأساس نكهة ، أستخدموا أحسن خل
عندكم يعني الخل الأبيض خلوه لتنظيف القزاز في البيت
و أستخدموا خل حقيقي للطبخ زي خل التفاح أو العنب.
* كوكيز الزنجبيل أو بسكوت الزنجبيل
يستخدم هنا عشان يثقل الصوص
وعشان يوازن طعم الحموضة ماله أي بديل.
لو تركتوه الصوص بيكون حامض ومستحيل أكله.





الطريقة :
للساور براتن :
للساور براتن أول شي بنسويه هو إننا
نخلل اللحم وقت طويل في الثلاجة ( ٣ – ٧ أيام )
بعد ما نخلله بنطلعه ونصفيه من التتبيلة
ونحمره زين على كل جهة بعدين بنطبخة
في نفس التتبيلة وقت طويل ( تقريبا ٤ ساعات )
إلين يصير اللحم لين ويذوب في الفم
بعد كذا بنطبع اللحم من التتبيلة ونسوي
الصوص بعدين نطبخة مع الصوص زيادة
تقريبا نص ساعة. زي ما أنتم شايفين العملية
تاخذ وقت بس هي جدا سهلة
لو ماعندكم وقت لا تسوون الساور براتن
لأن النتيجة ماراح تكون نص جيدة
إما تكون ممتازة أو شي ما ينوكل !.




نسوي التتبيلة بإننا نخلط الخل و المويه وورق الغار
و الفلفل و القرنفل و البصل و الملح في صحن.
نحط اللحم في كيس أو علبة بلاستك
أو قزاز ونصب التتبيلة عليه ونخلية يتخلل
٣ أيام على الأقل إلى أسبوع في الثلاجة.
لا تخللون اللحم في قدر ألمنيوم أو حديد أبدا !
الألمنيوم يتفاعل مع الخل ويعطي طعم
معدني قوي في اللحم. في حال كان
اللحم ما تغطى بشكل كامل بالتتبيلة
نقلبه كل ١٢ ساعة بحيث يتتبل من كل جهة
بشكل متساوي. هذي الخطوة ضرورية ! مالها أي إختصار.
نطلع اللحم من التتبيلة ونصفي التتبيلة
في صحن ثاني ونخليها على جنب.
نجفف اللحم بمناديل رول بشكل جيد
( عشان يتحمر بسهولة ) بعدين نسخن
القدر اللي بنستخدم ( بعد لازم ما يكون ألمنيوم أو حديد )
على حرارة أعلى من وسط بشوي ونخلي
القدر يحتر دقيقتين تقريبا. نحط شوي زيت
( ما يكون زيت زيتون ) بعدين نحط اللحم
بدون أي تحريك إلين يتحمر الوجه الأول
تماما بعدين نقلب اللحم عالوجه الثاني
ونحمره وبعدين باقي أوجه اللحم كلها
حتى الأطراف. نعدل الحرارة
من وقت لوقت بحيث ما تصير حارة أكثر
من اللازم وتحرق القطع البنية اللي في
قاع القدر (اللي بتعطي الصوص طعمه) .


الحين نحط التتبيلة اللي صفينا عالقدر ونطبخها إلين توصل
غلية خفيفة بعدين نغطي القدر وندخله كله في فرن
مسخن على حرارة ٢٠٠ ( أو لو قدركم ما ينفع يدخل

الفرن خلوه يطبخ على غلية جدا جدا خفيفة )
ونخلية يطبخ إلين يصير اللحم لين وينقطع بدون
إستخدام سكين يعني بالشوكة بس يتقطع.
إذا كان القدر كبير ( مثل حالتي )
يمكن السائل ما يغطي كل اللحم وهنا
لازم تقلبون اللحم كل ساعة تقريبا
عشان تستوي بالتساوي.







الشبيتزل :نخلط مقادير الشبيتزل كلها مع بعض بخفاقة
بيض أو حتى خلاط يدوي إلين يكونلنا عجينة لينة وجدا رطبة.
الحين نغلي مويه مع ملح على غلية جدا خفيفة عشان نسلق الشبيتزل.
عشان نشكل الشبيتزل فيه أكثر من طريقة :
نقدر نستخدم الهراسة حقت البطاطس
أو اللي يسمونها ricer (صورتها تحت)
نقدر نستخدم ظهر مبشرة عادية و نقدر نستخدم
ملعقة من النوع اللي فيها فتحات كبيرة .
فيه طرق كثير في النت بس هذي اللي
أشوفها أسهل شي ومتوفرة في كل بيت.
فيه طبعا جهاز خاص يسوي الشبيتزل بس موب ضروري أبدا.
منى سامى غير متواجد حالياً   رد مع اقتباس
قديم 06-02-2012, 03:27 PM   #7
منى سامى
ward2u مراقب عام
ward2u
ward2u
 
تاريخ التسجيل: Oct 2007
الدولة: عيد ميلادك احلى عيد
المشاركات: 12,311
منى سامى is on a distinguished road
افتراضي


الطريقة اللي بوريكم هي طريقة ظهر المبشرة وهي أعتقد الشي
اللي متوفر في كل بيت. فكرتها بسيطة :
نحط شوي من العجينة على ظهر
المبشرة ونضغطها بملعقة بحيث تطلع
من الفتحات الكبيرة عالمويه مباشرة .
نطبخ ثلث الخليط بعدين نصفية بعدين
نسوي الثلث الثاني وكذا إلين نخلص كل الكمية
. العملية ماتاخذ ٨ دقايق بالكثير .






نخلي الشبيتزل تطبخ دقيقتين
تقريبا بعدين نشيلها من المويه بملعقة مخرمة
ونصفيها شوي من المويه بعدين نحطها


في صحن مدهون شوي زبدة أو زيت ونقلبها
في الزبدة عشان ما تلصق في بعض
بعدين نسوي باقي الكمية بنفس الطريقة


منى سامى غير متواجد حالياً   رد مع اقتباس
إضافة رد

أدوات الموضوع

ward2u تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة



الساعة الآن 11:18 PM.


Powered by vBulletin® Version 3.8.7
Copyright ©2000 - 2014, vBulletin Solutions, Inc.
eXTReMe Tracker